Saka skal opp i utbyggingsutvalet for bygg- og vegsaker 28. februar, og samferdselsutvalet 13. mars.
Frå ferjestrekninga Brattvåg-Dryna
Møre og Romsdal fylkeskommune
Brattvåg og Dryna ferjekaier er i dårleg stand, og levetida for ferjekaiene nærmar seg slutten. Det er sett av 170 millionar kroner i gjeldande økonomiplan 2024 - 2027 til bygging av nye ferjekaier i sambandet.
I prosjektdefinisjonen som var lagt fram for utbyggingsutvalet for bygg- og vegsaker i 2023 står det:
«Målet for prosjektet er å legge til rette for eit føreseieleg og trafikksikkert ferjesamband, ved å bygge funksjonelle ferjekaier med nøktern standard, som har tilstrekkeleg kapasitet».
Dryna ferjekai
Dryna ferjekai er bygd i 1980, men har hatt fleire delutbetringar sidan den gong. Delar av ferjekaia er i grei stand som gjer at forprosjektet konkluderer med å bytte ut delar av ferjekaia, og endra oppmerking for oppstillingsfelt og parkering. Ved å bygge rundt eksisterande konstruksjonar kan trafikken gå nesten som normalt i byggeperioden, men med kortare stengeperiodar.
Brattvåg ferjekai
Brattvåg ferjekai er bygd i fleire trinn, der den eldste delen er frå 1968. Her har kaia i 2026 gått utover si levetid og i vedlagt forprosjektrapport konkluderer ein med å bygge ny komplett ferjekai. Det er i forprosjektet sett på fem alternative plasseringar. Fylkeskommunedirektøren tilrår at det blir bygd ny kai nord for dagens plassering, men bruk av ei smal stålkai og mindre endringar på parkering og biloppstillingsplassar. Det er anteke at bygginga kan gå føre seg samstundes som at ferjedrifta er operativ.
Tilrådinga er gjort med grunnlag i ei totalvurdering, der kostnader og konsekvensar for klima/miljø veg tyngst.
Møre og Romsdal fylkeskommune reknar med det vil ta minimum 9 månader til prosjektering av begge kaiene, inkludert byggesak, kontroll og godkjenning i Vegdirektoratet. Utlysing av konkurranse vil då kunne skje mot slutten av 2024. Om vedteke løysing er i tråd med innstillinga, er byggetida estimert til om lag 12 månader. Nye kaier kan då stå klare i slutten av 2026.
Her kan du lese alle sakspapira.