Kristian Lykkeslet Strømskag og Zezé Kolstad frå Teatret Vårt tok i mot prisen for Årets Regionbyggar 2025 frå fylkesordførar Anders Riise.
Møre og Romsdal fylkeskommune
Til ståande applaus frå salen tok teatersjef Kristian Lykkeslet Strømskag og kunstnarisk leiar for avdeling barn og unge i Ålesund, Zezé Kolstad i mot prisen på vegner av Teatret Vårt under middagen på Nyttårskonferansen i Bjørnsonsalen torsdag kveld.
– Det er ei stor ære å bli løfta fram på denne måten. Å bli sett og verdsett for arbeidet vi legg ned, betyr mykje for oss alle, sa Strømskag då han tok i mot prisen.
Motivert av prisen
Juryen seier i si grunngiving at teateret har opna auger, skapt emosjonelle augneblinkar, provokasjonar, glede og kanskje også skremsel.
– Å vere ein regionbyggar er ikkje berre eit fint ord for oss – det er sjølve grunnlaget for det vi gjer. Det ligg i alt arbeidet vårt med framsyningar, turnéar og møtet med publikum. Når dette arbeidet blir målt og verdsett, er det eit tydeleg teikn på at vi lukkast, og det gir oss både motivasjon og kraft til å halde fram og utvikle oss vidare, seier Strømskag.
Prisvinnaren fekk eit kunstverk frå Møre og Romsdal kunstsenter si årsutstilling signert kunstnaren Monica Vermeer. Vemeer er opphavleg frå Nederland, men har budd på Sunnmøre i fleire år. I tillegg fekk vinnaren eit diplom.
Samlande kraft i fylket
Nyttårskonferansen deler ut prisen Årets regionbyggar til ein person, organisasjon, bedrift eller offentleg aktør som har utmerka seg på ei enkeltsak eller over tid som ei samlande kraft i fylket, eller som har tatt spesielle initiativ som bygger Møre og Romsdal saman.
Det er deltakarane på Nyttårskonferansen som kan nominere kandidatar med og programkomiteen, beståande av representantar frå fylkeskommunen, Statsforvaltaren, NAV, ungdomspanelet og KS, er jury.
Teatret Vårt er ein organisasjon med lang fartstid. I over 50 år har organisasjonen bygd fylket vårt saman, med sitt virke. Dette er ein organisasjon som har opna auger, skapt emosjonelle augneblinkar, provokasjonar, glede og kanskje også skremsel. Dei har skapt sosiale møtearenaer og plassar for ettertanke.
Vinnaren har arbeidd hardt med å gi gode opplevingar i heile Møre og Romsdal, frå inst til ytst, frå nord til sør, frå dei minste til dei største stadane, og frå dei yngste i befolkninga til dei eldste, for små publikum, og på store, utselde scener. Vinnaren er ein profesjonell aktør, som gjennom si formidling gir oss gode kunstopplevingar.
Gjennom sitt virke fremmer vinnaren ytringsfridom, kritisk tenking og eit ope ordskifte – kjerneverdiar i eit levande demokrati. Når vi no er på veg inn i totalforsvarsåret 2026, er vinnaren også ein tydeleg representant for kultursektoren sitt viktige bidrag til å bygge sivil motstandskraft og styrke vår mentale helse, identitet og fellesskap. Vinnaren fyller si rolle som samlande kraft og samfunnsbyggar.
Organisasjonen turnerer med om lag 450 førestillingar i Møre og Romsdal i løpet av året, og har om lag 45 tilsette. Dei er slik ein stor arbeidsplass, som skapar ringverknadar langt utover sitt eige virke. Dei har faste scener i Molde og Ålesund, men kjenner godt alle kommunar i heile Møre og Romsdal.
På vegner av heile Teatret Vårt vil eg først få seie tusen, tusen takk for denne prisen. Det er ei stor ære å bli løfta fram på denne måten. Å bli sett og verdsett for arbeidet vi legg ned, betyr mykje for oss alle.
Å vere ein regionbyggjar er ikkje berre eit fint ord for oss – det er sjølve grunnlaget for det vi gjer. Det ligg i alt arbeidet vårt med framsyningar, turnéar og møtet med publikum. Når dette arbeidet blir målt og verdsett, er det eit tydeleg teikn på at vi lukkast, og det gir oss både motivasjon og kraft til å halde fram og utvikle oss vidare.
Som regionteater for heile Møre og Romsdal har Teatret Vårt ei viktig rolle – kulturelt, sosialt og samfunnsbyggjande. Vi er ein del av fylket sin identitet og geografi. Teater er ikkje eit tilbod for dei få, men ein grunnleggjande del av eit levande, demokratisk og berekraftig samfunn.
Teatret Vårt er også ein viktig arbeidsgivar, eit kompetansemiljø og ein samarbeidspartnar i regionen. Vi bidreg til attraktivitet, bulyst og omdøme – noko som er heilt avgjerande for å halde på og tiltrekkje oss menneske, særleg unge og kreative fagmiljø. Kultur er ikkje ein kostnad, men ei drivkraft for regional utvikling. Kunstnarleg kvalitet, turnéverksemd og gode relasjonar til publikum krev stabilitet, målretta arbeid og langsiktig tenking.
Møre og Romsdal er eit stort og mangfaldig fylke. Gjennom turnéverksemd, samarbeid og felles kulturopplevingar er Teatret Vårt med på å binde regionen saman. Når vi kjem til både små tettstader og større byar med framsyningane våre, skapar det tilhøyrsle og ei kjensle av å vere del av noko større. Dette er regionbygging i praksis.
Tusen takk for tilliten, for anerkjenninga – og for at de ser verdien av det vi gjer.