Søk om løyve til akvakultur

Søknadsskjema

Søknadar for laks, aure og regnbogeaure i sjø skal fremmast via «Min side». Det same gjeld søknader for andre artar. Søknadar om settefiskanlegg skal også søkast om på «Min side».

På nettsida til Fiskeridirektoratet finn du «Min side» og demonstrasjonsskjema for ulike søknadstypar. Sida inneheld også hjelpetekstar.

Gebyr

Saksbehandlingsgebyret for å søke om akvakulturløyve er 27 560 kroner. Gebyret må vere betalt før søknaden blir behandla.

Dersom du søker om løyve til fangstbasert akvakultur eller fiskepark er gebyret på 6 890 kroner.

Endringar på lokaliteten som går utover gjeldande løyve, vil normalt innebere krav om ny søknad. I tillegg til saksbehandlingsgsgebyret vil det også bli kravd gebyr for saksbehandling etter forureiningsforskrifta. Statsforvaltaren vedtar kva gebyrsats som gjeld for kvar enkelt søknad.

Viser til gebyrforskrifta (lovdata.no)

Andre krav

Som søkar har du ansvar for at søknaden inneheld alle nødvendige opplysingar. Ufullstendige søknader forsinkar søknadsprosessen og kan bli returnert eller avvist. Saman med kommunen må søkar sørge for at søknaden blir lagt ut til offentleg ettersyn og kunngjort.

For landbaserte anlegg må søkar få løyve frå NVE til uttak av ferskvatn etter vassressurslova før søknaden blir sendt til fylkeskommunen.

Ta gjerne kontakt med ein av våre rådgivarar i forbindelse med utarbeiding av søknaden.

Fylkeskommunen kvalitetssikrar søknaden og sender den vidare til den aktuelle kommunen for offentleg ettersyn og kommunal uttale. Vi sender samtidig søknaden til sektormyndigheitene for behandling etter sektorregelverket.

Vi mottek kommunen sin uttale med eventuelle merknadar frå den offentlege høyringa, og sender desse til sektormyndigheitene før desse gjer sine vedtak og uttaler.

• Mattilsynet avgjer søknaden etter dyrehelsevelferdsregelverket og dyrehelseregelverket.
• Kystverket avgjer søknaden etter hamne- og farvasslova.
• Statsforvaltaren avgjer søknaden etter forureiningslova. Statsforvaltaren gir også uttale om naturvern-,- frilufts,- fiske- og viltinteresser.
• Fiskeridirektoratet gir uttale om tradisjonelle fiskeriinteresser og marint biologisk mangfald.

Fylkeskommunen gjer ei samla vurdering om å gi løyve eller avslag etter akvakulturlova, basert på vedtak og uttaler frå sektormyndigheitene og kommunen.

Tidsfristane for behandling av akvakultursøknader er regulert i ei eiga forskrift (lovdata.no).

Saksbehandlingstid

Akvakultursøknaden skal vere ferdig behandla innan 22 veker. Ein føresetnad er at:

• Vi mottar komplett søknad.
• Dei ulike sektormyndigheitene og kommunen held fristane sine.
• Vedtaket til sektormyndigheitene ikkje er klaga på.

Sjå Forskirft om samordning og tidsfrister i behandlingen av akvakultursøknader (lovdata.no)

Ønsker du å klage på fylkeskommunen sitt vedtak om løyve eller avslag på akvakultursøknaden, send den først til oss.

• Fylkeskommunen vurderer først om du har rett på å få klagen behandla.
• Fylkeskommunen behandlar klagen.
• Dersom fylkeskommunen opprettheld sitt vedtak, vil klagen bli sendt vidare til Fiskeridirektoratet for klagebehandling.
• Fiskeridirektoratet behandlar klagen og fattar endeleg vedtak som ein ikkje kan klaga på.

Fylkeskommunen er tildelingsmyndigheit, og ikkje tilsynsmyndigheit.

Det er Fiskeridirektoratet, Mattilsynet og Statsforvaltaren som driv tilsyn med akvakulturnæringa.

Vi oppfordrar akvakulturnæringa og næringslivet generelt til å involvere seg i kommunane si arealplanlegging i sjø og andre planar som omfattar næringsutvikling, blant anna gjennom å gi innspel i høyringar.

Som fylkeskommune har vi myndigheit til å gi motsegn på kommunane sine arealplanar dersom desse strir mot akvakulturinteressene.