Larsnes, Åram, Voksa og Kvamsøya ferjekaier

Ny oppstillingsplass på Årvika ferjekai blir klar torsdag 22. august. Det er fleire dagar tidlegare enn første melding. I to dagar frå 20. - 21. august må bilar til og frå øyane ta omkøyring med ferje via Årvika - Koparnes, og køyre til Åram.  

-    Vi har sett på løysingar og strekt oss langt for å gjere Årvika ferjekai ferdig tildegaretidlegare, seier byggeleiar i Møre og Romsdal fylkeskommune, Trond Vidar Gjerde. 

Larsnes ferjekai stenger tysdag 20. august, og ferjene i rute 1066 Larsnes– Åram–Voksa–Kvamsøya skal gå via Årvika. Larsnes blir stengt ut november.  I tillegg oppmodast tungtransporten om å køyre om Fiskå dei to daganadagane 20. - 21.august. Dette på grunn av vegstandarden. 

Tre oppstillingsfelt i Årvika 

Nye oppstillingsfelt i Årvika blir altså klare frå morgonen torsdag 22. august. Felt 1 er for bilar til Koparnes, medan felt 2 og 3 er for bilar til Voksa og Kvamsøy. Det blir etterkvart lysregulering for felt 2 og 3, men dette er ikkje klart frå første dag, i følge Gjerde.  

-    Merk at for reiser frå Åram til Voksa og Kvamsøya må ein bestille tur 1 time før avgangstid på tlf. 916 81 120 / 916 81 119, seier han.  
-    Då vil mannskapet sette av plass før avgang frå Årvika. Informasjon om dette står vil bli oppdatert i i reiseplanleggaren til FRAM. 

Ekstra avgangar med passasjerbåt 

Frå 20. august og i heile stengeperioden vil samfunnsbåten MS Liv ha ekstra avgangar frå Larsnes. Rutetidene for ferjene og samfunnsbåten blir oppdatert i reiseplanleggaren på FRAM sine nettsider, eller i FRAM-appen. Det vil bli gjort nokre mindre justeringar på enkelte ruter slik at ikkje ferjer skal kome samtidig til Årvika. Rutetidene vil vere tilgjengeleg for rutesøk frå onsdag 21. august. 
 

Det skal gjerast arbeid på Larsnes ferjekai, og kaia blir stengt frå tysdag 20. august. Ferjene i rute 1066 vil gå frå Årvika i staden. Stengeperioden er planlagt å vare til slutten av november.

I Årvika gjerast det tilpassingar for trafikken som vanlegvis går frå Larsnes og ut til øyane, mellom anna med ekstra oppstillingsfelt.

Under stengeperioden vil samfunnsbåten MS Liv også har ekstra avgangar frå Larsnes.

Rute 1067 Årvika–Koparnes vil gå som normalt i perioden, her er den einaste endringa at avgangen kl. 22.30 frå Koparnes blir endra til kl. 22.45 på alle vekedagar. 

Ferjekaia på Kvamsøya skulle vere stengt 20.–23. juni, men på grunn av dårlege vêrmeldingar blir ikkje arbeidet med byting av ferjekaibrua starta opp torsdag 20. juni likevel. Ferja vil gå som normalt denne dagen.

Stengeperioden blir frå og med fredag 21. juni til og med søndag 23. juni, altså éin dag kortare enn det som tidlegare har vore meldt.

Samfunnsbåten MS Liv vil gå si vanlege rute torsdag 20. juni. 

Under arbeidet med byting av ferjekaibrua, må kaia vere heilt stengt. Når ferja ikkje går til Kvamsøya 21.–23. juni, vil det vere MS Liv som fraktar passasjerar til og frå øya. Det blir eigne rutetabellar for båten i denne perioden, desse er lagt ut på FRAM sine nettsider, frammr.no.

I arbeidet med dei fire ferjekaiene i sambandet Larsnes– Åram–Voksa–Kvamsøya, er det no tid for byting av ferjekaibrua på Kvamsøya. Under dette arbeidet må kaia vere stengt, og det blir derfor sett inn passasjerbåt i staden for ferje.

Kvamsøy ferjekai vil vere stengt frå og med torsdag 20. juni til og med søndag 23. juni. 

Det vil vere samfunnsbåten MS Liv som går til Kvamsøya under stenginga. Rutetabellar for båten blir lagt ut på FRAM sine nettsider, frammr.no.

Fleire arbeidsoperasjonar

Byggeleiar for ferjekaiprosjektet i Møre og Romsdal fylkeskommune, Andreas Tennøy Brekke fortel at det er fleire ulike arbeidsoperasjonar som skal utførast under stenginga.

