Fv. 65 Vindøla - Røv

Korps, skolebarn, naboar og politikarar markerte offisiell opning av den nye gang- og sykkelvegen denne veka. Betre veg og infrastruktur på strekninga er viktig for trafikktryggleik, skoleveg og næring.   

- Dette har stor betydning for utvikling i kommunen, sa ordførar i Surnadal kommune, Hugo Pedersen.  

- Ungane i området fått ein tryggare skuleveg, med gangveg og god belysning.  

Pedersen takka også innbyggarane for å ha vore tålmodige i byggeperioda, når ein no hadde det vellukka resultatet fram føre seg. I lange periodar var det lysregulering og berre eit felt ope ved Røv bru med tidvis mykje trafikk.  

- Det er vel einaste gang vi får lysregulering her i området, så da har vi prøvd det, sa ordføraren. 

Stemninga var god på opninga, til tross for 15 minusgrader. Skole, barnehage og naboar møtte opp til offisiell opning 21. november, og fekk med seg festtalar, snorklipping, bollar og brus. Mo skolekorps stod for underhaldninga. 

Trafikkert strekning 

Bustader og industri ligg relativt tett inntil den 1500 meter lange strekninga på fylkesvegen som no har fått eit kraftig løft. Vegen er skuleveg til Mo oppvekstsenter, og det passerer i gjennomsnitt 1600 køyretøy på strekninga i døgnet.  

Leiar av samferdselsutvalet i Møre og Romsdal fylkeskommune, Hans Olav Myklebust, var også til stades på opninga. Han løfta fram både trafikktryggleik og betre infrastruktur for industrien som viktige ringverknadar for vegprosjektet. Vegen er ei av fartsårane til Trondheim. 

- Vi skulle gjerne ha gjort enda meir, men det var dei pengane då, sa Myklebust.  

- Med breiddeutviding er vegen betre lagt til rette for modulvogntog, noko som er viktig for miljøet og for kostnadane for næringslivet. 

Trygg skoleveg 

Prosjektet består av ein kombinasjon av fortau, gang- og sykkelveg mellom Vindøla og Røv, og over elva Vindøla. Fylkesvegsjef Ole Jan Tønnesen nytta anledninga til å takke entreprenøren Solberg Maskin AS for å ha gjennomført bygginga.  

- Trafikktryggleik er viktig, og vi er spesielt glade for ny og trygg skoleveg for lokalsamfunnet, sa Tønnesen.  

Solgunn Langlo og Andreas Bergby har vore høvesvis prosjektleiar og byggeleiar for prosjektet, som har blitt fullført godt innanfor kostnadsramma på 99 millionar kroner.  

Tirsdag 21. november kl. 13.00 er det klart for snorklipping på den nye gang- og sykkelvegen mellom Vindøla og Røv på Nordmøre. Alle er velkommen til offisiell opning av den 1500 meter lange strekninga, som mellom anna bidreg til ein tryggare skoleveg i området. 

Programmet startar på Røv bru kl 13.00 med skolekorpset som kulturelt innslag. Det blir lett servering ved ei av dei nye busslommene langs vegen. Til stades på arrangementet blir ordførar i Surnadal, Hugo Pedersen, og leiar i samferdselsutvalet i Møre og Romsdal, Hans Olav Myklebust.  

Prosjektet i Surnadal kommune består av ein kombinasjon av 1,5 kilometer fortau, gange- og sykkelveg mellom Vindøla og Røv, og over elva Vindøla. Møre og Romsdal fylkeskommune har vore byggherre på prosjektet, med byggeleiar Andreas Bergby og prosjektleiar Solgunn Langlo i spissen.  

Under arbeidet med utbetringsarbeidet på fylkesveg 65 ved Røv bru i Surnadal kommune, er det oppdaga avvik i prosjekteringa som fører til at det må gjerast ekstra arbeid.  

-Avviket har ført til at ein del av vegstrekninga har blitt noko for smal, og dette må vi utbetre. Heilt konkret så må vi utvide vegen i breidda, og dette arbeidet blir starta opp rett over ferien. Det blir no skilta med smal veg i kvar ende der dette gjeld, seier byggeleiar for Møre og Romsdal fylkeskommune, Andreas Bergby. 

