Oversiktskart over Bypakke Kristiansund Kjelde: Statens vegvesen
Statens vegvesen
I ei pressemelding skriv Samferdselsdepartementet at Bypakke Kristiansund er sett saman av veg-, gang-, sykkel- og kollektivtiltak innanfor ei ramme på om lag 2,2 milliardar kroner.
– Med denne bypakka kjem det prosjekt og tiltak både på riksveg, fylkesveg og kommunal veg. Det legg til rette for grøn byutvikling og gode transportløysingar i Kristiansund, seier samferdselsminister Jon-Ivar Nygård i pressemeldinga.
Samferdselsministeren seier vidare at med forslaget til Bypakke Kristiansund får folk ein påliteleg og effektiv transportkvardag, der det er lagt godt til rette for å sykle, gå og reise kollektivt.
Bypakka inneheld fem tiltak på riksveg som skal legge til rette for betre framkome, fem tiltak på fylkeskommunalt vegnett som skal legge betre til rette for kollektivreisande og elleve tiltak på kommunalt vegnett med utbetringstiltak for mjuke trafikantar.
Framlegget er i tråd med vedtak i både kommunestyre og fylkesting.
Finansieringa er basert på bompengar, statlege midlar til nokre mindre investeringstiltak og fylkeskommunale midlar, samt meirverdiavgifta som staten refunderer til Kristiansund kommune og Møre og Romsdal fylkeskommune for prosjekt og tiltak i bypakka. Det kjem to bomstasjonar på Rv. 70 i Kristiansund, og det er lagt til grunn ein innkrevjingsperiode på inntil 15 år med oppstart av innkrevjinga i løpet av 2026, går det fram av forslaget.
Saka skal først til behandling i transport- og kommunikasjonskomitéen, før plenumsbehandling/debatt og endeleg vedtak i Stortinget.