–  Først skal vi rive den gamle brua og heisetårna. Den gamle ferjekaibrua blir heisa ut med kran og frakta vekk, fortel han og fortset:  

– Den nye ferjekaibrua har ei breidde på 9 meter, medan dagens bru er 4,5 meter brei. Dette gjer at vi må fjerne mykje av den gamle betongen rundt for å lage plass til den nye brua. Så snart dette er klart, blir den nye brua heisa på plass og arbeidet med å montere hydraulikken kan starte.

Tennøy Brekke ber også reisande om å vere merksame på at parkeringstilhøva kan bli meir avgrensa under stengeperioden. 

– Arbeidsoperasjonane som skal gjerast krev noko meir plass til utstyr på ferjekaiområdet, seier han.

Naudsynt med stenging

Byggeleiaren seier at ferjekaiprosjektet har stor forståing for at stenging av ferjekaia vil gje ulemper for lokalsamfunnet på Kvamsøya. 

– Arbeidsoperasjonane vi skal i gang med gjer at vi ikkje kjem utanom stenging, men vi gjer det vi kan for å minske ulempene så langt det er mogleg.

Når ferjekaiprosjektet har fullført arbeidet med Kvamsøy ferjekai i august, vil det i tillegg til ny ferjekaibru også vere gjort utdjuping av brubåsen og erosjonssikring. Tilleggskaia vil også vere forlenga, slik at den kan ta i mot ei større ferje frå 2025.

Under stengeperioden på Larsnes ferjekai skal ferjetrafikken frå rute 1066 Larsnes–Åram–Voksa–Kvamsøya gå til Årvika. Derfor startar no arbeidet med å klargjere ferjekaiområdet i Årvika for meir trafikk.

Oppstart for arbeidet i Årvika blir tysdag 4. juni.

Det skal etablerast fleire oppstillingsplassar og ny veglinje forbi ferjekøa. I første fase vil arbeidet bestå i å legge om infrastruktur, straum, fiber og vatn, samt transport av masser. Deretter blir det opparbeiding av veg og drenering.

Arbeidet vil i utgangspunktet ikkje påverke trafikken, anna enn i kortare periodar dersom det blir behov for sprenging.

Det vil truleg gå føre seg arbeid i Årvika fram mot fellesferien. Noko arbeid med tilstelling av området kan også bli aktuelt etter ferien.

Nye rutetabellar i juni

Stengeperioden på Larsnes ferjekai skal etter planen starte 20. august og vare ut november. Frå 2025 blir det satt inn større ferje med kapasitet på 50 personbilar i sambandet.

Når ferjerute 1066 skal gå til Årvika i staden for Larsnes, vil det også bli sett opp nokre ekstraavgangar med samfunnsbåten MS Liv til/frå Larsnes. 

Både nye rutetabellar for ferjeruta og for samfunnsbåten vil bli publiserte på FRAM sine nettsider i løpet av juni.

Skissa viser ferdig anlegg, i mellombels løysing der ferjerute 1066 skal anløpe Årvika vil det vere tre oppstillingsfelt.

Arbeidet på Åram ferjekai er godt i gang, og no startar den delen av byggearbeidet som krev at ferjekaia er stengt i ein periode. Frå og med tysdag 21. mai vil ferja derfor ikkje gå til Åram. Stengeperioden er planlagd å vare ut juni.

Reisande som skal til eller frå Vanylven må i denne perioden reise med sambandet Årvika–Koparneset. 

Når ferja ikkje går til Åram, men i trekantrute mellom Larsnes–Voksa–Kvamsøya, vil den rekke fleire rundturar i sambandet. Etter at Åram ferjekai opnar igjen, blir det sett inn B-ferje i sambandet, altså frå 1. juli.

Oppdaterte rutetider finn ein på FRAM sine nettsider

Samfunnsbåten MS Liv vil heller ikkje anløpe Åram ferjekai på si pendlarrute under stengeperioden.

Omfattande arbeid

Det er eit omfattande arbeid som skal i gang på Åram: Både nytt landkar, ny ferjekaibru, samt tilhøyrande infrastruktur skal på plass. Den eksisterande tilleggskaia vil også bli forlenga med ein dykdalb.

Byggleiar for ferjekaiprosjektet i Møre og Romsdal fylkeskommune, Andreas Tennøy Brekke, fortel at utbetringa av ferjekaia på sikt vil gjere det litt enklare å reise med bil frå Åram.

– Den nye ferjekaibrua vil få ei breidde på 9 meter, mot dagens på 4,5 meter. Når den nye ferja kjem på plass, vil det bli enklare enn i dag å rygge om bord i ferja.

Også arbeid på Larsnes

Neste veke er det også oppstart for arbeidet på Larsnes ferjekai. Her vil peleriggen bli plassert på motsett side av brubåsen. Ferja vil gå som normalt, men det vil bli mindre plass inne i hamnebassenget. Det vil mellom anna bli avgrensa tilgang til gjestebrygga.

