5 Søvn
Dårleg søvn kan påverke lærlingen i arbeidet og kan også føre til fråvær.
Korleis kan dårleg søvn påverke lærlingen?
Ungdommar har større søvnbehov fordi søvnhormonet Melatonin blir skilt ut to timar seinare enn hos vaksne, og står lenger i systemet. Dette heng saman med alt som skjer i hjernen i denne perioden.
Samanlikna med barn og vaksne søv ungdommane djupare og har mindre draumesøvn og lett søvn. Ungdommane søv spesielt djupt om morgonen, noko som gjer at dei kan ha utfordringar med å stå opp. Det er normalt at ungdommane sovnar seinare på kvelden og vaknar seinare på morgonen. Ofte er det på kvelden dei har kontakt med venner, og for mange blir det mykje skjermtid på kvelden. Dette kan gi kortare søvn og dårlegare kvalitet på søvnen. Dette kan gi konsekvensar for hukommelse og læring og påverke psykisk helse negativt. Det kan gi auka risiko for depressive symptom og kognitive vanskar.
Kva kan du som arbeider med lærlingen gjere?
Du kan gi følgjande tips for betre søvn til lærlingen:
- Ikkje sov på dagen. Det gjer det vanskelegare å sove godt på natta.
- Dersom du grublar mykje på kvelden, prøv å skriv ned det du tenker på og gjer ein avtale med deg sjølv om at du skal sjå på det i morgon. Dersom du ikkje får sove fordi det er noko som gjer deg redd, kan det vere vanskeleg å finne ut av på eigenhand. Snakk med nokon du stolar på.
- Kva gjer at du slappar av i kropp og hovud? For nokon kan det vere å ha ein fast, koseleg dagdraum å sovne til, for andre kan det vere å løyse matteproblem eller høyre på ei lydbok eller musikk.
- Dersom du kjenner deg stressa i kroppen, kan du prøve å bruke pusten for å roe deg ned. Pust djupt og sakte inn og ut fleire gonger, mens du kjenner at du slappar av i musklane og at kroppen er tung mot madrassa.
- Energidrikk, kaffe, cola og nokre typar te inneheld koffein som kan forstyrre søvnen dersom du drikk det for seint på dag. Prøv deg fram og finn ut når på dagen du kan drikke dette.
- Dei fleste treng 7-8 timar søvn. Finn ut når du må legge deg for å få nok søvn, og legg vekk PC, mobil og anna skjerm i god tid før. Ha ei fast kveldsrutine som du kan følge kvar kveld.