ABC for god psykisk helse er ein nasjonal folkehelsekampanje som viser korleis aktivitet, fellesskap og meining styrkar livskvalitet og psykisk helse. I 2025 er kampanjen rulla ut i heile landet, og Møre og Romsdal fylkeskommune ga støtte til fem lokale pilotar. Målgruppa for innsatsen vår er kommunane, frivillige organisasjonar og andre aktørar fylkeskommunen samarbeider med. Den endelege målgruppa er heile befolkninga, med god ivaretaking av barn og unge, eldre og minoritetsgrupper. I tildelingane for hausten 2025 var det eit sterkt søkelys på innsatsområdet frivillig sektor for å innføre ABC.
Vi inviterer samtidig kommunar, frivilligsentralar og frivillige organisasjonar sjå etter ABC i det dei allereie gjer – og prøve ut metodar for å forankre og synleggjere ABC i arbeidet sitt.
Følg denne lenka for å lese dei fullstendige retningslinjene for ordninga (PDF, 149 kB).
Ramma for ordninga var 1 mill. kroner.
Les meir om ABC-modellen
Formål
Ordninga skal støtte lokal og regional bruk av ABC-rammeverket og sette søkelys på verdien av ABC i frivillig sektor. Vi vil bidra til å
- auke kompetanse og bevisstheit i befolkninga, det offentlege og organisasjonslivet om korleis vi kan ta vare på og styrke eigen og andre si psykiske helse.
- spreie kunnskap om aktivitetar som styrker livskvalitet og psykisk helse.
- styrke, legge til rette for og synleggjere regionale og lokale moglegheiter for slik helsefremmande aktivitet.
Desse fekk støtte
Søknadsfrist for ordninga var onsdag 1. oktober 2025.
Fjord kommune, tildelt 150 000 kr i støtte, skal jobbe med auke kompetanse og spreie kunnskap blant innbyggarane og tilsette om aktivitetar som styrker livskvaliteten og den psykisk helsa. Dei skal samarbeide med frivilligheita og næringslivet om å skape møteplassar i kommunen.
4H Møre og Romsdal, tildelt 50 000 kr i støtte, skal introdusere ABC til rådgivarane og styra i dei 33 klubbane, og produsere ABC-sett til klubbane og i lokalmiljøa.
Friluftsrådet Nordmøre og Romsdal, tildelt 250 000 kr i støtte, skal blant anna vere ambassadørar for ABC gjennom 13 medlemskommunar og ta i bruk metodikken alle aktivitetsprosjekta dei har. Dei skal også innlemme ABC i alle informasjonsflatene dei brukar.
NaKuHel Sunnmøre, tildelt 250 000 kr i støtte, skal ha eit ABC-pilotprosjekt i Sande og Ulstein kommune der dei vil lage eit interkommunalt ABC-nettverk og gjennomføre aktivitetar. I tillegg vil dei sette i verk eit prøveprosjekt i ‘sosial resept’ som skal følgast opp gjennom forsking.
Nettverk for frivilligsentralane i Romsdal og Nordmøre, kor Molde kommune står som søkar, er tildelt 300 000 kr i støtte. Nettverket skal engasjere dei 15 frivilligsentralane til å etablere nye møteplassar der dei skal bruke ABC-verktøyet. Dei skal vere bindeledd mellom kommunane og frivillig sektor og jobbe med å informere om ABC for god psykisk helse.
Rapportering
I løpet av hausten vil vi publisere eit eige rapporteringsskjema for ordninga.
Oversikt over alle rapporteringsskjema
Ei presisering om kulturtilskot
Kulturtilskot er ei moglegheit for støtte til gode prosjekt, men ikkje ei garanti. Tildelinga skjer ut frå fastsette retningslinjer, krav og prioriteringar, som er opne og tilgjengelege for alle.
Tilskotsmidlane er avgrensa, og det kjem ofte fleire søknadar enn det er midlar til. Derfor vurderer fylkeskommunen søknadane etter ei heilskapleg skjønnsutøving. Sjølv søknadar som oppfyller alle krava, kan få avslag eller ein lågare sum enn søkt beløp.