Nyheitsbrev om plan

Kommunestatistikken

Møre og Romsdal fylkeskommune har publisert ein oppdatert versjon av Kommunestatistikken. Blant temaa som er oppdaterte, er gjennomføring i vidaregåande opplæring, utdanningsnivået i befolkninga og temaet utanforskap med fokus på ungdom. I tillegg til dette er statistikk knytt til bustadmarknaden og areal oppdatert.

Søk om millionar til miljøprosjekt i din kommune no!

Miljødirektoratet har lansert fleire tilskotsordningar som kan hjelpe kommunane med å redusere klimagassutslepp, bevare naturmangfaldet og tilpasse seg klimaendringar. Statsforvaltaren har samla oversikt over tilskotsordningane på nettsidene sine og oppmodar alle kommunane i Møre og Romsdal til å søkje om desse midlane for å bidra til ei berekraftig framtid. Her ligg mellom anna informasjon om Klimasatsordninga, som mange kommunar tidlegare har nytta seg av.

Samlar rettleiing til kommunane på ein stad

Miljødirektoratet har samla all rettleiing til kommunane på ein stad. Her finn saksbehandlarar rettleiing i miljøregelverket og miljøomsyn i plan. Du kan også abonnere på nyheiter frå denne sida.

Meir regionalt samarbeid om arealforvaltning

Grønt Industriløft Møre og Romsdal er eit strategisk samarbeidsprosjekt leia av Innovasjon Norge og Møre og Romsdal fylkeskommune.

Prosjektet har som mål å 

• styrke grøne og sirkulære prosjekt med stort vekst- og skaleringspotensial
• vere ein katalysator for framvekst av grøne verdikjeder på tvers av sektorar
• akselerere den grøne omstillinga i næringslivet i Møre og Romsdal

Arealmessige utfordringar er eitt av kapitla i kunnskapsgrunnlaget for Grønt industriløft.  Rapporten peikar på meir regionalt samarbeid om arealforvaltning. Du kan lese meir på Møre og Romsdal fylkeskommune sine nettsider.

Ny publikasjon om universell utforming

Universell Utforming AS har utarbeidd ein publikasjon med eksempel på korleis universell utforming kan følgast opp i kommunal arealplanlegging og som blant anna gjer greie for omgrepsbruk og relevante krav.

Målet med publikasjonen «Universell utforming i kommunal arealplanlegging – refleksjonar, råd og utdrag av krav» er å styrke kompetansen om korleis ein kan ivareta universell utforming i planleggingsarbeid, å bidra til at fleire kommuner forankrar universell utforming i sitt planverk og å trekke frem reglar i byggteknisk forskrift (TEK) som det er spesielt relevant å kjenne til i planlegging.

Bustader og bustadanalysar

Rogaland fylkeskommune har utarbeidd ein rettleiar for kunnskapsgrunnlag for berekraftig bustadforsyning i kommunane. Vista Analyse driv elles og utviklar ein ny bustadbehovsmodul i Pandamodellen. Prosjektet er støtta frå KDD, og målet er eit verktøy som kan hjelpe med å svare ut nye statlege forventningar om at fylkeskommunane gjer regionale bustadanalysar. Modulen skal vere klar til lansering innan utgangen av februar.

Læring for næring

Korleis kan kommunen arbeide med næringsutvikling i kommunestyreperioden 2024 - 2027? Korleis jobbe politisk i mellomvalperioden? For å hjelpe til med å svare på desse spørsmåla, tilbyr KS utviklingsnettverket «Læring for næring» i 2025. Nettverket er utvikla av KS i samarbeid med Møre og Romsdal fylkeskommune og Bærekraftsløftet Møre og Romsdal. Eit nettverk av åtte kommunar i fylket vårt avslutta nyleg sitt arbeid som pågjekk gjennom 2024. Påmeldingsfristen for å vere med i det nye nettverket er 8. januar 2025. Du finn meir informasjon på KS sine nettsider.

