Ungdomspanelet på plass i Geiranger.
Per-Kristian Bratteng
Punkta vart lagt fram under ungdommens spørjetime på fylkestinget tysdag. Ungdomspanelet har vore samla i Geiranger frå søndag, og fylkestinget vart opna måndag.
Dei seks punkta til budsjettet er
- at fylkeskommunen legg til rette for eit betre samarbeid mellom offentlege og private aktørar for arbeidsplassar til ungdom.
- at fylkeskommunen sett av øyremerka midlar til fylkestreff for avgangsmarkering
- at FRAM Ung sin takst blir uendra
- at fylkeskommunen bevarer støtta for lag og organisasjonar økonomisk
- at fylkeskommunen sikrar samhald og framkomst mellom distrikta ved å oppretthalde det noverande tilbodet Timeekspressen.
- at fylkeskommunen bevarer driftstilskotet til skulane
Leiar Magnus Smørdal i Ungdomspanelet er ikkje i tvil om kva som er viktigast av dei seks punkta: Å bevare driftstilskotet til skolane.
– Utdanning er noko av det aller viktigaste som fylkeskommunen har ansvar for, og som er viktigast for oss ungdom. Og så har FRAM Ung vore ei hjartesak for oss ungdom; at tilbodet er til ein såpass låg pris at det blir brukt og kjøpt av ungdom, seier Smørdal.
– Kva forventar de av politikarane?
– Først og fremst at dei ikkje kuttar meir. Vi ser kor vanskeleg den økonomiske situasjonen i fylkeskommunen er i dag, og at det må kuttast. Men det forsvarar ikkje å kutte i dei tilboda vi meiner er viktige, seier leiaren av Ungdomspanelet.
Budsjettet for 2025 blir vedtatt i desember av fylkestinget.