Oppgraderingar av fylkesvegtunnelar

Sidan februar i fjor har det vore arbeid med utbetringar av Remetunnelane mellom Slyngstad og Brattvåg. Dei siste testane er gjennomførte og dei nye og tryggare tunnelane opnar no for trafikk.  

Publisert: 14.07.23Oppdatert: 14.07.23Skriv ut

- No er vi kome dit at vi kan gjenopne Remetunnelane. Det står att litt mindre arbeid, men dette krev ikkje stenging. Oppgraderingane som er gjort gir eit vesentleg løft for trafikktryggleiken på strekninga, som har vore prioritet nummer ein for dette prosjektet, seier prosjektleiar i fylkesvegavdelinga i Møre og Romsdal fylkeskommune, Erlend Opstad.  

Litt ekstra arbeid – mykje betre tunnelar 

Tunnelane har vore stengde i ei lengre periode for å gjere heilt nødvendig oppgraderingsarbeid. Tunnelane har vore rekna som eitt av dei mest utrygge punkta på fylkesvegnettet i Møre og Romsdal, fordi store køyretøy legg seg inn mot midten av vegen på grunn av låg høgde. Ein sentral del av prosjektet var å senke vegbana i tunnelane, slik at høgda aukar frå 4 til 4,6 meter. 

Oppgraderinga av tunnelane består også av ny belysning, skilting, nødstasjonar og fleire andre sikkerheitstiltak. I tillegg er det utbetra vatn- og frostsikring. Eit større behov enn venta vart avdekt under arbeidet, og dette førte til noko lengre stengeperiode. I sum løftar dei oppgraderingane som vart nødvendig også driftstryggleiken i tunnelane. 

Sjølv om tunnelane no opnar  for trafikk, er det framleis litt arbeid igjen før oppgraderinga er heilt ferdig. Det blir mobildekning i tunnelane, men den siste installasjonen er ikkje heilt klar. En må difor rekne med at ein missar signal inne i tunnelane i ei kortare periode. Entreprenøren og utbyggjar, Møre og Romsdal fylkeskommune, tek no ferie og tek til med dei siste arbeida når vi er tilbake. Tunnelane blir ikkje heilstengd i samband med dei siste arbeida, men trafikantane må rekne med noko venting. 

Rosar lokalbefolkninga 

Prosjektleiaren har heile vegen hatt fokus på å minimere ulempa for trafikantane. Og han rosar entreprenøren som har jobba utrøytteleg for å opne tunnelane så snart som råd. 

-Vi er audmjuke for at prosjektet og stenginga har gitt utfordringar for næringsaktørar og større belastning langs omkøyringsvegen. Vi sett pris på dialogen vi har hatt med ulike aktørar gjennom prosjektperioden og har prøvd å strekkje oss for å redusere belastninga for desse. Eg vil takke alle for tolmoda og innspela. Vi la opp til eit veldig stramt løp for å halde stengeperioden så kort som mogleg, og entreprenør har jobba hardt for å halde dette. Vi sprakk litt på grunn av ekstraarbeid, men vi sit igjen med enda betre tunnelar, seier Opstad.  

Normal kollektivtrafikk igjen 

Frå måndag 17. juli går rutetabellane for bussane tilbake til slik dei var før tunnelstenginga, med nokre få justeringar. Det blir og ei justering på hurtigbåten mellom Ålesund og Hamnsund. Sjå frammr.no for meir detaljar. 

Asfaltarbeid og stikkrenneskift mellom tunnelane og Brattvåg 

Frå natt til måndag 16. Juni til natt til torsdag 20. Juni, blir det lagt ny asfalt og skifta tre stikkrenner på strekninga frå tunnelane mot Brattvåg. Dette arbeidet blir gjort mellom 20.00 og 06.00 desse dagane. Det blir redusert framkomme under dette arbeidet, og dette blir skilta. Dette arbeidet er eit resultat av nylege ekstrabevillingar til asfalt i fylket, og er ikkje ein del av Remetunnel-prosjektet.  

