Tahitibrygga i Kristiansund fotografert i november 2023.
Ingvild Dverseth Sæter
Ein heilskapleg tilstandsrapport vil stadfeste bygninga si tilstand, foreslå tiltak og er viktig for den vidare forvaltninga av Tahitibrygga.
Fredag løyvde Møre og Romsdal fylkeskommune inntil 175.000 kroner til Øyehaug Eiendom AS for å utarbeide ein tilstandsrapport med tiltaksplan, prioritering av strakstiltak og kostnadsoverslag for Tahitibrygga. Handverkarane som dei vil bruke til å gjere jobben, har mange års erfaring med å gi nytt liv til liknande brygger langs Nidelva i Trondheim.
Tahitibrygga, også kjent som Otterleibrygga, er ein fem etasjar stolpebrygge bygd som saltlager i 1890 av Jonas Eriksen. Brygga er eit landemerke i Kristiansund.
Bygninga har høg arkitektur- og kulturhistorisk verdi som ei bevart stolpebrygge frå ca. 1890 og som del av det einaste bevarte «kjøpmannstunet» i Kristiansund. Dette tunet, som er kjent som Wirumgården, består av eit tilbaketrukket våningshus og med eit pakkhus på kvar side, kor Tahitibrygga er eitt av desse. Tahitibrygga er eit sentralt element i det eldste bevarte bymiljøet i Kristiansund, med røter tilbake til 1600-tallet. Tahitibrygga og området er gitt nasjonal verneverdi av Riksantikvaren og formidlar Kristiansund si storleikstid innan internasjonal handel og grunnlaget for byen sin posisjon innan maritim sektor.
Tahitibrygga er eigd av eit føretak som no er konkurs. Bustyrar i konkursbuet vil at andre skal overta eigarskapet til brygga. Det er enno uklart kva som vil skje med eigarskapet.
I vedtaksbrevet til Øyehaug Eiendom AS skriv fylkeskommunedirektøren at forsking viser at framleis bruk og tilpassa ombruk av eksisterande bygningar er eit viktig bidrag for å redusere utslepp av klimagassar frå byggesektoren. Ved å forlenge bygningar si levetid, blir ressursane utnytta betre, då utsleppa knytt til bygging allereie har funne stad.
«I stortingsmeldinga om kulturmiljøfeltet er ombruk av bygningar peikt på som eitt av fleire verkemiddel. Dette kjem i tillegg til kulturhistoriske, estetiske og arkitektoniske kvalitetar, som er viktige for stadidentiteten og for å skape gode nærmiljø», heiter det i brevet.