Fv. 60 Rundkøyring Sykkylven

Ordførar Odd Jostein Drotninghaug klipte snora og markerte med dette at den nye rundkøyringa er offisielt opna. – Ein ny portal inn til Sykkylven sentrum, uttalte ordføraren om området som har fått mykje betre trafikktryggleik.

- Det er svært gledeleg for lokalsamfunnet at dette er komen på plass, sa ordføraren i sin opningstale.  

Krysset som var på staden tidlegare har vore ulukkesbelasta, med mykje trafikk frå ferge og lokalvegar.  

- Her er mykje aktivitet i området, og til neste år opnar nye Aure skole med 400 elevar. Då er det flott at her er opplyste gangvegar og gode, oversiktlege overgangar ved rundkøyringa, sa Drotninghaug.

Både mjuke trafikantar og annan trafikk kan ferdast sikrare enn før. I tillegg til gode gangvegar, overgangar og rundkøyringa, har heile området mellom Fv. 60 , Ullavikvegen og Dalevegen fått ei stor oppgradering med betre lysforhold, tilstelling og beplantning.  

Eit godt samarbeid med kommune og entreprenør 

Den offisielle opninga fann stad på småbåthamna tysdag 13. juni, og fylkesvegsjef i Møre og Romsdal fylkeskommune, Ole Jan Tønnesen, vendte seg til den yngre garde. Både barnehage og skole var til stades på opninga, og fekk med seg feiringa med korpsmusikk, bollar og brus.  

- Sei til foreldra dykkar at dei må oppføre seg i trafikken, då blir eg kjempeglad, oppfordra Tønnesen spøkefullt.

Han sa vidare at han håpte dei var nøgde med den nye rundkøyringa og gangvegane, for no blei det mykje tryggare og gå over vegen til tannlegen og småbåthamna.  

- Prosjektet har blitt fullført innanfor dei økonomiske rammene som var på 31 millionar kroner, noko som fortener stor heider. Sykkylven kommune bidrog med 5 millionar kroner, noko som var viktige midlar for prosjektet.  

Tønnesen nytta også anledninga til å takke Hole Maskiner AS for å ha vore ein dyktig entreprenør og samarbeidspartnar. Takk fekk også fylkeskommunen sin prosjektleiar Solgunn Langlo og byggeleiar Kristian Bjørdal for å har losa det vellukka prosjektet i hamn.

Anleggsarbeidet varte i 420 dagar. Om lag 2,4 millionar køyretøy har blitt losa gjennom anleggsområdet på interimsvegar og mellombelse kryss utan nemneverdig stopp.  

Lørdag 6. mai opnast det for trafikk gjennom alle fire armane på den nye rundkøyringa i krysset mellom Fv. 60 og Dalevegen i Sykkylven. Ny rundkøyring betrar trafikktryggleiken i området.

Alle fire vegane i rundkøyringa blir opna for trafikk sjølv om det gjenstår noko arbeid med asfaltering og fullføring av vegdekke. Fristen for ferdigstilling er 1. juni, og alt skal vere fullført innan då.

-    Både den nye rundkøyringa og gangvegar i nærleiken er eit trafikktryggingstiltak som gir sikrare ferdsel både for mjuke trafikantar og anna trafikk, seier byggeleiar Kristian Bjørdal i Møre og Romsdal fylkeskommune.

-    Det har kome opp nye, påkjørselssikre lysmaster med LED-belysning som har betra lysforholda på vegane i området.

Tryggare kryssing ved skulane

Som ein del av prosjektet skal kryssinga av Dalevegen ved Aure skule også bli tryggare. Sikten blir betre ved at fotgjengarovergangen blir flytta litt og får betre lys.

I tida framover vil det òg bli arbeida med gangfeltet i Dalevegen og belysningsanlegget for prosjektet. Tilstelling og beplantning vil skje til våren slik at heile området får ei betydeleg oppgradering.

Framdrifta er god i bygginga av den nye rundkøyringa i Sykkylven. Arbeida er no komne så langt at i tida fram mot jul, skal trafikken gradvis ta i bruk den nye rundkøyringa.  

Publisert: 29.11.22
Oppdatert: 29.11.22
Skriv ut
For å kunne halde fram arbeidet med etablering av gangvegane samt vegarmane til Fv. 5916 Dalevegen og Kv1022 Ullavegen, må den mellombelse omkøyringsvegen som Fv. 60 no nyttar, bli fjerna. Trafikken langs Fv. 60 vil derfor bli leda frå omkøyringsvegen og gjennom den nye rundkøyringa.

Onsdag kveld 30. november startar arbeidet med å kople saman den nye rundkøyringa med det eksisterande vegnettet langs Fv. 60. Når dette arbeidet går føre seg, vil det bli innsnevringar, og berre ei køyrebane kan vere open for trafikk. Det vil òg vere nedsett fartsgrense og trafikkdirigering.