Som følgje av ekstra arbeid med vatn- og frostsikring blir opninga av dei oppgraderte tunnelane noko seinare enn det som var planlagd. 

Under arbeidet med oppgraderinga av Remetunnelane vart det avdekt behov for å gjere ekstra tiltak i tunnelane. Tunnelane har opplevd problem med at det dannar seg is inne i tunnelane om vinteren. For å bøte på dette problemet blir tunnelane no innreidd med vatn- og frostsikring. Omfanget av denne ekstrabestillinga gjer det nødvendig å halde tunnelane stengde til midten av juli.

- Oppgraderinga av tunnelane går for fullt. Produksjonen er stor og entreprenøren gjer ein krevjande jobb med kort byggetid. Vi gjer denne ekstrajobben for å heve standarden i tunnelane ytterlegare, no når vi har moglegheita. Vi beklagar føljene dette får for trafikantane og dei som er utsett for trafikken langs omkøyringsvegen, men samstundes vil dei få betre og tryggare tunnelar når vi er ferdige, seier prosjektleiar for Møre og Romsdal fylkeskommune, Erlend Opstad. 

Dei midlertidige bussrutene på strekninga fortset så lenge tunnelane er stengde.

Remetunnelane mellom Slyngstad og Brattvåg stengast for trafikk mellom 6. februar – 1. juni 2023, for å gjere ei omfattande oppgradering. I stengeperioden blir det omkøyring via Søvika og endra bussruter. Hurtigbåttilbodet mellom Hamnsund og Ålesund kan òg vere eit godt alternativ for nokon.

Mellom anna skal heile vegbana senkast for å auke høgda i Remetunnelane. Dette gjer at ein slepp sentrisk køyring som utgjer ein stor risiko i dag. 

Tunnelane stengast i ei lengre periode for å gjere heilt nødvendig oppgraderingsarbeid. Sidan heile vegbana skal senkast, er det ikkje mogleg å føre trafikk gjennom i anleggsperioden. 

- Vi veit at dette gir utfordringar for dei som køyrer desse tunnelane til dagleg, og det gir konsekvensar for kollektivtrafikken. Det gjer at folk i større grad må planlegge reisene sine. Vi prøver å gjere konsekvensane så små som mogleg ved å samarbeide med FRAM om alternative ruter for buss, og vise fram andre alternativ som reisande kan nytte, som hurtigbåten. Etter ei stengeperiode med endra reisemønster får vi vesentleg betre og tryggare tunnelar. Det er gulrota, seier Erlend Opstad, som er prosjektleiar i fylkesvegavdelinga i Møre og Romsdal fylkeskommune. 

Det er gjort fleire trafikktryggingstiltak langs omkøyringsruta, som siktrydding, skilting, flytting av gangfelt og forsterka vinterdrift. Fartsgrensa er òg senka frå  70 til 60 på nokre kortare strekningar.

Nye bussruter i anleggsperioden

Stengeperioden påverkar også bussrutene i området. Omkøyringa fører til lengre reisestrekning og auka trafikk på strekninga. Dette gjer at reisetida med bussen aukar med 40 minutt på dagtid og 35 minutt på kveldstid, samanlikna med dei normale bussrutene. Det blir også gjort andre endringar i sjølve rutetilbodet for å oppretthalde eit effektivt kollektivtilbod i anleggsperioden.  

•    Viktige avgangar for arbeidspendling og skole er tilpassa slik at det skal fungere. Dette gjelder også ruter som korresponderer med linje 230 mellom Brattvåg og Ålesund
•    Nokon avgangar er satt til å køyre berre mellom Brattvåg og Hamnsund
•    Bussavgangar i periodar med lav trafikk er tatt bort, sidan desse ikkje er mogleg å oppretthalde med talet på tilgjengelege bussar

Rutetabellane for stengeperioden er oppdatert i FRAM-appen og i FRAM sin reiseplanleggar på frammr.no. 

