SSB har publiserte nye tal for konkursar i 1. kvartal 2024. Ser vi landet under eitt har det vore ein nedgang på 184 konkursar eller 14 prosent samanlikna med same periode i 2023.
Ifølge SSB var nedgangen i talet på konkursar størst i Rogaland fylke og Vestland fylke med 47 prosent og 33 prosent nedgang. Finnmark fylke og Vestfold fylke skil seg ut med den største auken i konkursar i 1. kvartal, med 62 og 34 prosent samanlikna med 1. kvartal 2023.
Etter låge konkurstal under Covid-pandemien, aukar no talet på konkursar igjen. I 2023 var det 189 konkursar i fylket mot 132 og 136 konkursar i 2021 og 2022.
Byggenæringa i motbakke
Ser ein nærare på tala for den enkelte næring, skil byggenæringa seg ut. I næringa «spesialiserte bygge- og anleggsverksemder» var det i Møre og Romsdal ei dobling i talet på konkursar i 1. kvartal 2024, samanlikna med 1. kvartal 2023. I 1. kvartal 2024 var det 14 bedrifter som gjekk konkurs i denne næringa. Det er eit auka tal på konkursar i næringa «Oppføring av bygningar», i 4. kvartal 2023 var det heile 12 konkursar og 5 konkursar i 1. kvartal 2024. Talet på konkursar auka i denne delen av byggenæringa i fylket frå 22 konkursar i 2022 til 30 konkursar i 2023.
Høgare rente, saman med høg prisvekst på varer og tenester, har gjort at mange har fått ein strammare økonomi. Dette har påverka bustadmarknaden, til dømes var det ein nedgang i omsette bustadar frå 2022 til 2023 på 3,9 prosent i Møre og Romsdal. (Ei omsetting omfattar ikkje berre vanleg sal, men også gåveoverføringar, skifteoppgjer, uskiftebevilling, tvangssal og anna.) Nedgangen i omsette bustadar ser ut til å halde fram i 2024. I 1. kvartal 2024 vart det omsett 755 bustadar i Møre og Romsdal, til samanlikning var det i same periode i 2023 omsett 839 bustadar.
Utviklinga i økonomien dei siste par åra rammar byggenæringa hardt. Lågare byggeaktivitet i tillegg til auka kostnadar, er nok hovudårsaka til auken i talet på konkursar i byggenæringa.
Artikkel frå SSB om talet på konkursar i første kvartal 2024