Det er mogleg dette vil få konsekvens for opning og ferdigstilling av anlegget, men dette er noko vi vil kome tilbake til etter ferien. 

Den 1500 meter lange strekninga med gang- og sykkelveg mellom Vindøla og Røv nærmar seg ferdigstilling. Med rekkverket på plass blir begge køyrefelta over brua opna for trafikk i starten av mai.

Ei ny bru med gange- og sykkelveg er sett opp ved sidan av køyrebrua over elva Vindøla. Her har kun eitt køyrefelt vore ope sidan juli i fjor. Betongarbeidet på gange – og sykkelvegen over elva blir ferdigstilt siste veka i april.

-    Når vi fjernar den midlertidige sikringa og set opp permanent rekkverk blir begge køyrefelta opne igjen, seier Andreas Bergby, byggeleiar for Møre og Romsdal fylkeskommune.

-    Same veke fortset vi byggearbeidet ved Røv bru i andre enden av strekninga, med fullføring av fortau med kantstein, ny infrastruktur og nye lysmaster. Her skal vi også handtere resten av dei forurensa massane som blei avdekka i fjor.

På Vindøla skal det byggast ei ny busslomme, og det asfalterte arealet der busskuret står i dag skal fjernast. Fire busslommer inngår i prosjektet. Tre av desse er ferdig asfalterte og det er montert leskur. Ved Røv bru blir det lysregulering av køyrefelta slik at arbeidet med fortau kan starte. 

Ferdig til sommaren

Prosjektet består av ein kombinasjon av fortau, gange- og sykkelveg mellom Vindøla og Røv, og over elva Vindøla. Langs den 1,5 kilometer lange strekninga ligg bustader og industri relativt tett inntil fylkesvegen. Arbeidet er ferdig sommaren 2023.

Arbeidet langs fv. 65 mellom Vindøla og Røv i Surnadal kommune går framover, og no begynner den nye gangbrua over elva Vindøla å ta form.

Når prosjektet er ferdig, vil Møre og Romsdal fylkeskommune ha bygd ein kombinasjon av fortau og gang- og sykkelveg på 1500 meter langs den relativt smale fylkesvegen med bustader og industri tett innpå vegen.

Fire busslommer inngår også i prosjektet. Tre av desse er ferdig asfalterte og det er montert leskur.

– Vi nærmar oss ferdige med oppbygginga av grusmassar til gang- og sykkelvegen, og avlastningstiltaket ved Høgmovegen vart ferdigstilt i haust. Vi har også fjerna framande artar langs heile prosjektet, fortel byggeleiar Andreas Bergby i Møre og Romsdal fylkeskommune.

Etter kvart skal heile strekninga få veglys, og først ut er området Røv sentrum på nyåret. Resten av veglysa samt lys i leskur vil bli montert etter påske og fram mot sommaren.

Anlegget tar juleferie 23. desember, og startar opp igjen 2. januar.

Utfordringar undervegs

Prosjektet har støtt på nokre utfordringar undervegs i arbeidet: 

– Ved Røv bru var kvaliteten på fjellet dårleg, og det ville ikkje vere eit godt fundament for natursteinsmuren som skulle stå på ei fjellhylle. Muren måtte derfor byggast lenger nede, på høgde med fylkesvegen. Den kom då innanfor sikkerheitssona til vegen, noko som førte til at det måtte monterast rekkverk, fortel byggeleiaren.

– Dette arbeidet er no ferdig, og lysreguleringa ved Røv bru er fjerna for vinteren, seier han.

Forureina masser

Ved Røv bru vart det funne forureina masser der det tidlegare har stått ei bensinpumpe. Dette var ikkje registrert hos Miljødirektoratet og derfor ikkje kjent for prosjektet. 

– Her måtte vi innhente ekstern kompetanse for prøvetaking, analysering og utarbeiding av ein tiltaksplan, samt få godkjenning frå kommunen for utføring av tiltak. Alt i alt forsinka dette framdrifta og påførte prosjektet økte kostnadar, men vi rakk likevel å få på asfalt før vinteren kom, seier Bergby.