For å hindre trafikken minst mogleg, vil Hole Maskiner AS som er totalentreprenør, utføre dette arbeidet utanom dei tidene det er mest trafikk.

Trafikkomlegging

Når trafikken langs Fv. 60 køyrer gjennom rundkøyringa vil krysset mellom Fv. 60 og Dalevegen flyttast mot Aureosbrua. Der vil det i ein periode vere eit firearma kryss mellom Fv. 60, Dalevegen og Ullavikvegen.  

– På grunn av at anleggsområdet er så kompakt, vil det ikkje vere mogleg å få til store nok kryssområde. Dette påverkar kvar ein kan svinge i krysset, seier byggeleiar Kristian Bjørdal i Møre og Romsdal fylkeskommune, som er byggherre. Bjørdal seier det er viktig at alle trafikantar er merksame på desse endringane:  

Fv. 60: Sørgåande trafikk – altså frå Aursneset mot Sykkylven sentrum – vil ikkje kunne svinge av til høgre mot Ullavika eller til venstre mot Dalevegen. Trafikken må inn i rundkøyringa i Sykkylven sentrum å snu og kome tilbake før ein kan svinge av vegen. 

Dalevegen og Ullavegen: Det blir forbode å svinge mot nord. All trafikk frå desse vegane som skal nordover mot ferjekaia/Aursneset, må først inn til rundkøyringa i Sykkylven sentrum for å snu og køyre tilbake.

Berekn litt ekstra tid

– Vi ber trafikkantane i perioden framover vere merksame på trafikkomleggingane og følgje skiltinga. Det oppmodast om at ein bereknar litt ekstra tid dersom ein skal rekke ferja, og viser tolmod ovanfor det pågåande anleggsarbeidet og omsyn til mjuke trafikantar, seier Bjørdal.

Etter kvart som vegarmane i den nye rundkøyringa blir ferdige, vil trafikken bli flytta slik at dei mellombelse vegarmane òg nyttar den nye rundkøyringa. I tida framover vil det òg bli arbeida med gangfeltet i Dalevegen og belysningsanlegget for prosjektet. Tilstelling og beplantning vil skje til våren.

Trafikktrygging

Ny rundkøyring og gangvegar i Sykkylven er eit trafikktryggingstiltak som gir sikrare ferdsel både for mjuke trafikantar og anna trafikk. Frist for ferdigstilling av kontraktarbeida er 1. juni 2023. 

Då blir all trafikk flytta over på ein omkøyringsveg forbi anleggsområdet for den nye rundkøyringa, som er under bygging. På omkøyringsvegen blir det justerte avkøyringar til Dalevegen og Ullavikvegen.

Fartsgrensa blir sett ned til 30 km/t forbi anleggsområdet.

Stor ferjetrafikk

- Fylkesvegen blir flytta 20 meter til side. Vi trur at trafikken skal flytte bra, men utfordringa vil vere mengda trafikk frå ferja på Aursneset. Det må publikum vere merksame på, seier Ståle Anker Ljøen, dagleg leiar i Hole Maskiner AS, som har totalentreprisen for den nye rundkøyringa i Sykkylven.

Også gangvegen blir flytta og leia over i ein midlertidig fotgjengarovergang over Dalevegen.

Byggeleiar Kristian Bjørdal i Møre og Romsdal fylkeskommune, som er byggherre, seier det er viktig at alle trafikantar er merksame på endringane:

- Vis gjensidig omsyn

Vegane i området er mykje brukt av skuleborn og pendlarar. Ikkje alle er like erfarne i trafikken og vår oppmoding er å vise gjensidig omsyn slik at vi saman får alle trygt fram i anleggsperioden, seier Bjørdal.

Hensikta med å skilje trafikken frå anlegget, er å gjere det trygt for trafikantane og for dei som skal jobbe på anleggsområdet i perioden anlegget går føre.

Prosjektet skal vere ferdig til sommaren 2023.

Trafikktrygging

Rundkøyringa er eit trafikktryggingstiltak. Dagens kryss skapar farlege trafikksituasjonar, særleg  om morgonen og ettermiddagen med ferjekø om lag kvart 20. minutt. Bygging av rundkøyring og gangvegar med gangfelt gir sikrare ferdsel både for mjuke trafikantar og anna trafikk.

No og i ein månad framover blir eitt køyrefelt stengt på ein del av strekninga mellom sentrum og Aursnes ferjekai. Det kan få konsekvensar for dei som skal rekke ferja.

- Vi stenger eitt køyrefelt mens vi graver grøft og monterer nye gatelys. Trafikken blir dirigert forbi med hjelp av trafikklys. Då kan det bli stopp, så trafikkantane må berekne god tid, seier Ståle Anker Ljøen, dagleg leiar i Hole Maskiner AS. Selskapet har totalentreprisen for den nye rundkøyringa i Sykkylven, som blir bygd i samband med etablering av ny tannklinikk. Prosjektet skal vere ferdig til sommaren 2023. 