Oppdateringer i konsekvensutredning av kulturmiljø

Riksantikvaren har oppdatert handboka i metode for konsekvensutgreiing av kulturmiljø. Denne håndboka viser korleis dei ulike klima- og miljøtemaa skal kartleggast og utgreiast i ei konsekvensutgreiing av reguleringsplanar og tiltak.

Ny rettleiar om unntak frå krav i TEK17

Tekniske krav til byggverk kan vere utfordrande når ein skal bygge om eksisterande bygningar. Endringar i plan- og bygningslova paragraf 31-4 har gjort det enklare å få unntak frå krava i byggteknisk forskrift (TEK17). Riksantikvaren har laga ein ny rettleiar om å søke unntak.

Datoar for regionalt planforum 2025

Vi minner om regionalt planforum. Planforumet skal drøfte konkrete plansaker, utveksle informasjon og avklare konkrete spørsmål og sektorinteresser. Alle kommuneplanar som skal rullerast bør leggast fram i regionalt planforum. Også kommunale planstrategiar, interkommunale planar, enkelte kommunedelplanar og større reguleringsplanar vil vere aktuelle å ta opp.

Datoane for 2025 er:

·         15.01

·         05.02

·         05.03

·         02.04

·         07.05

·         04.06

Møta kan avviklast fysisk på Fylkeshuset i Molde eller på Teams.

Nye statlege planretningslinjer for klima og energi – og for arealbruk og mobilitet

I desember 2024 vart det vedteke endringar i dei to statlege planrettleiingslinjer (SPR) for klima og energi og for arealbruk og mobilitet.

Dei nye retningslinjene for klima og energi gir tydelegare føringar og skal bidra til at Noreg når klimamåla. Dei er meir detaljerte og spesifikke enn dei gamle. Kommunane skal no innarbeide mål, tiltak og verkemiddel for klima- og energiarbeidet i samfunnsplanlegginga, i tillegg til å arbeide for nullutslepp i si eiga verksemd. Det er også sterkare føringar for ikkje å bygge ned karbonrike areal og fritidsbustader skal ikkje byggast over skoggrensa eller på myr.

Formålet med retningslinjene for arealbruk og mobilitet er å sikre ei samordna og berekraftig bustad-, areal- og transportplanlegging og bidra til meir effektive planprosessar. Regjeringa vil legge betre til rette for bustadbygging i heile landet, samt god mobilitet og mindre transportbehov i byområda.

Vi rår til å sjå webinaret frå Miljødirektoratet om dei nye retningslinjene for klima og arealbruk og kva dette har å seie for kommunane sitt planarbeid.

Ny fagleiar i planseksjonen i fylkeskommunen

Björn Gregull er tilsett som ny fagleiar i planseksjonen i fylkeskommunen etter at Johnny Loen vart pensjonist i slutten av juni 2024. Han byrja i stillinga 1. mars 2025 og kjem frå jobben som seniorrådgiver for plan i Molde kommune.

Samling for nye planleggarar

Fylkeskommunen inviterer til samling for nye planleggarar i kommunane torsdag 22. mai klokka 11-15.30 i Molde. Her får du moglegheit til å bli betre kjent med Møre og Romsdal Fylkeskommune og Statsforvaltaren i Møre og Romsdal. Du vil også kunne knytte verdifulle kontaktar med andre planleggjarar frå heile fylket. Andre som kan ha nytte av samlinga og jobbar inn mot planlegging, eller byggesak er også velkomne til å vere med.

Gled deg til å utforske den nye sjøfronten og få høyre om sentrumssatsinga i Molde når vi tek lunsjen ved fjorden! Meld deg på via fylkeskommunen sine nettsider.

Kart over naturskog skal vidareutviklast

I januar 2025 blei første versjon av kart over naturskog lansert. Miljødirektoratet og Landbruksdirektoratet har samarbeidd om etableringa, og kartet er utvikla av leiande forskingsmiljø på fagfeltet.

