Møre og Romsdal fylkeskommune og Riksantikvaren arrangerte KIK (kurs i kulturmiljøforvaltning) på Scandic Alexandra i Molde. Nær 100 kommunetilsette innan planlegging, byggesak, kultur, landbruk og nærliggande fagområde deltok.
Målet med kurset var å styrke kompetansen i kommunal forvaltning av kulturminne, kulturmiljø og landskap, med vekt på både nasjonale føringar og regionale utfordringar. Programmet gjekk over to dagar og kombinerte faglege innlegg, diskusjonar og synfaringar.
Første kursdag hadde hovudvekt på planlegging og kulturmiljøforvaltning, med tema som samanhengen mellom vern og utvikling, rollefordeling i forvaltninga og ny fylkesstrategi for kulturarv.
Velkomst frå fylkesordføraren
Fylkesordførar Anders Riise opna kurset og peika på ansvaret for å ta vare på kulturarven samstundes som samfunnet skal utviklast vidare.
Riise understreka at det er eit felles ansvar å sikre at komande generasjonar kjenner historia og identiteten til Møre og Romsdal, og peika på utfordringa med å legge til rette for vekst utan å miste det som gjer stadene unike.
– Det viktigaste spørsmålet er korleis vi gjer det attraktivt for eigarar å ta vare på kulturmiljøet. Det er eigarane som må stå bak både utvikling og varetaking. Utan bruk vil mange kulturmiljø og kulturminne forsvinne, sa Riise.
Han framheva at kulturmiljø handlar om meir enn vern, og kan bidra til utvikling, identitet, verdiskaping, attraktive lokalsamfunn og nye arbeidsplassar.
Viktig å styrke kompetansen i kommunane
Seniorrådgivar Line Bårdseng i Riksantikvaren seier at slike kurs er viktige for å styrke kompetansen i kommunane. Ho peikar på at kommunane har eit stort ansvar i det daglege arbeidet, og at det er avgjerande med eit godt fagleg grunnlag for planlegging og forvaltning. Kulturmiljø må òg sjåast som ein ressurs i møte med klima, gjenbruk og samfunnsutvikling.
Riksantikvaren har dei siste åra gjennomført tilsvarande kurs fleire stader i landet i samarbeid med fylkeskommunane, for å styrke kommunal kompetanse og få kulturmiljø tidlegare inn i planlegginga.
Andre dag hadde særleg fokus på byggesak, friluftsliv og kulturmiljø som ressurs. Deltakarane fekk fagleg påfyll om regelverk og ivaretaking av kulturminne i byggesaker, før dagen blei avslutta med synfaringar i og rundt Molde, mellom anna i sentrum, på Hjertøya og ved Julneset friluftsområde.