Hurtigbåten eit godt alternativ

For reisande som skal til og frå Ålesund kan hurtigbåten vere eit godt alternativ. Hurtigbåtkaia og parkeringsområdet på Hamnsund har nyleg blitt oppgradert for å kunne handtere større trafikk. Båten har god kapasitet til å ta imot mange nye reisande.  

- Mannskapet om bord seier at båten har romsleg kapasitet og kan handtere ei stor trafikkauke. Vi legg også opp til at elevar som skal til dei vidaregåande skolane i Ålesund og Borgund, nyttar hurtigbåten i anleggsperioden. Dette er cirka 20 elevar, seier Inge Rønstad som er rådgivar i driftsseksjon i FRAM, i Møre og Romsdal fylkeskommune.

Rutetidene til hurtigbåten blir ikkje endra i anleggsperioden.

Møre og Romsdal fylkeskommune innstiller entreprenøren Aurstad Tunnel AS til å gjere utbetringsarbeidet i Remetunnelane. 
Innan tilbodsfristen 15. desember var det kome inn totalt tre tilbydarar på jobben. Etter at Møre og Romsdal fylkeskommune har vurdert alle innkomne tilbod så er det Hovdebygda-baserte selskapet valt til å gjere jobben i dei to tunnelane. 

- Etter tilbodsfristen gjekk ut har vi brukt tid på å kontrollere alle tilboda og det var Aurstad Tunnel AS som hadde den lågaste prisen. Me tar sikte på å skrive kontrakt med entreprenør rett over nyttår, seier prosjektleiar for oppgraderinga av Remetunnelane, Erlend Opstad i Møre og Romsdal fylkeskommune.

Kontraktssummen er på 86 millionar eks. mva.

Remetunnelane består av Remefjelltunnelen og Remetunnelen, som er ein del av fylkesveg 659 mellom Eidet og Brattvåg, i Ålesund kommune.

Blir høgare og tryggare

I snitt køyrer om lag 2 900 køyretøy gjennom tunnelane kvar dag. Tunnelane er rekna som eitt av dei mest utrygge punkta på fylkesvegnettet i Møre og Romsdal, fordi store køyretøy legg seg inn mot midten av vegen på grunn av låg høgde. Derfor er det ein sentral del av prosjektet å senke vegbana i tunnelane, slik at høgda aukar frå 4 til 4,6 meter.

Oppgraderinga av tunnelane består også av ny belysning, skilting, nødstasjonar og fleire andre sikkerheitstiltak. 

Stengt tunnel i 4 månader – omkøyring via Søvika

På grunn av det omfattande oppgraderingsarbeidet er det ikkje mogleg å halde tunnelane opne i anleggsperioden. Remetunnelane stengast mellom 6. februar – 1. juni 2023. Det blir i denne perioden omkøyring via Søvika, noko som naturlig nok både privatpersonar og næringsliv vil merke.

Prosjektleiinga i Møre om Romsdal fylkeskommune ønskjer tett dialog med alle som har spørsmål knytt til stenginga av Remetunnelane som skjer neste år, og omkøyringa som følgje av dette. 

Remetunnelane mellom Slyngstad og Brattvåg stengast mellom 6. februar – 1. juni 2023 for å gjere ei omfattande oppgradering. Mellom anna skal heile vegbana senkast for å auke høgda i tunnelen. Det blir i denne perioden omkøyring via Søvika, noko som naturlig nok både privatpersonar og næringsliv vil merke. Prosjektet ønskjer å leggje til rette for at alle som har spørsmål knytt til prosjektet skal få dekt sine informasjonsbehov.