Kart over naturskog har gitt oss eit forbetra kunnskapsgrunnlag for naturskog i Noreg, men det er eit klart behov for å forbetre kartet. Miljødirektoratet og Landbruksdirektoratet har derfor fått i oppdrag frå Klima- og miljødepartementet og Landbruks- og matdepartementet å vidareutvikle kart over naturskog. Arbeidet skal skje over to år, i 2025 og 2026.

Utgreiing om ny kulturmiljølov

Kulturmiljølovutvalet kjem i NOU 2025:3 med eit framlegg til ny lov om kulturmiljø. Utvalet føreslår i stor grad å vidareføre dagens reglar, men føreslår mellom anna å flytte grensa for automatisk freding nærare fram i tid. Fredingsheimlane blir samla til ei felles føresegn, og utvida til òg å gjelde lause kulturminne, og transportminne, som bilar, fly, tog og andre framkomstmiddel. Utvalet føreslår òg ny heimel for fylkeskommunen og Sametinget til å vedta forenkla freding. I arbeidet med den nye kulturmiljølova har utvalet mellom anna lagt vekt på å utforme ei enklare og meir oversiktleg lov med fleire fleksible og felles føresegner.

Klimatiltak i kommunalt vass- og avløpsarbeid

Kommunar kan gjere mykje for å redusere klimagassutslepp i vass- og avløpsprosjekt. På Miljødirektoratet sitt webinar 6. mai kan du høyre korleis Drammen og Asker arbeider systematisk med å kutte klimagassutslepp frå vass- og avløpsarbeid.

Drammen kommune jobbar blant anna med:

• systematisk klimaarbeid på alle nivå i vass- og avløpsverksemda
• å kartlegge moglege tiltak i ulike V/A-, veg- og avløpstransportprosjekt
• å kjøpe inn fossilfrie røyr og kartlegge klimavennlege materialval

Vassmiljø i arealplanlegginga

Korleis kan kommunar bruke planarbeidet til å ta omsyn til vassmiljøet i elv, innsjø og kystvatn? I eit webinar som Miljødirektoratet arrangerer 29. april vil det bli ei innføring i korleis vassmiljøet skal ivaretakast i kommunale arealplanar og i tråd med dei rammene som vassforskrifta set for arealplanlegginga. Kommunar og regional forvaltning bidreg med gode erfaringar.

Kunnskapsarena for klima og natur

Vi har nemnd nokre av Miljødirektoratet sine webinar. Full oversikt finn du på Miljødirektoratet sin kunnskapsarena for klima og natur i planlegging der det er fleire viktige webinar utover våren. Miljødirektoratet har også lansert ny nettside med oversikt over mogleg klimatiltak, barrierar og verkemiddel. 

 

Verktøy for klimatilpassing og naturbaserte løysingar 

SINTEF har lansert VERBENA, eit nettbasert verktøy som hjelper kommunar i arbeidet med klimatilpassing og naturbaserte løysingar. Plattformen er gratis å bruke og tilgjengeleg for alle. VERBENA består av fire verktøy:

• MÅLE er ei indikatorbasert vurdering av arbeidet med klimatilpassing i kommunen.
• VEILEDE inneheld sjekklister for klimatilpassing i kommunale planar, i plan- og byggeprosjekt.
• ANALYSERE er eit verktøy for å vurdere ulike naturbaserte løysingar og tradisjonelle løysingar for overvasshandtering.
• LÆRE er ei samling faktaark av dei mest vanlege naturbaserte løysingane for overvasshandtering i urbane område.

