I dag blir kunnskapsgrunnlaget om ny skole- og tilbodsstruktur lagt fram.
Olsi Simoni / Møre og Romsdal fylkeskommune
Kunnskapsgrunnlaget består av eit høyringsdokument og fem delrapportar. Høyringsdokumentet inneheld forslag til tiltak og tiltak for vidare utgreiing.
Fylkeskommunedirektør Toril Hovdenak inviterer innbyggarane til å kome med sine meiningar, for å få eit meir utfyllande bilde.
– Eg oppmodar folk om å delta i høyringa og vere med å påverke saka, slik at vi har innbyggarane sine meiningar med oss når saka skal til politisk behandling. Etter høyringsfristen 1. september vil vi gå gjennom svara som vi har fått og starte arbeidet med å lage ei politisk sak, som fylkestinget 9.-10. desember skal gjere vedtak i, seier fylkeskommunedirektøren.
Grunn for å foreslå endringar
Møre og Romsdal fylkeskommune driftar 20 vidaregåande skolar i 16 kommunar, har cirka 1.700 tilsette og nesten 9.000 elevar. Men talet på elevar går dramatisk ned dei neste 15 åra, og det påverkar inntektene.
– Endring i talet på innbyggarar i aldersgruppa 16-18 år vil påverke dei frie inntektene til fylkeskommunane. Når elevtalet går ned dei neste 15 åra med 1.718 elevar frå i dag, vil Møre og Romsdal fylkeskommune i 2040 – basert på dagens inntektssystem – få 377 mill. kroner mindre i frie inntekter enn i dag. Då har vi alle eit felles ansvar for å sikre at den vidaregåande opplæringa er tilpassa framtidige generasjonar, seier fylkeskommunedirektøren.
Tilsvarar to store skolar
For å sette nedgangen i elevtal og inntekter i perspektiv:
- Svikten på 1.718 elevar tilsvarar omtrentleg elevtalet ved to store skolar (Kristiansund vgs 753 elevar, Romsdal vgs. 871 elevar, Borgund vgs 923 elevar), eller det samla elevtalet ved dei ni minste skolane i fylket, som har 1.743 elevar.
- 377 mill. kr mindre i overføringar frå staten tilsvarar drift av rundt 150 skoleklassar.
– Når elevkulla blir mindre, kan vi ikkje drifte skolane slik som i dag. Vi må ta grep. Korleis vi skal gjere det, vil vi ha innspel til frå innbyggarane i fylket, seier fylkeskommunedirektør Toril Hovdenak.
Det var fylkestinget som i desember 2024 vedtok at arbeidet med å utgreie ein ny skole- og tilbodsstruktur kan starte.
På mrfylke.no/skolestruktur kan du lese meir om saka. Der kan du også delta i høyringa.