Tennøy Brekke fortel at dei også i løpet neste veke vil demontere og fjerne flytebrygga som ambulansebåten tidlegare har nytta.

– Ambulansebåten kjem til å ligge ved kommunekaia framover, og vi har vore i dialog med reiarlaget Fjord Shuttle om dette, seier han.

Mandag 5. februar 2024 begynner anleggsarbeidet på Åram ferjekai. Den første tida er arbeidet førebuande tiltak som ikkje vil påverke rutetidene. Etterkvart vil det bli stengeperiodar med omkøyring via sambandet Årvika – Koparnes. Møre og Romsdal fylkeskommune kjem med nærmare informasjon om dette. Arbeidet på Åram ferjekai er venta ferdig i løpet av hausten 2024.  

Alle kaianlegga i sambandet Larsnes, Åram, Voksa og Kvamsøy skal oppgraderast, då det kjem ei større ferje på sambandet frå 2025. 

I august 2023 starta Møre og Romsdal fylkeskommune på arbeidet med å utbetre ferjekaiene i sambandet Larsnes–Åram–Voksa–Kvamsøya. Ferjekaia på Voksa var først ut i prosjektet – no er det snart klart for oppstart på Kvamsøya.

Anleggsarbeidet på Kvamsøya startar i løpet av veke 45. Det er planlagt at denne ferjekaia skal være ferdig i slutten  av mai i 2024. 

Ferjesambandet som ofte blir kalla Sandesambandet går mellom Larsnes, Åram, Voksa og Kvamsøy i kommunane Sande og Vanylven. Ferjekaiene er stort sett om lag 40–50 år og i dårleg stand. Frå 2025 blir det sett inn ei ny ferje i sambandet, med kapasitet på 50 personbilar. Dagens ferje har plass til 35.

Aurstad Tunnel AS er entreprenør på alle kaiene i prosjektet.

Arbeidet på Kvamsøya

Byggeleiar for ferjekaiprosjektet i Møre og Romsdal fylkeskommune, Andreas Tennøy Brekke, opplyser at den eksisterande tilleggskaia på Kvamsøya skal forlengast og at det vil bli montert ny ferjekaibru. 

– I tillegg skal vi utdjupe og tilpasse brubåsen og sørge for erosjonssikring, fortel han.   

Brekke ber trafikantane om å vere førebudd på at det blir eit anleggsområde på ferjekaia. 

– Det er viktig at trafikantane er merksame på at det vil gå føre seg anleggsarbeid på ferjekaiområdet. Prosjektet gjer det vi kan for at trafikken skal kunne gå mest mogleg som normalt, men det kan likevel bli noko redusert framkomme under byggeperioden, seier han. 

– Det vil bli noko færre parkeringsplassar på ferjekaiområdet. Spesielt pendlarar må vere merksame på dette.

Korte stengeperiodar

Brekke forklarar også at enkelte arbeidsoperasjonar krev at ferjekaia på Kvamsøya blir stengt i kortare periodar.  

– Det vil bli inntil ti stengeperiodar i løpet av byggetida fram til og med mai 2024, og alle desse vil bli lagt til helg, frå fredag kveld til måndag morgon. Når ferjekaia er stengt, vil det bli sett opp alternativt trafikktilbod med hurtigbåt, seier han og fortset:

– Fylkeskommunen har forståing for at arbeid som fører til at vi må stenge ferjekaia kan gje ulemper for lokalsamfunnet på Kvamsøya. I dialog med entreprenøren har vi valt å legge arbeidet til den tida av veka då det er minst trafikk. Vi kjem ikkje utanom stenging, men vi gjer det vi kan for å minske ulempene så langt det er mogleg.

Varsling av stenging

Første stengeperiode er ikkje endeleg bestemt enno, men tidlegaste stenging kan bli i helga 24.–26. november. Brekke opplyser at det vil kome meir informasjon om dette.

– Alle stengeperiodar vil bli varsla minimum to veker før, slik at det skal vere mogleg for folk å planlegge for eit alternativt trafikktilbod med hurtigbåt. Då vil det også bli informert om rutetider for båten, avsluttar byggeleiaren.

Tirsdag 27. juni signerte Møre og Romsdal fylkeskommune kontrakt med Aurstad Tunnel AS for bygging og restaurering av nye ferjekaier på sambandet Larsnes-Åram-Voksa-Kvamsøy.

Entreprenøren Aurstad Tunnel AS frå Ørsta vann anbodet med oppgradering av dei fire kaianlegga Larsnes, Åram, Voksa og Kvamsøy i kommunane Sande og Vanylven. Kaiene er i dårleg forfatning og skal utbetrast, i tillegg til at det kjem større ferje på sambandet frå 2025. Då må kaiene forlengast.  