Rammeverk for nullutsleppsområde skal hjelpe kommunar

Standard Norge har sendt ut eit rammeverk for nullutsleppsområde på høyring. Rammeverket gjeld geografisk avgrensa område med bygningar, infrastruktur og landskap der målet er å kutte klimagassutslepp heilt ned til null og er eigna for både nye utbyggingsområde og ombygging av eksisterande område. Rammeverket kan hjelpe kommunar, utviklarar og rådgjevarar med å stille tydelege krav og følgje opp utslepp gjennom heile prosjektet. Rammeverket legg til rette for betre planlegging, styring og samarbeid mellom ulike aktørar. Rammeverket kan vere nyttig for dei som jobbar med områdeutvikling, klima og planlegging.  Du kan lese dokumentet og gi innspel her: Høringsinnspill til SN-NSPEK 3719 Nullutslippsområder. Høyringsfristen er 10. april. Du må lage ein brukar (gratis) for å få tilgang til dokumentet.

Ny rapport frå Kartverket

Kartverket overleverte fredag 28. februar sin første statusrapport for kart- og kartdata om tryggleik og beredskap. Rapporten kjem med tilrådingar om korleis vi kan styrke beredskapen med gode kartdata og auke nytteverdien av systema for innsamling og deling av kartdata.

Rapport om manglande bustadbygging

Oslo Economics har på oppdrag frå Kommunal- og distriktsdepartementet undersøkt omfang og grunnar til manglande utbygging av tomter til bustadføremål.

Rapport om tidsbruk i planprosessar

På oppdrag frå Kommunal- og distriktsdepartementet har Asplan Viak, i samarbeid med By- og regionforskningsinstituttet (NIBR) ved Oslo Met og Universitet i Bergen, kartlagt tidsbruken i bustadprosjekt. Rapporten gir svar på kvifor saksbehandlingstida aukar og kjem med forslag til tiltak for å redusere saksbehandlingstida.

Frukostwebinar 8. mai: Kunst som utviklingskraft 

Korleis kan kunst og kunstnarar bidra når vi planlegg framtidas tettstader og byar? Fleire kommunar rundt i landet utforskar og har ei sterk interesse for å gjere kunstnarsamarbeid til eit viktig element i sine stadutviklingsprosjekt. Kunst skal ikkje lenger vere berre vere pynten på kaka, men ei utviklingskraft. Men korleis får vi det til? Korleis kan kunstnarar samarbeide med planleggarar og ha ein rolle i dette arbeidet?

I dette webinaret vil vi sjå på korleis kunst kan vere ei utviklingskraft i stadutvikling. Meld deg på her: Frukostwebinar: Kunst som utviklingskraft - Møre og Romsdal fylkeskommune

BU+STAD 12.-13. juni

Program for berekraftig by- og tettstadutvikling arrangerer BU+STAD; by- og tettstadseminaret 2025, i Ulsteinvik 12.-13. juni. Vi arrangerer i samarbeid med Ulstein kommune, Ulstein Næringsforum, DOGA og Husbanken. Målgruppe er kommunar, utbyggarar, næringsaktørar og andre som er interesserte i by- og stadutvikling.

Programmet er straks klart og blir publisert dei næraste dagane. Informasjon om arrangementet og påmelding her: By- og tettstadseminar 2025 - Møre og Romsdal fylkeskommune

Samling om plan og klima

Statsforvaltaren og fylkeskommunen inviterer til samling om plan og klima 1. oktober 2025. Invitasjonen går til tilsette i kommunane som arbeider med planlegging og klimaarbeid. Viktige tema blir handlingsrommet i høve til naturomsyn og miljø, konsekvensutgreiingar, nye planretningslinjer for klima og energi og nye planretningslinjer for areal og mobilitet. Ein representant frå Holth & Winge, eit advokatfirma som har spesialisert seg i plan- og bygningsrett, vil vere forelesar på samlinga. I år arrangerer vi ikkje den tradisjonelle todagarskonferansen for planleggarar.

Fleire opplysningar med høve til påmelding kjem over sommaren. 