- Erfaringsvis er det mange spørsmål knytt til prosjekt som fører til stenging og som fører til at folk må endre reisemønster ein periode. Vi ønskjer å gjere oss tilgjengelege for publikum som lurar på noko knytt til dette prosjektet, enten det er om sjølve utbetringsprosjektet eller om omkøyringa. Vi ønskjer å svare på spørsmål som både privatpersonar og næringsliv har, slik at dei kan starte planlegginga allereie no, seier prosjektleiar i Møre og Romsdal fylkeskommune, Erlend Opstad.

Onsdag 30. november mellom kl. 15.00 - 18.00 vil prosjektleiinga vere tilgjengelege på anleggsbrakka for spørsmål frå publikum. Anleggsbrakka ligg ved den nedlagde ferjekaia på Skjeltene i retning mot Søvika. Næraste adresse er Hildrestrandvegen 1018.

- Denne dagen vil vi vere til stades for å svare på spørsmål for dei som vil vite meir om prosjektet, om trafikkavviklinga eller andre detaljar knytt til dette. Dei som ikkje ønskjer eller kan besøke oss denne dagen oppfordrar vi til å ta kontakt med oss dersom ein lurar på noko. Kontaktinformasjon finn ein ved å gå til prosjektsida for oppgradering av fylkesvegtunnelar, på nettsida til Møre og Romsdal fylkeskommune, seier Opstad.

Utbetrar omkøyringsveg

Trafikktryggleik i anleggsperioden er viktig for prosjektet. Derfor blir det gjennomført ei rekkje utbetringstiltak langs omkøyringsvegen.

-Det køyrer om lag 2900 køyretøy i døgnet gjennom tunnelane, og ein god del av desse er lange køyretøy. Derfor er det vald å gjere trafikktryggingstiltak langs omkøyringa, som siktrydding, skilting, flytting av gangfelt og forsterka vinterdrift. Fartsgrensa er også senka frå  70 til 60 på nokre kortare strekningar, seier Opstad.

Møre og Romsdal fylkeskommune lyser no ut anbodet for oppgraderinga av Remetunnelane.

Remetunnelane består av Remefjelltunnelen og Remetunnelen, som er ein del av fylkesveg 659 mellom Eidet og Brattvåg, i Ålesund kommune.

Blir høgare og tryggare

I snitt køyrer om lag 2 900 køyretøy gjennom tunnelane kvar dag. Tunnelane er rekna som eitt av dei mest utrygge punkta på fylkesvegnettet i Møre og Romsdal, fordi store køyretøy legg seg inn mot midten av vegen på grunn av låg høgde. Derfor er det ein sentral del av prosjektet å senke vegbana i tunnelane, slik at høgda aukar frå 4 til 4,6 meter.

Sikkerheitsoppgraderinga av tunnelane inneheld fleire tiltak:

• Ny belysning, nye opplyste skilt og evakueringslys
• Nødstasjonar og nødstraum
• Nødfortau
• Brannsikkert avløpssystem
• Bom, raude blink og videoovervaking i innkøyringssoner

Stengt tunnel i 5-6 månader – omkøyring via Søvika

Den omfattande jobben som skal gjerast i tunnelane inneber at det ikkje er mogleg å halde dei opne i anleggsperioden. Derfor blir det i fem-seks månader omkøyring via Søvika på fylkesveg 527, frå februar 2023 når anleggsarbeidet startar.

Tilbodsfristen for anbodet er 15. desember.

Samferdselsutvalet har vedtatt fleire trafikktryggingstiltak på fylkesvegen mellom Slyngstad og Brattvåg, som blir omkøyringsveg når Remmetunnelane i Ålesund kommune blir stengt for oppgradering.

Tunnelane blir heilt stengt i fem månader når dei skal oppgraderast for å tilfredsstille krava i tunnelsikkerheitsforskriften, og høgda i tunnelane blir auka frå 4 til 4,6 meter. Prosjektet blir lyst ut i marknaden i haust.

