Snart reiser nye Nerlandsøybrua seg over sjøen. Alle dei kompliserte prosessane blir styrt av Møre og Romsdal fylkeskommune sine erfarne brubyggjarar. Ragnhild Holen Relling og Carola Dybvik loser prosjektet støtt mot opningsdagen i mars, 2025.
- Når vi bygger bru er det mykje som kan dukke opp frå start til mål. Det er mange usikkerheiter, der ein av dei største kan vere utfordringar rundt grunnforhold, både på land og sjø. Det er også noko av det som gjer det å jobbe med bru så spanande, seier Holen Relling, som er prosjektleiar for Møre og Romsdal fylkeskommune.
Spenstige og fine konstruksjonar
Ragnhild er sivilingeniør og har doktorgrad innafor tema kystbruer, fukt og korrosjon. Ein kan trygt seie at det er ein relevant utdanningsbakgrunn for dette prosjektet. Ho har bakgrunn frå bru- og ferjekaiseksjon i Statens vegvesen, der ho jobba mykje med bruvedlikehald. Carola har bachelor i byggingeniør, og starta å jobbe med bru og ferjekai Statens vegvesen i 2013. Dei vart begge med over til fylkesvegavdelinga i Møre og Romsdal fylkeskommune i 2020, som følgje av regionreforma.
- Det var litt tilfeldig at interessa for bru kom. Eg synes bru er meir spanande enn bygg og det er flotte konstruksjonar, seier Dybvik, som er prosjekterings- og byggjeleiar på Nerlandsøybrua.
Holen Relling føyer til:
- Ja, det er spenstige og fine konstruksjonar, og resultata av det vi gjer blir så synleg og gir mykje verdi til lokalsamfunna som skal bruke dei. Bruer er både flotte og skapar verdiar. Det er motiverande.
Mykje erfaring frå Nordøyvegen
Både Dybvik og Holen Relling hadde sentrale roller under bygginga av Nordøyvegen. Eit suksessprosjekt som har gjeve mykje god erfaring å ta med seg vidare. Nordøyvegen vart kåra til Årets anlegg i 2022, mykje på grunn av god prosjektgjennomføring.
- Frå starten av arbeidskarrieren jobba eg med eit bredt spekter av oppgåver innafor bru og ferjekaier. Etter kvart har det vorte meir spesialisert. Nordøyvegen var det første prosjektet der det berre var nye bruer. Eg var prosjekterings- og byggeleiar for Lepsøybrua og koordinator for bruarbeida, fortel Holen Relling.
Dybvik har tidlegare jobba med mindre rehabiliteringsprosjekt og prosjektert mykje på bruvedlikehald. Ho jobba med prosjekterings- og byggeleiing på Nordøyvegen frå 2019.
- Det som gjer det artig å jobbe med prosjekt er at vi heile tida må forholda oss til nye entreprenørar som sit på mykje kunnskap og erfaring. Vi lærer mykje av dei, og blir utfordra på nye måtar å gjere ting på. Det løftar begge partar, seier Dybvik.
Motstraums
Dei to erfarne brubyggjarane møtte to heilt forskjellige arbeidsmarknader som nyutdanna innan bygg og anlegg. Holen Relling opplevde ein stram marknad då ho var ferdig utdanna. Ho jobba på Norges tekniske høgskole til ho var ferdig med doktorgraden, og ein periode i Ålesund kommune, frå 1999-2003, før ho starta i vegvesenet i 2004. Dybvik var ettertrakta allereie i studietida og gjekk rett til jobb i Statens vegvesen. Dei gjekk begge motstraums då dei utdanna seg innan ein mannsdominert bransje.
- Eg var heldig og gjekk inn i ein god arbeidsmarknad – vi var attraktive studentar. Det er nok framleis litt slik at flest kvinner i bygg- og anleggsbransjen i stor grad arbeider innan klima, miljø og HMS. Nokre blir overraska når vi seier kva roller vi har i prosjektet, men det lever vi godt med, seier Dybvik.
Om nye Nerlandsøybrua
Den eksisterande Nerlandsøybrua vart opna i 1968 og er ein del av fylkesveg 5878. Som ei rekkje andre bruer som vart bygd på den tida, har brua ein veldig slank konstruksjon som gjer den utsett for korrosjonsskader. Det er nettopp korrosjonsskader som er bakgrunnen for at det er behov for ei ny bru, der ein samtidig sikrar ei betre løysing for mjuke trafikantar, med gang- og sykkelvegar og nye busslommer.
Planlagd ferdigstilling av den nye Nerlandsøybrua er 2025.