Tilbod om karbonkart, klimagasskalkulator og opplæring

Møre og Romsdal fylkeskommune har saman med Kartverket fått Klimasatsstøtte til å gjennomføre eit kompetansehevande prosjekt for kommunane om kart, arealrekneskap og klimagassutslepp (KAK). Bruk av arealrekneskap og berekning av klimagassutslepp/-opptak knytt til bruken av areal har potensial til å fremje ei meir klimavennleg planlegging. Til dette treng kommunane verktøy, oversikt over karbonrike areal og planar som er vektoriserte/digitaliserte (slik at dei kan bli brukt i verktøy som arealrekneskap og klimagasskalkulator). Vi har kjøpt tenester frå NIBIO som både skal lage kart over karbonrike areal og gjere klimagasskalkulatoren for arealbrukssektoren tilgjengeleg for alle kommunane i Møre og Romsdal, samt gje opplæring. Alle kommunane i Møre og Romsdal vil bli inviterte til å delta i prosjektet. Opplæring vil bli gitt gjennom webinar og ein fysisk arbeidsverkstad i kvar av våre fire regionar. Invitasjon er sendt ut. Du kan lese meir på fylkeskommunen sine nettsider.

Plannettverk i haust

Fylkeskommunen tek sikte på å skape meir aktivitet i dei regionale plannettverka frå hausten av. Meir informasjon vil komme seinare. Vi arrangerte samling for nye planleggarar i mai og vi vil arrangere ei tilsvarande samling neste år dersom det er behov.

Midlar til kulturmiljøarbeid

Seks kommunar i Møre og Romsdal har fått tildelt midlar frå Riksantikvaren til arbeid med kulturmiljøplanar, risiko- og sårbarheitsanalysar og beredskapsplanar for kulturmiljø.

Herøy, Hareid, Sula, Stranda, Fjord og Ålesund har søkt og fått innvilga midler til arbeidet i år. Møre og Romsdal er det fylket som har fått tildelt nest mest midlar i år, til saman 1 million kroner, som er fordelt mellom kommunane og fylkeskommunen.  Du kan lese meir om tildelinga på Riksantikvaren sine heimesider. 

Har du trua artar i nabolaget?

Miljødirektoratets nye kart viser kvar i Noreg vi ventar å finne flest trua artar, såkalla «hotspottar» for trua artar. Karta er bygde på 35 millionar artsregistreringar frå 1990–2024, for over 7700 artar. Over 88 000 personar/institusjonar har bidrege med data.

Karta vil hjelpe kommunane med å ta vare på natur. Karta viser at mange av områda med flest trua artar ligg i område som ikkje er verna.

Mange kommunar tek grep om naturmangfaldet

44 prosent av kommunane i Noreg har ein plan for å ta vare på naturmangfaldet – anten under arbeid eller ferdigstilt. Tilskotsordninga «Natursats» gir kommunar støtte til å lage kommunedelplanar som kartlegg naturverdiar og gir betre grunnlag for avgjerder om arealbruk. Nesten halvparten av kommunane i Noreg lagar eller har laga ein slik plan. I 2025 får 32 kommunar støtte til å utarbeide kommunedelplanar for naturmangfald, og 43 kommunar får midlar til å oppdatere gamle arealplanar.

Aure og Smøla signerte bygdevekstavtale

Aure og Smøla har signert regionens første bygdevekstavtale med Kommunal- og distriktsdepartementet og Møre og Romsdal fylkeskommune. Bygdevekstavtale er eit verkemiddel som skal bidra til busetting, tilgang på kompetent arbeidskraft og framtidsretta næringsutvikling i dei minst sentrale delane av distrikts-Noreg. Aure og Smøla har som mål å utvikle attraktive og levande tettstader, med fokus på sosial berekraft, møteplassar og bustadbygging. Dei ønsker også å utvikle nye samarbeidsformer for arealforvaltning og krafttilgang, samt utforske løysingar for betre mobilitet og kvardagslogistikk. Dei har med seg et sterkt lag med blant andre Husbanken, Statsforvaltaren og Distriktssenteret.

