Geirangerfjorden i vakkert haustvêr.
Olav Fransson Drangeid
I Geiranger blir mellom anna nysatsinga Arctic Digital Nomads Grant lansert. Den skal gi nomadar og kunstnarar moglegheit til å søke stipend for å bu og jobbe på Færøyane, Island eller i Geirangerfjorden verdsarvområde.
Gjennom NORA programmet så har prosjektpartnarane fått mogelegheita til å utvikle eit arktisk stipend, som vert lansert onsdag. Arctic Digital Nomads Grant skal gi nomadar og kunstnarar moglegheit til å søke stipend for å bu og jobbe i Færøyane, Island eller i Geirangerfjorden verdsarvområde. Prosjektet fokuserer på korleis arktiske regionar kan tiltrekke seg arbeidstakarar og besøkande utanom høgsesongen.
Prosjektpartnarane jaktar dei eventyrlystne som elskar det eksotiske, arktiske klimaet og som anten sit på ein draum eller sterk motivasjon for å teste ut eit bygdeliv! Finst dei der ute? Kva skal til for å nå dei? Klarer vi å lokke folk frå by til land? Og kan vi freiste dei til å bli buande i våre lokalsamfunn?
Alle dei tre prosjektpartnarane tilbyr både bu- og arbeidsfasilitetar i spektakulær, arktisk natur, og vi står klare til å ta dei imot! Det er Stiftinga Geirangerfjorden Verdsarv som leiar prosjektet.
Prosjektet er støtta av NORA (Nordisk Atlantisk samarbeid), som fremmer samarbeid mellom nordiske land i Nord-Atlanteren.
Her finn du meir informasjon om Arctic Digital Nomads og utlysinga knytt til prosjektet.
Gjennom to prosjekt, EDIN og Coworking for bygdeliv, skal deltakarane utforske korleis coworking-senter og tilrettelegging for digitale nomadar kan bidra til sosial og økonomisk verdiskaping på dei små stadane våre, også utanom den travle sommarsesongen.
Med deltakarar frå mellom anna Island, Spania, Italia og Finland blir dette eit treffpunkt mellom regionar frå ulike delar Europa. Regionane har til felles at dei er rurale område med utfordringar knytte til fråflytting, aldrande innbyggarar og periodar med overturisme.
Kva er ein digital nomade?
Digitale nomadar er arbeidstakarar eller sjølvstendig næringsdrivande som kan jobbe frå kvar som helst, så lenge dei har tilgang til internett. Det finst mange forskjellige typar digitale nomadar, men dei blir gjerne over lenger tid i lågsesongar og har kompetanse innan typiske fjernarbeidsyrker som IT-utviklarar, grafiske designarar eller anna.
Jobb og utsikt i eitt og same bilde.
Hyke Studio
Dei kan velje å bu på vakre stader som Geiranger, der dei kan kombinere arbeid med naturopplevingar. Dei norske partnarane er særleg interesserte i dei digitale nomadane som også besøker for å ta del i og bidra til lokalsamfunnet, og slik skape både sosial og økonomisk verdiskaping som støttar opp om kulturen og tradisjonane til bygdene våre.
Prosjektbesøket i Geiranger kjem til å bruke tid på korleis vi kan tiltrekke desse nomadane. Samtidig må vi utforske korleis vi får dei til å spele på lag med lokalsamfunna våre og tilby kompetanse og samfunnsengasjement mens dei besøker oss.
Agenda i Geiranger
Under besøket i Geiranger vil deltakarane delta på ulike møter og verkstader der dei skal dele erfaringar og utforske nye løysingar for å gjere rurale område i Europa meir attraktive for digitale nomadar.
Det blir noko samanfall mellom dei to prosjekta, men agendaen er i hovudsak knytt til EDIN-prosjektet (sjå vedlegg).
Målet med EDIN er å utvikle politikk og tiltak som kan tiltrekke fleire digitale nomadar til regionar som Møre og Romsdal, og å auke talet på nomadar i kvar partnarregion med 30 prosent innan 2028.
EDIN-prosjektet er støtta av Interreg Europa, eit EU-program som legg til rette for samarbeid mellom europeiske regionale myndigheiter, og er delfinansiert av EU. Møre og Romsdal fylkeskommune er norsk partnar i prosjektet.
Her finn du meir informasjon om EDIN.