Årets bedrift 2025: Sula Vekst var tysdag i fylkestinget for å motta prisen Årets bedrift 2025. Frå venstre Rune Alnes, Mona Nesvik og Kurt Espen Juliebø frå Sula Vekst, utvalsleiar Geir Stenseth, dagelg leiar i Sula Vekst Øyvind Vebenstad og fylkesordførar Anders Riise.
Per-Kristian Bratteng
Dagleg leiar Øyvind Vebenstad tok imot prisen saman med Kurt Espen Juliebø, Rune Alnes og Mona Nesvik. I takketalen understreka Vebenstad at menneska står i sentrum for verksemda.
– Vi skal bygge menneske – gjennom mennesket skaper vi gode varer og tenester, sa han, og la til: – Det er ganske utruleg at dei som har blitt «avskilta» får bli med på ei slik reise.
– Handlar om menneske
Det er kompetanse- og næringsutvalet som står bak kåringa, og verksemda blir heidra for å kombinere profesjonell drift med eit sterkt inkluderingsoppdrag .
Prisen vart overrekt av Geir Stenseth, leiar i kompetanse- og næringsutvalet. I talen under utdelinga peika han på at Sula Vekst viser eit breitt syn på verdiskaping.
– Årets pris går til ei verksemd som på ein imponerande måte viser at verdiskaping ikkje berre handlar om tal og resultat – men også om menneske, moglegheiter og ansvar, sa Stenseth .
Stor aktivitet
Sula Vekst har aktivitet innan mellom anna vaskeri, søm og segl, maritim og mekanisk produksjon, samt miljø- og brenseltenester. Verksemda omset for om lag 30 mill. kroner, utan å ha eiga salsavdeling. Strategien er mellom anna å vere ei foregangsbedrift innan tilrettelagt arbeid i Noreg.
Ifølge dagleg leiar Øyvind Vebenstad handlar arbeidet også om meir enn produksjon og økonomi.
– Vi bygger stoltheit, identitet og meistring kvar dag. Vi er ein utruleg stolt bedrift, sa han.
Prisen Årets bedrift skal motivere og inspirere næringslivet i Møre og Romsdal til innsats for samfunnet, og blir delt ut årleg av fylkeskommunen.