Bygger midlertidig veg

Entreprenøren er allereie i gang med å klargjere for bygging av ein midlertidig veg, som skal skilje trafikken på fylkesvegen frå anleggsområdet for rundkøyringa. Omkøyringsvegen skal vere klar til bruk i byrjinga av september, og då skal Fv. 60 gå i ein ny trasé forbi anleggsområdet for den nye rundkøyringa. Planen er at trafikken går i begge retningar utan trafikkhinder, og at det berre blir nedsett fartsgrense. Det vil vere omkøyring fram til jul.

- Å skilje trafikk frå anlegget er positivt både for trafikantane og for dei som skal arbeide på anleggsområdet, seier byggeleiar Kristian Bjørdal i Møre og Romsdal fylkeskommune, som er byggherre.

Flyttar landingsplassen for luftambulansen

Omkøyringsvegen fører til at landingsplassen for luftambulansen blir midlertidig flytta til grusbanen, rett ved Sykkylven storhall.

Som ein del av prosjektet blir det og laga eit gangfelt i kryssinga av Dalevegen ved Aure skule. I gangfeltet blir det intensivbelysning for å gjere det tryggare for skoleelevane.

Frist for ferdigstilling av heile entreprisen er 1. juni 2023

Møre og Romsdal fylkeskommune og Hole maskiner AS har skrive kontrakt om bygging av rundkøyring i krysset mellom fv. 60 og Dalevegen i Sykkylven.

Kontrakten har ein verdi på 16,7 mill. kr eks. mva, som er lågare enn kostnadsoverslaget på 19,2 mill. kr. eks. mva, som vart gjort før kontrakten vart lyst ut.  

Totalentreprise 

Kontrakten er ein totalentreprise, som betyr at Hole maskiner AS har ansvaret for både den tekniske planlegginga og gjennomføringsplanane. Det gjeld også tidspunktet for når byggearbeida startar. Prosjektet skal vere ferdig til sommaren 2023.

Fakta om prosjektet  

Ny rundkøyring i krysset fv. 60/Dalevegen/Ullavikvegen 
Trafikktryggingstiltak ved Aure skule  
Utbetring av veglys med LED-armatur og påkjørselssikre master 

Møre og Romsdal fylkeskommune har lyst ut kontrakten på bygging av ny rundkøyring i krysset mellom Fv. 60 og Dalevegen i Sykkylven.

Kontrakten inneheld også utbetring av veglysa i området. Både i Dalevegen og nord og aust for rundkøyringa blir det LED-armatur. Påkøyringsfarlege lysmaster blir bytta til master som bøyer av og ikkje skadar trafikantane ved ei påkøyring.

Tryggare kryssing ved skulane

Som ein del av prosjektet skal kryssinga av Dalevegen ved Aure skule også bli tryggare. Sikten blir betre ved at fotgjengarovergangen blir flytta litt og får betre lys.

Vil ha lite hindring for trafikken

Det er høg trafikk på fv. 60 gjennom Sykkylven. Det er automatisk trafikkteljing på Hjellegjerde og i Aure sentrum. Dei viser at det i gjennomsnitt køyrer 3600 køyretøy i døgnet på fv. 60 ved Hjellegjerde og 5700 køyretøy i døgnet på fv. 60 i Aure sentrum.

- I kontrakten legg opp til at bygginga skal hindre trafikken minst mogleg. Men når vi bygger ei rundkøyring på ein veg med høg trafikk, vil det gå treigare forbi og i periodar kan det bli nokre hindringar. Så i byggeperioden bør trafikantane legge inn nokre minutt ekstra i køyretid, spesielt om dei skal rekke ferja, seier byggeleiar Kristian Bjørdal i Møre og Romsdal fylkeskommune.  

Trafikktryggleik

Gang- og sykkelvegane i området er skulevegen for mange elevar i grunnskulen og vidaregåande skule. Det blir lagt til rette for at dei skal vere trygge også under bygginga.

- Bygginga skal ikkje gjere skulevegen farlegare. Vi skal legge til rette for at dei kan gå og sykle trygt når vi bygger. Så veit vi at spesielt dei yngre borna synes anleggsmaskiner er veldig spanande, så vi ønskjer mellom anna å besøke dei med maskiner på skulen og informere om tryggleik før vi startar opp, fortel byggeleiaren.

Ferdig sommaren 2023

Prosjektet er lyst ut som ein totalentreprise, som vil seie at entreprenøren som får kontrakten har ansvaret både for den tekniske planlegginga og gjennomføringsplanane. Det gjeld også tidspunktet for når byggearbeida startar. Fristen for å levere tilbod er 14. februar og entreprenøren har frist til sommaren 2023 med å levere ferdig prosjekt.