Fv. 5829 Otterdalsstranda i Volda kommune.
Anne Marit Øksenvåg Johansen
Studien skal sjå nærare på om tunnel er einaste realistiske løysing for å sikre den rasutsette strekninga, eller om det likevel er mogleg å auke tryggleiken på nokre delar av strekninga. Det er dette fylkeskommunedirektøren meiner må undersøkast nærare.
Saka skal til politisk behandling i samferdselsutvalet 17. september, deretter til fylkesutvalet, før fylkestinget gjer endeleg vedtak.
Låg trafikk, høg skredfare
Otterdalsstranda har høg skredfare og låg trafikk, men omfattande rassikringsbehov over 2,5 km. Tidlegare vurderingar frå 2011, 2012 og 2023 konkluderer med at fysiske tiltak som fjellreinsk og fanggjerde er for risikable å gjennomføre, både med tanke på tryggleik og HMS. Tunnel er derfor peika ut som det mest aktuelle tiltaket.
Moglegheitsstudien skal kartleggje moglege løysingar og vurdere kost/nytte, levetid og tryggleik. Studien er kostnadsestimert til 2 millionar kroner og er foreslått innarbeidd i økonomiplanen for 2026–2029.
Varslingssystem
Fylkeskommunedirektøren vurderer at det først og fremst er aktuelt å undersøke nybrottsarbeid på varslingssystem som kan nyttast på strekninga.
– I ein moglegheitsstudie må ein likevel vere open for at ein i dialog med kompetent skredsikringsmiljø kan finne alternative måtar å arbeide i fjellsida, utan at risikoen for arbeidarane blir for stor, går det fram av saksframlegget.
Otterdalsstranda er prioritert som nummer fire i det reviderte investeringsprogrammet for skredsikring i perioden 2026–2035. Dersom tunnel blir vurdert som einaste løysing, vil det krevje store investeringar – dagens estimat er på 700 millionar kroner i 2020-verdi.
På mrfylke.no kan du lese møteinnkalling, saksliste og saksframlegg for samferdselsutvalet 17. september.