Integrering i kommunal planlegging

Vi minner om at fylkeskommunen har utarbeidd eit dokument som skal bidra til at det skal bli lettare for kommunane å inkludere innvandrarbefolkninga i kommunal planlegging. Her finn du stoff om mellom anna lovgrunnlag, medverknad, folkehelse, kultur og frivilligheit. Dokumentet ligg på fylkeskommunen si nettside.

Korleis merke og tilrettelegge kyststiar?

Firmaet Holth & Winge har på oppdrag frå Buskerud fylkeskommune utarbeidd eit juridisk grunnlag for rettleiing til kommunane om merking og tilrettelegging av kyststiar. Ei ny juridisk utgreiing vil vere til hjelp for kommunane i arbeidet med etablering av kyststiar i strandsona og andre stiar for ålmenta. Utgreiinga gir ei grundig vurdering av kommunane si tilgang til å merke stiar i utmark, og ser særleg på kva for juridiske rammer som gjeld når stien går nær busetnader eller gjennom område med usikker grense mellom innmark og utmark. Den gir også praktiske tilrådingar for korleis kommunane kan gå fram i planlegginga av kyststiar.

Oppdatering av retningslinjer

Klima- og miljødepartementet har oppdatert retningslinjene for korleis viktige klima- og miljøinteresser skal takast vare på i arealplanlegging. I det oppdaterte rundskrivet (T-2/16) til Statsforvaltaren, fylkeskommunane og Sametinget gir departementet eit meir tydeleg grunnlag for når miljøforvaltninga kan gå mot planar om utbygging.

Om slike saker ikkje vert løyst lokalt, skal dei løftast til Kommunal- og distriktsdepartementet for endeleg avgjersle. Målet med rundskrivet er å sikre ein einskapleg forvaltningspraksis og at nasjonale og vesentlege regionale klima- og miljøinteresser blir godt ivaretatt i arealplanlegginga.

Nytt e-læringskurs

Bufdir lanserte denne våren eit nytt e-læringskurs om oppfølging og koordinering av arbeid med likestilling, mangfald og menneskerettar. Målgruppa for kurset er tilsette som har fått ansvar for å koordinere eller følge opp arbeidet med likestilling, mangfald, menneskerettar (inkludert CRPD) eller sosial berekraft i ein kommune, fylkeskommune eller andre delar av offentleg sektor. Kurset gir konkrete verktøy og eksempel på korleis arbeidet kan forankrast og følgast opp på tvers av fagområde og sektorar. Kurset er tilgjengeleg på Bufdirs kursplattform og på KS-læring.

FN sine berekraftmål i fylkeskommunal og kommunal planlegging

Rapporten «FNs bærekraftsmål i kommunal og fylkeskommunal planlegging – hvorfor og hvordan» er utarbeidd av Bærekraftsnettverket. Nettverket består av kommunar og fylkeskommunar som saman med KS arbeider for å bidra til FNs berekraftsmål innan 2030. Medlemene tok utgangspunkt i sine erfaringar med berekraftsmåla, og deler sine beste praksisar i denne rapporten.

Den forklarer korleis kommunar og fylkeskommunar kan bruke berekraftsmåla som eit konkret verktøy i sitt planarbeid. Rapporten gir først ei innføring i kva berekraftsmåla er, og kvifor desse måla er relevante for lokal og regional planlegging. Deretter viser den til kva for føringar som alt finst i lover, forskrifter og nasjonale forventningar, og knyter dette opp mot kvifor og korleis berekraftsmåla kan vere ei nyttig støtte i planprosessane.

Oppdatert rettleiar

Rettleiaren om støy i arealplanlegging er oppdatert. Støyrettleiaren er utvida med eit nytt kapittel 10. Kapittelet inneheld informasjon om følgande kjelder: veg, bane, luftfart, industri, hamner, terminalar, skytebanar, motorsport og vindturbinar.  

