Bruk navigasjonen for å raskt finne fram til det du treng svar på.
Formålet med ordninga
I denne ordninga kan du søke om midlar til å leie inn profesjonelle kunstnarar og utøvarar med relevant kompetanse til kulturarrangement, kurs- og kompetanseheving og nettverksbygging. Du kan søke om støtte til kurs- og kompetanseheving, nettverk og kulturarrangement.
Tilskotsordninga skal òg bidra til å nå måla i planverket til fylkeskommunen.
Merk at det finnes to ulike ordningar innanfor regionale kulturfond som de kan søke. Dobbeltsjekk at du har valt riktig før du sender inn søknaden din.
Kven kan søke om støtte?
- Arrangørar innan musikk, scenekunst, visuell kunst, kulturarv, audiovisuell produksjon, litteratur, tverrgåande prosjekter
- Kommunar som arrangør eller tilretteleggjar for samarbeid
- Kunst- og kulturinstitusjonar
- Profesjonelle kunstnarar og kunstnarfellesskap
- Små verksemder innan kulturell og kreativ næring*
- Frivillige lag og foreiningar og paraplyorganisasjonar med ein tydeleg kunst-, kultur og/eller kulturmiljøprofil
Søkar har ansvar for å planlegge, organisere og gjennomføre arrangementet. Søkar må vere registrert i Einingsregisteret og ha både adresse og hovudverksemd i Møre og Romsdal.
Kva kan du søke om støtte til?
Arrangement
Støtte til innleige av profesjonelle aktørar og utøvarar innan musikk, scenekunst, visuell kunst, kulturarv, audiovisuell produksjon, litteratur og tverrgåande prosjekt.
- Honorar og reisekostnader
- Leige av lokale for øving, produksjon eller visning i samband med konkrete arrangement eller prosjekt
- Logistikk, grafisk materiell og anna marknadsføring samt andre reelle kostnader knytte til gjennomføringa av arrangementet
Kompetanseheving
Støtte til innleige av profesjonelle utøvarar og aktørar som bidreg til kompetanseheving. Prosjekt skal bidra til å byggje opp både kunnskap og kapasitet og til auka kvalitet på kunst- og kulturtilbodet lokalt og regionalt. Dette kan til dømes vere kurs, seminar, workshopar og instruksjon.
Nettverksbygging
Støtte til å skape nettverk og møteplassar innan kunst, kultur og kulturmiljø, der profesjonelle utøvarar og frivillige kulturaktørar kan møtast, dele erfaringar og samarbeide.
Kva blir det ikkje gitt støtte til?
- investering i eller vedlikehald av bygg eller anlegg,
- aktivitetar eller tiltak som hovudsakeleg inneberer idrett eller friluftsliv,
- kausjon eller anna økonomisk garanti,
- investeringar i tilskotmottakar sin eigenkapital,
- renter og avdrag på lån og refinansiering av gjennomførte prosjekt.
* Desse punkta er fastsett i «Forskrift om Regionale kulturfond».
- I denne ordninga blir det ikkje gitt støtte til ordinær drift
Det blir ikkje gitt støtte til tiltak eller arrangement som har blitt gjennomført før søknadsfristen. De får ikkje støtte når dato for gjennomføring er under 6 veker etter søknadsfrist.
Dette må søknaden innehalde
Søknaden skal sendast digitalt i fylkeskommunen sitt søknadsskjema i god tid før prosjektet startar. Søknaden må også innehalde:
- Budsjett med finansieringsplan (forventa inntekter og utgifter)
- Fyldig omtale av prosjektet
- Forklaring av korleis tiltaket treff prioriteringskriteria og mål i planverket
- CV eller anna omtale som visar kunstfagleg kompetanse hos profesjonelle utøvarar som skal leigast inn
Kor mykje kan du søke om?
Du kan søke om minimum 15 000 kroner og maksimum 70 000 kroner. Søknadssummen må vere innanfor desse grensene.
Støtta frå fylkeskommunen kan maksimalt utgjere 50 prosent av det totale budsjettet.
Søknadsfristar og oppstartsperiodar
Ordninga har tre søknadsfristar i året: 15. januar, 1. mai og 15. september.
For kvar søknadsrunde må prosjektet bli gjennomført:
- tidlegast seks veker etter søknadsfristen
- seinast seks månader etter søknadsfristen
Det er ikkje mogleg å søke om støtte til prosjekt som blir gjennomført tidlegare enn seks veker etter søknadsfristen. For prosjekt som blir gjennomført over fleire dagar, vil eit tilskot kun gjelde innanfor perioden på seks månader etter søknadsfrist.
Generelle krav som må oppfyllast
- Ein profesjonell utøvar må ha kunstfagleg utdanning på bachelornivå eller høgare eller kunne vise til kunstfagleg realkompetanse og profesjonell verksemd.
