Fylkesordførar Anders Riise fekk æra av å offisielt opne dei to asfaltfabrikkane. Til venstre konserndirektør Øivind Larsen frå Veidekke og til høgre Benninghoven sin teknikar.
Veidekke
Fylkeskommunen etablerte dialogen med Veidekke i 2018 med sikte på fossilfri asfaltproduksjon, dette med bruk av grøn hydrogen. Dialogen resulterte i arbeid med ein moglegheitsstudie i 2019.
Hausten 2023 etablerte Veidekke ein pilot i Kristiansund. Og no er dei i gang med fabrikk nummer to i Ålesund. Desse er verdas første asfaltfabrikkar for grøn produksjon av asfalt.
Offisielt opna
Onsdag blei fabrikkane offisielt opna. Det skjedde i samband med eit miniseminar i Ålesund om hydrogen.
Konserndirektør Øivind Larsen i Veidekke seier fabrikkane er eit ledd i det grøne skiftet med utfasing av fossil energi. Og han gir ros til fylkeskommunen for å vere framsynt:
– Dette hydrogeneventyret starta i 2019 som eit resultat av moglegheitsstudien som vart initiert av Møre og Romsdal fylkeskommune. For oss er det viktig å ha ein visjonær fylkeskommune som tør å tenke nytt og tenke framover på det grøne skiftet. At Møre og Romsdal fylkeskommune har ambisjonar og visjonar, passar glimrande og har vore avgjerande for at vi i Kristiansund og Ålesund har fått til verdas to første asfaltfabrikkar som kan produsere med hydrogen, seier Veidekke sin konserndirektør.
Fekk æra av å opne
Fylkesordførar Anders Riise fekk æra av å offisielt opne Veidekke sine to anlegg.
– Hydrogen kjem til å få ei viktig rolle i energiomlegginga, og vi har fleire gode føresetnadar i Møre og Romsdal. Men for å få til ei verdikjede for hydrogen, så krev det samarbeid, seier Riise.
I sitt innlegg under miniseminaret fortalte han korleis fylkeskommunen jobbar med hydrogen. Og nettopp hydrogen er ei av ni nøkkelverdikjeder som vert løfta fram i Grønt Industriløft Møre og Romsdal. Prosjektet har som mål å styrke grøne og sirkulære prosjekt med stort vekst- og skaleringspotensial, vere ein katalysator for framvekst av grøne verdikjeder på tvers av sektorar og akselerere den grøne omstillinga i næringslivet i Møre og Romsdal.