Ein million kr til arbeid for god psykisk helse i Møre og Romsdal

Frivillige og kommunar kan søke om støtte til aktivitetar, møteplassar og inkludering som styrkar di og mi psykiske helse.

To menn på ein benk. - Klikk for stort bileteKva skal til for at du skal ha det bra? Kommunar og frivillige lag kan søke om støtte til tiltak for psykisk helse. Helsedirektoratet


 

Nyleg vedtok kultur- og folkehelseutvalet i Møre og Romsdal fylkeskommune å tildele ein mill. kroner til arbeid for psykisk helse, som ein del av den nasjonale folkehelsekampanjen ‘ABC for god psykisk helse’. 

Det blir no oppretta ei tilskotsordning, der lag og foreiningar, frivilligsentralar og kommunar kan søke om støtte til ulike aktivitetar i forbindelse med kampanjen. 

– Det er ei gladsak at vi har vedtatt midlar til å styrke den psykiske helsa i fylket. Vi håper at mange vil søke om støtte til å informere om og prøve ut ABC-metoden lokalt og regionalt, seier leiar i kultur- og folkehelseutvalet Jessica Gärtner.

Tre grep som fungerer

Kort fortalt går ABC-metoden ut på at du med tre grep kan styrke di eiga og andre si psykiske helse. Gjer noko aktivt, noko meiningsfullt, i fellesskap med andre, eller act, belong og commit, slik det heiter  i den forskingsbaserte australske metoden.

– Frivilligheita tilbyr allereie mange møteplassar og aktivitetar for folk i alle aldrar. Både det å delta i aktivitetar eller å sjølv vere frivillig, styrkjer vår psykiske helse. Det å gjere noko meiningsfullt og inkludere andre er viktig for både eigen og andre si psykiske helse. Derfor er frivilligheita ein viktig berebjelke i kampanjen vi no sparkar i gang, seier Rigmor Hustad Holen, seniorrådgivar i fylkeskommunen.

Frå 20. august kan  kommunar, frivilligsentralar eller regionale frivillige organisasjonar søke om mellom 50 000 kroner og  300 000 kroner til blant anna møteplassar, aktivitetar, til rekruttering av frivillige, inkludering og samarbeid. Deretter blir det sett i gang 4-8 pilotprosjekt i fylket, som blir ambassadørar for å spreie ABC-grepa til folk flest. 

Basert på forsking

I tillegg set fylkeskommunen i gang ein større informasjonskampanje. Målet er at alle skal bli kjent med dei tre viktige grepa i ABC-metoden, og kva den enkelte sjølv kan gjere for å ha det bra i kvardagen.

– Tar du dei tre grepa og gjer noko aktivt og meiningsfullt saman med andre, så er du på god veg. Dette veit vi hjelper, det er basert på forsking, seier Hustad Holen. 

‘ABC for god psykisk helse’ bygger på eit forskingsbasert rammeverk utvikla ved Curtin University i Australia og blir brukt i fleire land. Dei tre enkle ABC-grepa har stor betydning for livskvaliteten og den psykiske helsa vår. 

Trøndelag fylkeskommune har vore nasjonal pilot for ABC i Noreg, og den norske modellen bygger vidare på erfaringane dei har gjort, med Helsedirektoratet i spissen. 

Her kan du lese meir og søke tilskot frå ABC for god psykisk helse.