Fylkesordførar Anders Riise.
Stortingets nett-TV
Fredag 16. oktober deltok Anders Riise i høyringa om statsbudsjettet for 2027 i kommunal- og forvaltningskomiteen på Stortinget. Saman med fleire ordførarar og fylkesordførarar ga han innspel om utfordringane for fylkeskommunane.
Fylkesvegane stod øvst på lista for Møre og Romsdal.
– Fylkesvegane er den store utfordringa i Møre og Romsdal, sa Riise.
Ekstramilliarden
Han peika på at den ekstra milliarden til fylkesvegane i 2026 er tatt ut av forslaget til statsbudsjett for 2027. Samtidig aukar vedlikehaldsetterslepet på fylkesvegane i Møre og Romsdal med om lag 500 millionar kroner i året.
Fylkesordføraren understreka at pengar til fylkesvegane handlar om meir enn å redusere vedlikehaldsetterslepet. Det handlar også om tryggare vegar, beredskap og framkomst for næringslivet.
KS har tidlegare tatt til orde for minst 5 milliardar kroner årleg til fylkesvegane. Møre og Romsdal støttar dette. Riise forventar også at stortingsforhandlingane gir minst éin milliard kroner meir til fylkesvegane.
Press på kollektiv og vidaregåande opplæring
Riise løfta også den økonomiske situasjonen for kollektivtransporten. Omstilling til nullutslepp og andre kostnadsaukar gjer at fylkeskommunen må redusere rutetilbodet.
Fullføringsreforma i vidaregåande opplæring var eit anna tema. Riise understreka at fylkeskommunen støttar reforma, men at ho krev fysiske tiltak, ny kompetanse og fleire tilsette.
Etterlyste forskingsmidlar
Han etterlyste også FORREGION-midlar til forsking og innovasjon og viste til kor viktig forsking er for konkurransekrafta i det eksportretta næringslivet i Møre og Romsdal.
Måndag 19. oktober skal Riise igjen til Stortinget, denne gongen til samferdselskomiteen si høyring om statsbudsjettet. Møre og Romsdal fylkeskommune har taletid frå klokka 09.55 til 10.00. Riise vil igjen etterlyse vedlikehaldsmilliarden til fylkesvegnettet. Høyringa kan følgast i Stortingets nett-TV.