Fylkeskommunedirektøren tilrår alternativ 1. Veglinjene i dei ulike alternativa som ligg føre no, er prinsippskisser.
Møre og Romsdal fylkeskommune
Saka skal først behandlast i samferdselsutvalet, før ho går vidare til fylkesutvalet og for endeleg avgjerd i fylkestinget.
Dagens Remøybru har omfattande skadar i berande element, og det er sett i verk strakstiltak for å redusere belastninga. Brua har no redusert bruksklasse, og noko av tungtransporten treng dispensasjon for å køyre over. For å sikre framkome og beredskap, hastar det å få på plass reguleringsplan for ny bru.
Tre alternativ vurderte
Fylkeskommunen har vurdert tre traséar:
- Alternativ 1: Gjenbruk av dagens trasé
- Alternativ 2: Ny trasé via Remøyholmen
- Alternativ 8: Ny trasé ytst på Remøyholmen
Kostnadsanslaga viser at alternativ 1 og 2 ligg på om lag same nivå (892 og 881 mill. kroner), medan alternativ 8 er vesentleg dyrare (962 mill. kroner). Alternativ 8 gir òg størst inngrep i natur og høgast klimagassutslepp.
Kvifor alternativ 1
Det er naturleg at traséval for veganlegg engasjerer breitt. Fylkeskommunedirektøren legg stor vekt på at alle involverte skal kjenne seg høyrde, sette og inkluderte. For å sikre god medverknad er det gjennomført ei rekke tiltak, mellom anna folkemøte, dialogmøte og synfaringar med råka partar.
Fylkeskommunedirektøren meiner at alternativ 1 best ivaretar balansen mellom alle interesse som er involverte i saka, og meiner gjenbruk av dagens trasé gir best balanse mellom kostnad, miljø og framdrift:
- Mogleggjer tidleg riving av eksisterande bru, noko som reduserer risikoen knytt til dagens dårlege tilstand.
- Minst inngrep i nye naturområde og lågare klimagassutslepp.
- Best føresetnader for å halde framdriftsplanen, sidan traséen er i tråd med gjeldande kommuneplan.
Seglingshøgde kan bli redusert
Det blir òg tilrådd å arbeide vidare med å redusere seglingshøgda på brua for å kutte kostnader, klimagassutslepp og inngrep i nærmiljøet. Ei lågare bru vil òg gi kortare byggetid og betre tilpassing til landskapet.
Med noverande plan skal reguleringsplanen vere ferdig i 2028, bygging starte i 2030 og ny bru stå klar i 2033.
På mrfylke.no kan du lese møteinnkalling, saksliste og saksframlegg for samferdselsutvalet 17. september.