Bilferja Rødvenfjord.
Erik Birkeland, Tingh / Møre og Romsdal fylkeskommue
Det kjem fram i saka «Økonomirapportering per 2. tertial 2024 inkl. forslag til budsjettjusteringar», som skal til behandling i fylkesutvalet tysdag 1. oktober og for endeleg vedtak i fylkestinget 14.-15. oktober.
I forslaget til vedtak om takstjustering, foreslår fylkeskommunedirektøren å auke prisen for FRAM ung på buss med 20 prosent, og senke øvre aldersgrense frå 24 til 19 år frå og med november. I tillegg ei auke i billettprisane på betalingssamband på ferjene frå 1. november med éi takstsone.
Meirforbruk på 102,8 mill. kr
Bakgrunnen for innstillinga, er den krevjande økonomiske situasjonen for Møre og Romsdal fylkeskommune. Prognosen for FRAM viser eit meirforbruk i 2024 på 102,8 millionar kroner. Hovudårsaka til meirforbruket er tapte billettinntekter på til saman om lag 68 mill. kroner. I prognosen er det og lagt til grunn ei prisstigning på kontraktane på buss, fylkesvegferjer og hurtigbåtar på om lag 32 millionar kroner.
Realnedgang i prisane
I saksframlegget skriv fylkeskommunedirektøren at det har vore ein realnedgang i prisane på FRAM ung. Samanlikna med andre område i landet, ligg Møre og Romsdal i det lågaste sjiktet av pris, og med høgast øvre aldersgrense. 10 av 13 fylke opererer med ei øvre aldersgrense på 19 år. Med justeringa som fylkeskommunedirektøren foreslår, vil tilbodet FRAM ung vere på same nivå som i dei fleste andre fylke.
Når det gjeld ferjer, har kostnadane auka meir enn utviklinga i takstane og dei statlege rammetilskota.
Det er 20 fylkesferjesamband i Møre og Romsdal, der ti av dei er gratissamband.
Her kan du sjå møtepapira for fylkesutvalet måndag 30. september og fylkesutvalet tysdag 1. oktober.