Målet med markeringa av Friluftslivets år er å gje flest mogleg kunnskap om friluftslivet, og alt det fine vi kan oppleve i naturen. For eksempel som her; ein drøymetur til Sandhornet i Ørsta.
Randi Holsvik / Møre og Romsdal fylkeskommune
I Stortingsmelding 18 (2015–2016) Friluftsliv – natur som kilde til helse og livskvalitet, er det bestemt at Friluftslivets år skal markerast i 2025. Målet med markeringa er å gje flest mogleg kunnskap om friluftslivet, og alt det fine vi kan oppleve i naturen.
Visjonen for markeringa er at alle skal finne si friluftsglede, og hovudmålet for markeringa er å skape begeistring for naturvennleg friluftsliv, og senke terskelen for å delta.
Opprettar eiga tilskotsordning
No har kultur- og folkehelseutvalet vedtatt å opprette ei eiga tilskotsordning for organisasjonar og aktørar som ønsker å markere året med konkrete tiltak. Ei tilskotsordning vil vere med å anerkjenne arbeidet og dekke kontantutgifter for ulike tiltak.
Det er lagt opp til at ordninga, med ei ramme på inntil 1,5 millionar kroner, skal famne eit mangfald av søknadar, men at hovudvekta av ramma skal brukast på born og ungdom, og eldre. Det er også eit mål at ordninga skal stimulere til friluftslivstiltak som koplar saman aktørar og stimulerer til samarbeid på tvers av kulturfeltet og geografi.
Inntil 50.000 kroner
Kvart prosjekt som det er søkt om kan gis eit tilskot på inntil 50.000 kroner.
Ordninga blir lyst ut hausten 2024, slik at tilsegnene er klare til 2025.
Du kan lese meir om markeringa av Friluftslivets år på nettsida til Norsk friluftsliv.
Møtedokument for kultur- og folkehelseutvalet sitt møte tysdag 10. september 2024.