Rundt 1000 ungdommar utan jobb eller skole, nytt tilbod skal hjelpe dei vidare

Dei står utanfor arbeidslivet og utan skoleplass. No vil oppfølgingstenesta informere ungdommane – og foreldra - om at det finst eit nytt tilbod som kan få dei ut og i gang.

To kvinner sit ved eit bord - Klikk for stort bileteLaila Tretnes Nielsen, rådgivar og Rose Mari Skarset, seksjonsleiar informerer om nytt tilbod for ungdom mellom 16 og 24. Møre og Romsdal fylkeskommune

Oppfølgingstenesta (OT) i Møre og Romsdal fylkeskommune har etablert eit nytt tilbod for gruppa ungdom i alderen 16 til 24 år: korte kurs som kan bidra til ein jobb eller til å velje ei utdanning fleire stadar i fylket.

-Det kan vere ulike grunnar til at ungdommen ikkje går på vidaregåande eller får seg jobb, men for mange gjer det likevel godt å ha noko å gjere. Og sjølv om kursa er korte, kan dei føre til noko anna. Etter kurset kan dei oppdatere cv-en og bruke kursbeviset til å søke ein jobb, seier Laila Tretnes Nielsen, rådgivar i fylkeskommunen.

Vil informere foreldra

Kursa starta som ein pilot i fjor, og frå deltakarane fekk dei flust med godord om kor positive dei var. Likevel opplevde OT at det var vanskeleg å rekruttere nok deltakarar. I år håper dei å få informert foreldra, slik at dei kan vere ei drahjelp og nemne tilbodet for ungdommane sine.

Nielsen meiner kursa vil hjelpe ungdommen til å bli kjent med kva moglegheiter dei har til å starte eller komme i mål med skolegang eller i arbeid.

-Det er mange fleire vegar inn i både utdanning og arbeidsmarknaden enn før, som også kan kombinerast, og det er nyttig å vite om desse. Alt håp er ikkje ute om ein sluttar på vidaregåande, det ordnar seg, seier Nielsen. 

Ho nemner blant anna ordningar som praksiskandidat, realkompetansevurdering inn i vidaregåande opplæring for vaksne og fagbrev på jobb.

-Bodskapen er at kurset kan hjelpe til med å komme i gang med noko, som ein praksisplass, tilkallingsjobb eller ei vikarstilling.

Dei 45 timar lange kursa vil bli arrangert i Ulstein, Ørsta, Ålesund, Molde, Rauma og Kristiansund. Ungdom kan melde seg på kurs i Karrierekompetanse, barnehage og SFO, truckførar, butikk og sal og helsearbeid

Instruktørane på kursa er lærarar i vidaregåande skole, medan instruktørane på kurs i karrierekompetanse er karriererettleiarar i fylkeskommunen.

Deltakarane i fjor ga tilbakemelding om at dei likte å vere i lag med andre ungdomar i same situasjon, å gjennomføre personlege testar, at dei fekk noko å gå til, at kurshaldar gjorde det interessant, at det var fint å gjere noko praktisk og at kurset gjorde dei meir håpefull for framtida.