Ein del av desse massane skulle uansett fjernast for å bygge opp ny fylkesveg. Resterande masse vart tildekt med godkjent membran og beskyttelsessand. Dette tiltaket må også utførast på resten av fylkesvegen og fortauet i løpet av våren neste år.

– I tida etter påske neste år, vil det igjen bli lysregulering ved Røv bru. Då skal vi mellom anna ferdigstille fortau og veg ved brua, seier Bergby.

Ny gang- og sykkelvegbru

På den nye gang- og sykkelvegbrua over elva Vindøla, er alle søyler og fundament samt ledemur til brua ferdig støypt. Motfyllinga på nedsida av brua er også klar, og i midten av januar blir støyp av bruplata ferdigstilt. Vidare på nyåret og fram mot april blir reis og forskaling rive, og det blir montert rekkverk på brua. 

I vegbygging blir det ofte brukt EPS (ekspandert polystyren) til å bygge opp terreng under og ved sida av veger og anlegg. I dette prosjektet er det bygd EPS-fylling med sprøytebetong og beskyttelsesplate.  

Siste del av prosjektet

Prosjektet skal etter planen vere ferdig sommaren 2023. Før den tid skal busslomma sør for fv. 65 ved Vindøla og gangvegen ved Høgmovegen byggast ferdig. Den nye gangvegen skal knytast saman med gang- og sykkelvegbrua før asfaltering av desse. Tilstelling, såing og montering av skilt langs strekninga er siste etappe i prosjektet.

Ein viktig milepæl i prosjektet er gjennomført. Målet om ferdig støyping av gangbrua blei nådd i løpet av ein effektiv januardag, med levering av 270 kubikkmeter betong jamt og trutt frå morgon til kveld. 

-    I alt 38 leveransar måtte til før den 71 meter lange brua var ferdig, seier Andreas Bergby, byggeleiar for Møre og Romsdal fylkeskommune. 

Arbeidslaget opplevde fine arbeidsforhold, mellom 1 og 7 grader celsius og lite med nedbør som bidrog til at dei kom i mål med støypinga.

Løyste utfordring med høgspentline

-    Vi fekk noko utfordring med høgspentlina som er på vestsida av Vindøla, men dette fekk vi løyst i god dialog med netteigar Svorka AS. Betongen gjekk via tre ulike pumpebilar slik at siste del av støyp kunne utførast utan konflikt med høgspentlina.

På slutten av økta blei støypen tildekt med plast og isolasjon. Dette for å sørge for riktig tempo på herdeprosessen av brudekket, ifølge byggeleiaren. Sidan dette er ei såkalla spennarmert bru, bestod framdrifta av vidare førebuingar til oppspenning av brua. 

-    36 kablar for spennarmering ble tredd igjennom røyr som er støypt inn i brudekket, forklarer Bergby. 
-    Når betongen etter nokre dagar har oppnådd nok fastheit, starta oppspenning av brua saman andre tiltak for fullføring.

Ferdig til sommaren

Etter påske skal brua vere knytt saman med resten av den 1500 meter lange gang- og sykkelveg mellom Vindøla og Røv. Langs strekninga ligg bustader og industri relativt tett inntil fylkesvegen. Prosjektet er ferdig sommaren 2023. 
 

Møre og Romsdal fylkeskommune skal bygge ein kombinasjon av gang- og sykkelveg og fortau langs fv. 65 mellom Vindøla og Røv i Surnadal kommune. Entreprenørar har frist til 14. februar med å levere tilbod.

Vegen er skuleveg til Mo oppvekstsenter og det er busetnad og industri tett innpå vegen. Det køyrer i gjennomsnitt 1600 køyretøy på strekninga i døgnet, 12 prosent av dei er lange køyretøy.

Kontrakten inneheld:

• 900 meter gang- og sykkelveg
• 500 meter fortau
• Ny gang- og sykkelvegbru på 71 meter over elva Vindøla
• Betre sikt for trafikantane ved Røvbrua
• Terrengstabilisering
• Fire busslommer
• Veglys på heile strekningen

Fylkesutvalet godkjente i desember 2021 utlysing med kostnadsramme på 85 millionar 2021-kroner. Byggestart er planlagt våren 2022, og ferdigstilling sommaren 2023.