FV. 67 Høvikbrua

Frå 18. desember kl. 21.00 til 19. desember kl. 05.00 blir Høvikbrua på fylkesveg 62 ved Eidsvåg stengd. Bakgrunnen for stenginga er installeringa av ei mellombels bru som skal stå ved sida av mens den nye blir bygd.

Utrykkingskøyretøy og heimetenestene kan passere til ei kvar tid. Siste buss frå Molde mot Sunndal som går 21.00 frå Molde vil passere. For anna trafikk blir det skilta omkøyring om fylkesveg 666 og 665 Osmarka og Raudsand. 

Ny og breiare bru i slutten av 2024

Møre og Romsdal fylkeskommune er i gang med utbetringa av Høvikbrua, som går over Høvikelva på fylkesveg 62 i Molde kommune. Den nye brua er tilpassa dagens køyretøy og trafikkmengd og bredda er utvida frå 6 meter på eksisterande bru til 7,5 meter for den nye. Tilstøytane veg blir òg utvida i bredda tilsvarande brua, eit stykke ut på begge sider. 

- Brua får to køyrefelt og vil være mykje sikrare enn dagens bru. I prosjektperioden vi det vere ei mellombels bru ved sida av, som berre har eitt køyrefelt Derfor blir trafikken regulert med trafikklys i prosjektperioden. Den nye brua skal etter plana stå klar for trafikk mot slutten av 2024, seier prosjektleiar i Møre og Romsdal fylkeskommune, Hallvard Rangnes. 
 

Møre og Romsdal fylkeskommune skal utbetre Høvikbrua som går over Høvikelva på fv. 62 i Molde kommune. Den nye brua blir breiare og tryggare å ferdast over. Anleggsarbeidet startar opp ca 20. september.

Den gamle brua vart i 2021 snevra inn til berre eitt køyrefelt med sentrisk køyring, grunna redusert bereevne.

Den nye brua blir 14,8 meter lang, og det blir etablert nye landkar og murar. 
I prosjektperioden blir trafikken leda via ein mellombels veg samt ei mellombels bru på oppstrøms side av den eksisterande brua.

Før ein kan rive den eksisterande brua må den mellombelse vegen og brua vere opna for trafikk. Prosjektet vurderer at desse skal vere klare til bruk i januar 2024. Anleggsarbeidet er planlagd med oppstart i september 2023 og vil vare fram til november 2024.

Trafikklys

Sidan det er berre eitt køyrefelt på den mellombelse vegen/brua må trafikken regulerast med trafikklys i prosjektperioden. 
- Det er viktig at trafikantane held farta nede og tek omsyn til dei som arbeider på anlegget, seier byggeleiar Jostein Wengstad i Møre og Romsdal fylkeskommune.

Breiare bru og veg 

Høvikbrua vart opna for trafikk i 1948. Det nye brua er tilpassa dagens køyretøy og trafikkmengd og føringsbredda er utvida frå 6 m på eksisterande bru til 7,5 m for den nye. Tilstøytane veg blir òg utvida i bredda tilsvarande brua, eit stykke ut på begge sider. Brua får to køyrefelt og vil være mykje sikrare enn dagens bru.
 

Den nye Høvikbrua på fylkesveg 62 i Molde kommune er under bygging. I prosjektet er det valt å nytte lågkarbonbetong på sentrale delar av brua, som bidreg til vesentleg lågare CO2-utslepp og miljøbelastninga til bruprosjektet. 

Den eksisterande brua frå 1947 over Høvikelva var i relativt dårleg stand. Den hadde nedjustert bruksklasse og var innsnevra med eitt køyrefelt med sentrisk køyring på grunn av dårleg bereevne. Bygginga av ny bru omfattar i hovudtrekk utskifting av landkar og bruplate, inkludert utviding av elveløp og breiddeutviding av veg/bru.

– I prosjektet er det gjort tiltak for å redusere klimagassutsleppet ved å nytte lavkarbonbetong klasse A i nokre større betongkonstruksjonar. Vi har samarbeida med leverandøren Sylteosen betong om dette, noko som har fungert godt og hatt ein relativt liten meirkostnad for prosjektet, seier byggeleiar i Møre og Romsdal fylkeskommune, Jostein Wengstad.

– Aukar miljøfokuset

Lavkarbonbetong er betong som gir eit lågare CO2-utslepp pr. kubikk enn vanlig betong. Betong  består i hovudsak av sand og pukk, sement, vatn og tilsettingsstoff. Under produksjon av sement blir det skapt mykje CO2, både gjennom varmebehandling av bestanddelane som blir brent, men òg gjennom transport av produkta. Til Høvikbrua er det valt å bruke den strengaste klassa for lavkarbonbetong – klasse A.

– Det er fleire klassar av denne typen betong. Klasse A er den typen som krev spesielle tiltak for å oppnå og er den strengaste klassa som kan produserast i denne delen av landet. Ein tilsett noko som heiter silikastøv og flygeaske og/eller hydrauliske bindemiddel, som reduserer avtrykket utan at det påverkar kvaliteten på betongen negativt. Ved å nytte dette tar vi omsyn til CO2-regnskapet og vi aukar miljøfokuset i prosjektet, seier Wengstad.

Dagleg leiar i Sylteosen betong, Thomas Fleten, seier at lavkarbonbetong og utvikling av meir miljøvennleg betong står sentralt i deira strategi.

– Sylteosen Betong har teke eit tydeleg standpunkt, og ønskjer å reinvaske betongens rykte. Det er verdas mest brukte byggemateriale, og det er under stadig utvikling. For å synleggjere moglegheitene for spare miljøet er vi avhengig av framoverlente byggherrar og entreprenørar, noko dette prosjektet er eit godt døme på, seier Fleten.    

Fakta om nye Høvikbrua

• Bru over Høvikelva på fylkesveg 62, ved Eidsvåg i Molde kommune
• Fritt opplagt eitt-spenns bru
•  Totallengde bruplate 14,8 m 
• Spennlengde 13,0 m, mot tidlegare 8,0 m 
• Føringsbredde 7,5 m, mot tidlegare 6,0 m
• Bruksklasse BK10/60t
• Budsjett 41 mill. kr inkl. mva
• Rådgivande ingeniørfirma: Multiconsult
• Entreprenør: Christie & Opsahl AS
• Planlagd ferdigstilling i november 2024
• Landkara frå den mellombelse brua skal bestå i påvente av eventuell framtidig gang- og sykkelveg som vart regulert i 2016/17
• Bruk av ca 75 %  lavkarbonbetong gir eit spart utslepp på 16 tonn CO2-ekvivalentar

Nye Høvikbrua på fv. 62 i Eidsvåg. Arnt Olav Herjehagen