Fredrik Linge Klock er dagleg leiar i Byggopp Møre og Romsdal.
Marius Rosbach, Nett.no
– Skal du få tak i fagfolk, er du sannsynlegvis nøydt til å utdanne dei sjølv, seier dagleg leiar Fredrik Linge Klock i Byggopp Møre og Romsdal, som er samarbeidsorganet for bygg- og anleggsteknikk.
Opptil 30 nye praksisplassar
Byggopp Møre og Romsdal vil no satse tungt på vaksne i betongfaget, og har meldt til Møre og Romsdal fylkeskommune at dei etablerer nye praksisplassar for opp mot 30 elevar som tar vidaregåande opplæring for vaksne.
Vidaregåande opplæring for vaksne er eit tilbod som innbyggarane i Møre og Romsdal kan søke om frå det året dei fyller 19 år.
Opplæringskontoret for bygg- og anleggsteknikk har om lag 140 medlemsbedrifter og rundt 170 løpande lærekontraktar. Hovudoppgåva er å legge til rette for god fagopplæring i bedriftene, og drive informasjon og rekruttering til aktuelle handverksfag.
Stort behov for fagfolk
Dagleg leiar Fredrik Linge Klock er tydeleg på kvifor dei no satsar på vaksne i betongfaget:
– Det er ganske enkelt; vi er nøydde til å få tak i nok handverkarar. Behovet innan betongfaget er aukande, og bedriftene har gitt oss beskjed om at vi skal gjere kva vi kan for å få tak i desse fagfolka, seier han.
I dag er det tilbod i betongfag i Romsdal ved Romsdal vgs, medan Sunnmøre og Nordmøre manglar tilsvarande opplæringstilbod. Samtidig melder bedriftene om store utfordringar med å rekruttere, både på Sunnmøre – til dømes i Ålesund og Ulsteinvik/Ørsta/Volda – og på Nordmøre.
– Må ta meir ansvar sjølv
Klock meiner løysinga ligg i å satse meir systematisk på vaksne, ute i deira bedrifter:
– Vi ser at skal du få tak i fagfolk, er du sannsynlegvis nøydt til å utdanne dei sjølv. Ordninga med praksisplassar er fantastisk – du får lært dei opp slik du treng det, og får god arbeidskraft i mange år framover.
Han peikar på at vaksne søkarar ofte kjem inn med erfaring og motivasjon som gjer dei ekstra verdifulle for bedriftene.
– Mange av dei har tidlegare arbeidserfaring og forståing for handverk. Nokre har språkproblem, men det kan lærast. Dei veit kor vanskeleg det kan vere å få jobb, og er motiverte. Dette er folk som ofte glir godt inn i bedriftsmiljøa, seier Klock.
Treng fleire i betongfaget
I dag er fleirtalet av lærlingane i Byggopp tømrarar.
– Det er interessant, for vi treng eigentleg like mange betongarbeidarar som tømrarar. Derfor ser vi på denne satsinga som ein rein vinn-vinn: Folk som vil ut i arbeid, og bedrifter som treng kompetent arbeidskraft. Dette må vere gull for alle partar, seier han.
– Byggopp inspirerer
Også for fylkeskommunen, som driv dei offentlege vidaregåande skolane i Møre og Romsdal, er det gledeleg at Byggopp seier ja til å etablere opp mot 30 nye praksisplassar i faget betongfagarbeidar.
– Vi har mange nok søkarar til vidaregåande opplæring for vaksne, men det er ikkje nok praksisplassar i bedriftene. I åra framover blir det aukande kamp om fagfolk, og vi håpar at det Byggopp gjer med å satse tungt på å utdanne arbeidskrafta sjølv, kan inspirere andre i næringslivet til å gjere det same, seier rådgivar Gyrid Otnes Madsen i Møre og Romsdal fylkeskommune.
Les meir om vidaregåande opplæring for vaksne