I kapittelet er det lagt vekt på informasjon retta mot saksbehandlarar og publikum, og inneheld i mindre grad detaljerte rettleiingar knytt til utrekningar og målingar.

Korleis ta omsyn til klima og miljø i arealplanlegginga?

Utbyggingsprosjekt påverkar miljøet og samfunnet rundt oss. Med god planlegging kan vi ivareta naturområde og viktige klima- og miljøinteresser. Miljødirektoratet har samla informasjon på nettsida si om korleis vi kan ivareta klima- og miljøomsyn gjennom arealplanlegginga.

Nettsida gir eit oversyn over ulike verktøy som kan brukast for å ta miljøomsyn i arealplanlegginga. Her finst det både overordnede føringar for planlegging, eit oversyn over dei viktigaste miljøomsyna og juridiske verkemidla for å sikre miljøomsyn i arealplanar. Her er ein kort introduksjon til ulike miljøtema, med lenker til relevant faginnhald på Miljødirektoratet sine nettsider.

Nasjonal arkitekturstrategi – «Rom for kvalitet»

Regjeringa har nyleg lagt fram ein nasjonal arkitekturstrategi. Innsatsområda er

·         varierte nabolag

·         varsam ressursbruk

·         vakre omgjevnader

·         varige kvalitetar

Strategien er meint å vere eit startpunkt for vidare innsats og den skal bidra til inspirasjon og gje eit løft til alle som jobbar med å utvikle kvalitet i bygde omgjevnader.

Klimabudsjett

Vi reknar med at kommunane er godt i gang med budsjettprosessen til 2026 allereie. I år blir det ikkje ein felles arbeidsverkstad om klimabudsjett frå fylkeskommunen og Statsforvaltaren. Vi tek sikte på å kalle inn til eigne møte for dykk som har klimabudsjett og eitt for kommunar som enno ikkje har komme i gang. Vi kjem tilbake med meir informasjon om dette på eit seinare tidspunkt. Det er 18 kommunar som har utarbeidd klimabudsjett, ein kommune meir enn i fjor. Det er framleis ni kommunar som ikkje har budsjett.

Om ein vil sjå opptak av klimabudsjettwebinaret frå i fjor, finn ein det her: https://v.imgi.no/fbanv4za5m. Statsforvaltaren har ei nettside som er til hjelp for klimaarbeid i kommunane.

Berekraftkoordinatorar og tips på vegen mot klimabudsjett

Alle kommunane er tilknytt ein berekraftkoordinator som kan gje hjelp og støtte i arbeidet med til dømes klimabudsjett.

Søre Sunnmøre: Regine Solberg Aklestad: Regine.Solberg.Aklestad@volda.kommune.no

Nordre Sunnmøre: Margrete Emblemsvåg, margrete.emblemsvag@alesund.kommune.no

Romsdal: Ole Bertil Tveita Tingvoll, ole.tingvoll@molde.kommune.no eller Olena Klymenko: olena.klymenko@molde.kommune.no (i permisjon no)

Nordmøre: Rob Achterkamp: rob.achterkamp@tingvoll.kommune.no

De kan også kontakte Maria Laingen hos Statsforvaltaren: Maria.Laingen@statsforvalteren.no eller Ingeborg Simonsen, ingeborg.simonsen@mrfylke.no i Møre og Romsdal fylkeskommune.

Hjelpemiddel og nettsider for klimabudsjettering

Veileder for klimabudsjett som styringsverktøy (KS)

Beregne effekt av ulike klimatiltak (Miljødirektoratet)

Klimatiltak i Norge (Miljødirektoratet)

Klimagassregnskap for kommuner og fylker (Miljødirektoratet)

Klimabudsjettering steg for steg – handbok

klimabudsjettmal-002.docx – mal, klimabudsjett

Klima - Hjem – KS om klima

Klimatiltak i Norge: Kunnskapsgrunnlag 2025 - miljodirektoratet.no