-Vi er glade for at vi har kome så langt. Det har vore utfordringar i planleggingsfasen, og kontraktsigneringa viser at vi er på rett veg, seier prosjektleiar i Møre og Romsdal fylkeskommune, Hans Rune Paulsen.  
-Det er spanande å jobbe med ein ny entreprenør på ferjekai, så dette ser vi fram til.  

Ferjesambandet skal gå som normalt under ombygginga så langt det let seg gjer. På Voksa blir det bygd ei mellombels kai medan den gamle kaia rivast for å bygge heilt ny kai. Arbeidet er ikkje like omfattande på resten av sambandet, men det blir alternative løysingar for trafikk. Under arbeid med Larsnes ferjekai blir det omlegging av ferjeruta der Årvika blir anløpsstad.    

Oppdraget har ein totalverdi på 175 millionar kroner eks. mva.  

Ser fram til godt samarbeid

Prosjektsjef i Møre og Romsdal fylkeskommune, Torbjørn Vatnehol, fortel at han ser fram til å samarbeide med Aurstad Tunnel.

-Dette er eit viktig prosjekt for fylkeskommunen, og vi kjenner entreprenør godt frå andre prosjekt og har gode erfaringer med dei, seier han.  

Aurstad Tunnel AS synest det er stas å ha dratt i land prosjektet med ferjekaiene, som er eit stort oppdrag.  

-Det er fint for oss å få ei kontrakt av lang varigheit, seier entreprenøren sin prosjektleiar, Pål Are Vadstein.  
-Det gjer ting føreseielege fram i tid.  

At det er mange forskjellege fagfelt i prosjektet setter han også pris på, og meiner det er ei spanande og bra utfordring. Byggetida blir om lag 1,5 år til saman og startar i august 2024. Arbeidet med mellombels kai på Voksa fullførast i desse dagar slik at prosjektet kan starte som planlagt.  

Ferjekaiene i sambandet Larsnes-Åram-Voksa-Kvamsøy står ovanfor nødvendige oppgraderingar. Byggeperioden blir utfordrande, då folket i havgapet er avhengige av pålitelege ferjer. Ingeniørane settast på prøve når det gjeld å finne gode løysingar som skapar minst mogleg ulempe for innbyggarane.

I sambandet som går mellom Larsnes, Åram, Voksa og Kvamsøy i kommunane Sande og Vanylven, er ferjekaiene er stort sett rundt 40 – 50 år. Dei er no modne for ei oppgradering. Voksa er først ut i prosjektet, og fylkeskommunen er i gang med bygging av ei mellombels kai her, ei såkalla interimskai, i påvente av ny kai.

-Det er mykje planlegging som skal til for at dette skal gå rundt, fortel Andreas Tennøy Brekke.  

Brekke er Møre og Romsdal fylkeskommune sin byggeleiar på prosjektet, medan Eivind Alver er prosjekteringsleiar. For at ferja skal kunne gå heile tida i byggeperioden blir det laga ei mellombels kai på Voksa.  

-På Voksa finnast ingen omkøyringsmoglegheiter, og kaia frå 1978 skal skiftast heilt ut, seier Alver.  
-Den gamla kaia blir riven, og det skal byggast ny kai.  

Frå 1. januar 2025 kjem det ei ny og større ferje i sambandet, og dei nye kaiene blir tilpassa storleiken på meir moderne fartøy.

Fokus på gjenbruk av material

Mesta er entreprenør på jobben med interimskaia, og starta det omfattande arbeidet 8. mai. I følgje Brekke ventar dei å halde på til om lag midten av juli.  

-Den mellombelse kaia har ein forenkla konstruksjon, seier han.  
-Den er ikkje dimensjonert for fleire år lang levetid som ei permanent kai.

Konstruksjonen blir ståande i om lag 6 månader, i påvente av ny kai. Prosjektet har fokus på gjenbruk, så det blir gjort ein jobb med å ta vare på, og gjenbruke delar av materialet frå interimskaia. Mykje av delane kan gjenbrukast til andre prosjekt i fylkeskommunen.

Løysingar som fungerer for trafikken

Heile prosjektet er planlagd fullført innan utgangen av 2024, og det er berre på Voksa det blir ei interimskai. På resten av sambandet finn fylkeskommunen alternative løysingar for trafikken.

For Åram og Larsnes er det mogleg med omkøyring om ferjesambandet Årvika-Koparnes. Eit opplegg for biloppstilling i Årvika er under planlegging. På Kvamsøy er arbeidsomfanget mindre, og ein legg opp til korte stengeperiodar som gjer at ferja stort sett kan gå i rute. I stengeperiodane blir det sett inn hurtigbåt.