Snart startar oppgraderinga av Selvågtunnelen

Rett over nyttår startar arbeidet med å utbetre Selvågtunnelen. Dette vil føre til redusert framkomme i anleggsperioden. Møre og Romsdal fylkeskommune inviterer til open dag for å informere om prosjektet og følgjene det får for trafikantane.

Selvågtunnelen (1069m) med dagsoner skal utbetrast for å imøtekomme Tunneltryggleiksforskrifta,  samt naudsynte oppgraderingar knytt til dagens vegnormalar. Arbeidet er lyst ut og anbodsopning er 1. november. Arbeidet er forventa å starte i januar 2025.

Bilete av tunnel innvendig - Klikk for stort bileteSelvågtunnelen

Open dag 23. oktober, 12.00 -17.00

Møre og Romsdal fylkeskommune må gjennomføre omfattande rehabilitering av ei lang rekkje tunnelar i fylket for å tilfredsstille dagens regelverk. No er det snart Selvågtunnelen sin tur. Når ein skal gjere jobbar i tunnelar så vil det føre til redusert framkomme, sjølv om vi alltid prøvar holde trafikken open så langt det er rå.

Arbeida i tunnelen skal gå føre seg på kvelds- og nattetid, med arbeidstid mellom kl. 20.00 og 06.00 alle dagar. I dette tidsrommet blir det lagt opp til kolonnekøyring med gjennomslepp til faste tider, medan utrykkingskøyretøy kan passere til ei kvar tid.

- Dette prosjektet er på ei strekning med mykje trafikk, og sjølv om jobben skal gjerast på kveld og natt, vil det få følgjer for mange. Derfor ønskjer vi å komme tidleg i kontakt med dei som blir påverka av dette, for å gi informasjon og avdekke behov. Dette er ei fin moglegheit til å innsikt i detaljane, seier prosjektleiar i Møre og Romsdal fylkeskommune, Erlend Opstad.

23. oktober inviterer prosjektet til open dag på anleggsbrakka som er plassert på Storehølvegen 18c i Ulsteinvik. Alle interesserte kan besøke anleggskontoret mellom 12.00- 17.00 denne dagen. Der det vil bli informert om jobben som skal gjerast, samt at det er ein fin arena for å stille spørsmål og opprette ein god dialog. 

Fakta om jobben som skal gjerast

  • Fri høgde i tunnelane aukast til 4,6 meter, frå ca. 4,2 meter i dag
  • Ny drenering inkludert system for oppsamling av vaskevatn, olje og slam
  • Rive og reetablere vatn- og frostsikring ca. 8200 m2
  • Forsterke bergsikring
  • Utskifting av tunnelbelysning og lys i dagsoner
  • Utskifting og oppgradering av tryggleikutrustning
  • Utskifting av skilt og ny vegmerking
  • 2 tekniske bygg
  • 2 Fjernstyrte bommar og 2 høgdehinder
  • Nye stopplommer før Selvågtunnelen på begge sider
  • Riving og reetablering/oppgradering av rekkverk
  • Ny asfalt ca. 9000 m2