Andelen søkarar som vel studieførebuande gjer eit lite hopp frå i fjor.
Terje Aamodt
Etter at fristen til å søke gjekk ut på måndag, er søkarstatistikken klar for dei offentlege vidaregåande skolane i fylket.
3.942 elevar med ungdomsrett har no søkt vidaregåande opplæring på vg1. Totalt er det 9.246 søkarar til alle tre trinna.
- Vi ser i år ei lita endring i søkarmønster for første trinn, der andelen elevar som søker seg til studieførebuande gjer eit lite hopp, seier Maria Enstad, seksjonsleiar for inntak.
Totalt er det 121 fleire enn i fjor som har studieførebuande som første ønske, noko som er ei auke på to prosentpoeng frå fjoråret. 37 prosent av søkarane til første trinn har valt studieførebuande.
- Dette er gledelege tal. Og det er positivt å sjå at det er ei auke i søking til studieførebuande i alle tre regionar, for vi treng både elevar med studiekompetanse og yrkesfagkompetanse for å møte framtidas arbeidsbehov, seier Enstad vidare.
Teknologi- og industrifag aukar mest
Søkinga til yrkesfaga held seg framleis høg og størst, med ein andel på 63,5 prosent på første trinn.
Teknologi og industrifag, elektro- og datateknologi og bygg- og anlegg har stabilt høge søkartal.
Restaurant- og matfag, sal, service og reiseliv og helse- og oppvekstfag har færre søkarar når ein ser på fylket under eitt.
Fleire jenter på naturbruk og teknologi- og industrifag
Søkemønsteret held seg nokså tradisjonelt, blant gutar og jenter, også i denne runden.
Den mest markerte skilnaden frå i fjor er at fleire jenter søker seg til teknologi- og industrifag, med 18 prosent av søkarane. Fleire jenter søker seg også til naturbruk, totalt 30 prosent av søkarane mot 27 i 2024. Elektro fortset med auken dei har hatt med fleire jenter sidan 2019.
På IT og medieproduksjon søkk andelen jenter frå 19 til 14 prosent.
På helse- og omsorg er ubalansen ytterlegare forsterka, berre 9 prosent av søkarane er gutar.
Her finn du søkarstatistikk fordelt på skole, trinn, programtilbod, kjønn, historisk utvikling med meir.
Søkarar til Vg1 etter utdanningsprogram 1. ønske, ungdomsrett, heile fylket
| Utd.type | Utd.prog. | 2024-2025 | 2025-2026 | Søkarar | Prosent |
|---|
| Studiefb. | Idrettsfag | 299 | 298 | -1 | 0 % |
| Studiefb. | Kunst, design og arkitektur | 96 | 100 | 4 | 4 % |
| Studiefb. | Musikk, dans og drama | 130 | 130 | 0 | 0 % |
| Studiefb. | Medier og kommunikasjon | 17 | 9 | -8 | -47 % |
| Studiefb. | Studiespesialisering | 777 | 903 | 126 | 16 % |
| Yrkesfag | Bygg- og anleggsteknikk | 170 | 171 | 1 | 1 % |
| Yrkesfag | Håndverk, design, produktutv. | 23 | 26 | 3 | 13 % |
| Yrkesfag | Elektro og datateknologi | 407 | 421 | 14 | 3 % |
| Yrkesfag | Frisør, blomst, int, eksp.design | 91 | 93 | 2 | 2 % |
| Yrkesfag | Helse- og oppvekstfag | 580 | 552 | -28 | -5 % |
| Yrkesfag | IT og medieproduksjon | 79 | 80 | 1 | 1 % |
| Yrkesfag | Naturbruk | 246 | 251 | 5 | 2 % |
| Yrkesfag | Restaurant- og matfag | 119 | 108 | -11 | -9 % |
| Yrkesfag | Salg, service og reiseliv | 175 | 161 | -14 | -8 % |
| Yrkesfag | Teknologi- og industrifag | 597 | 639 | 42 | 7 % |
| | Samla tal søkarar | 3.806 | 3.942 | 136 | 4 % |
| | Tal søkarar til SF | 1.319 | 1.440 | 121 | 9 % |
| | Tal søkarar til YF | 2.487 | 2.502 | 15 | 1 % |
| | Del søkarar til SF | 35 % | 37 % | | |
| | Del søkarar til YF | 65,3 % | 63,5 % | | |