Kostnaden er estimert til om lag 6 millionar kroner og tiltaka er valt med omsyn til kva som er realistisk å gjennomføre før Remetunnelane blir stengt.

Dette er trafikktryggingstiltaka:

• Flytte og sikre gangfelt over fylkesvegen i Søvika
• Ny oppmerking av kant- og midtlinjer der det er behov
• Skilte skarp kurve ved Hildre kyrkje
• Siktrydding i kurver og kryss
• Siktrydding i kurver og kryss
• Skilte møteplassar
• Forsterka vinterdrift

Møre og Romsdal fylkeskommune har i tillegg foreslått å senke fartsgrensa frå 70 til 60 på ei strekning på om lag 350 meter sør for sentrum i Søvika og på 1,3 km mellom Gamlem og Bjørnøyvegen. Forslaga er oversendt til Statens vegvesen, som er skiltmynde.

Det er gjennomført ei fagleg vurdering av trafikktryggleiken på fylkesvegen mellom Slyngstad og Brattvåg. I rapporten er det også tilrådd andre meir omfattande tiltak som kan vere aktuelle på eit seinare tidspunkt. Desse tilrådingane blir tatt med i arbeidet med framtidige prioriteringar av trafikktryggleikstiltak på fylkesveg.

Fylkeskommunedirektøren tilrår at høgda i Remetunnelane ved Brattvåg blir auka frå 4 til 4,6 meter, i samband med at tunnelane skal oppgraderast for å tilfredsstille krava i tunnelsikkerheitforskrifta.

Publisert: 27.01.22Oppdatert: 27.01.22Skriv ut

Verdien av auka trafikktryggleik og framkome er større enn den venta meirkostnaden på om lag 16 millionar kroner, samanlikna med det rimelegaste alternativet, som er å behalde dagens høgde på fire meter, skriv fylkeskommunedirektøren i saksframlegget til Samferdselsutvalet.

Tunnelane er rekna som eitt av dei farlegaste punkta på fylkesvegnettet, fordi store køyretøy køyrer midt i vegen for at tunnelane skal vere høge nok. Det køyrer ca. 2900 køyretøy her kvart døgn, 11 prosent av dei er over 5,6 meter.

Oppgraderingstiltaka

Oppgraderinga av Remetunnelane er planlagt utlyst i marknaden vår/sommar-2022 og inneheld ei rekkje tiltak som må gjennomførast for at tunnelane skal tilfredsstille krava i tunnelsikkerheitforskrifta:

• Bygge nødfortau med minimum 60 cm breidde for trygg evakuering av tunnelane
• Brannsikkert avløpssystem
• Ny belysning i samsvar med krav i nasjonalt regelverk
• Evakueringslys
• Nødstasjonar i tunnelane
• Tilgang til brannvatn
• Belyste skilt inne i tunnelane
• Montere bom, raude blinklys som markerer stengt tunnel og videoovervaking av innkøyringssonene
• Forsyning av nødstraum

I tillegg er det lista opp fleire bør-tiltak som vil vere rasjonelt å gjennomføre når det likevel blir arbeida i tunnelane. Dette er tiltak som variable skilttavler, naudnett, radio, høgdehinder, bergsikring og utbetring av vatn- og frostsikring. Det er ikkje krav til dette i tunnelsikkerheitforskrifta og tiltaka kan kuttast.

4,6 meter krev stenging av tunnelane

Auking av høgde til 4,6 meter krev at Remetunnelane blir heilt stengt i rundt fem månader. Da blir dagens veg grove bort, det blir sprengt ned under vegbanen, før vegen blir bygd opp igjen.

Omkøyring på 20 minutt

Om høgda ikkje blir auka, kan oppgraderinga gjennomførast med trafikkdirigering på dagtid og nattestenging, men arbeidet blir vesentleg hindra og meirkostnaden vil bli om lag 6 millionar kroner. Det er mogleg omkøyring via Søvika på fv. 527, som gir om lag 20 min lengre reisetid.