Bransjen har meldt om aukande mangel på betongfagarbeidarar over fleire år.
I samarbeid med Opplæringskontoret for bygg- og anleggsteknikk (BYGGOPP) etablerer kompetanse- og næringsavdelinga i fylkeskommunen no eit opplæringsløp som skal gi vaksne moglegheit til å ta fagbrev – same kvar i fylket dei bur. Ressurssenteret på Nordre Sunnmøre koordinerer opplæringa, men gjennomføringa skjer ved ressurssentera over heile fylket og i lokale bedrifter.
Slit med rekruttering
BYGGOPP har allereie varsla at dei kan etablere opp mot 30 nye praksisplassar for vaksne deltakarar som startar i betongfaget, etter tydelege signal frå medlemsbedriftene om at dei slit med rekruttering – særleg på Sunnmøre og Nordmøre.
Det nye tilbodet blir organisert som ein kombinasjon av ein dag skule og fire dagar opplæring i bedrift. For dei som allereie har norsk og samfunnskunnskap frå vidaregåande opplæring, kan heile løpet gjennomførast i bedrift. Tilbodet passer for vaksne over 19 år som trivst med fysisk arbeid, varierte oppgåver og kan kommunisere på norsk både munnleg og skriftleg. Førarkort klasse B og evne til å reise noko i samband med opplæringa er ein fordel.
Opplæringsløpet blir individuelt tilpassa, der tidlegare erfaring og utdanning blir vurdert før ein startar. Det kan òg vere mogleg å prøve seg i ei bedrift før opplæringa startar dersom ein er usikker på om faget passar.
Stor etterspurnad
Betongfaget omfattar forskaling, armering og støyping av konstruksjonar, og det er eit fag med stor etterspurnad i heile bygg- og anleggsnæringa.
Søknader blir levert på vigo.no under fana for vaksne som søker vidaregåande opplæring.
Meir informasjon om sjølve faget finst på vilbli.no, medan spørsmål om søknadsprosessen kan sendast til vakseninntak@mrfylke.no.