- Profesjonelle kunstarar og utøvarar som blir leid inn skal behandlast likt og få lønn i samsvar med bransjestandard. Eksempel på slike standardar er Norsk skuespillerforbund, Norske dansekunstnere, Dramatikerforbundet, Regiforbundet og Creo.
- Godtgjering for reise, diett og eventuell overnatting skal skje etter Statens regulativ.
For å fremme tilgjengelegheit og inkludering oppfordrar vi alle søkarar til å bruke prinsippa om universell utforming. Da kan tiltak vere tilgjengelege for alle deltakarar uavhengig av fysiske eller kognitive føresetnadar.
Dette må søknaden din innehalde
Søknaden skal sendast digitalt i fylkeskommunen sitt søknadsskjema i god tid før prosjektet startar. Søknaden må også innehalde
- Budsjett med finansieringsplan (forventa inntekter og utgifter)
- Fyldig omtale av prosjektet
- Forklaring av korleis prosjektet treff prioriteringskriteria og mål i planverket
- CV eller anna omtale som visar kunstfagleg kompetanse hos profesjonelle utøvarar som skal leigast inn
Slik prioriterer vi kven som får støtte
Alle søknader blir først vurderte opp mot dei tre kriteria under.
1. Relevans
Relevans opp mot utlysinga: Bidreg tiltaket til å oppfylle formålet med ordninga?
2. Effekt og verdiskaping
- Verdiskaping: Arrangementet skal bidra til verdiskaping lokalt og/eller regionalt, for eksempel ved å treffe eit breitt publikum eller nye publikumsgrupper, skape nye kulturtilbod, legge til rette for nye samarbeid eller møteplassar.
- Vi prioriterar bruk av profesjonelle kunstnarar og utøvarar som bur i fylket
- Samspel og kvalitetsheving: Vi prioriterer prosjekt som styrkar samspelet mellom profesjonelle og frivillige aktørar, til dømes arrangement der amatørar opptrer saman med profesjonelle utøvarar på scena, eller der frivillige lag og organisasjonar leiger inn profesjonelle utøvarar for å heve kvaliteten på prosjektet.
- Kommunikasjon og kompetansedeling: Kunne vise til korleis prosjektet og resultat skal bli formidla til konkrete målgrupper. Dette kan vere for eksempel kulturfeltet, næringsliv, lokalsamfunn og/eller offentlege aktørar.
3. Gjennomføring
- Framdriftsplan: Det kjem tydeleg fram korleis tiltaket skal gjennomførast, og at tidsplanen er realistisk.
- Budsjett: Ei realistisk oversikt over inntekter og utgifter knytt til tiltaket eller arrangementet.
Samla prioritering – geografisk spreiing og mangfald
Som fylkeskommune skal vi medverke til eit breitt og mangfaldig kulturtilbod i heile Møre og Romsdal. Når , fleire søknader blir vurderte som like gode etter dei tre kriteria, legg vi vekt på at tilskota samla sett gir god geografisk spreiing og kjem både store og små lokalsamfunn til gode. Vi ser òg på mangfald og variasjon i prosjekt, arrangørar, kunst- og kulturuttrykk og målgrupper.
Saksbehandling
Kulturavdelinga i Møre og Romsdal fylkeskommune behandlar søknaden din utan ugrunna opphald, i tråd med forvaltningslova. Etter at søknaden er behandla vil du få svar på søknaden din skriftleg. I tildelingsbrevet finn du opplysningar om tildelt sum og kva vilkår som må vere oppfylte før du kan få støtta utbetalt. I avslagsbrevet finn du grunnlag for avslaget.
Søkar har ansvar for at søknaden inneheld opplysningane og vedlegga som er etterspurde. Fylkeskommunen vurderer behovet for supplerande opplysningar. Dersom vi ber om supplering, set vi ein frist for innsending.
Ei presisering av kulturtilskot
Kulturtilskot er ei moglegheit for støtte til gode prosjekt, men det er ikkje ein rett. Tildelinga skjer ut frå fastsette retningslinjer, krav og prioriteringar, som er opne og tilgjengelege for alle.
Tilskotsmidlane er avgrensa, og det kjem ofte fleire søknadar enn det vi har midlar til. Derfor vurderer fylkeskommunen søknadane etter ei heilskapleg skjønnsutøving. Sjølv søknadar som oppfyller alle krava, kan få avslag eller ein lågare sum enn søkt beløp.
For å kunne gi tilskot, må vi ha nok midlar i budsjettet.
Treng du ein mal, eller har du eit spørsmål? Ta ein kikk på denne sida.
Søknadsfrist
Ordninga har tre søknadsfristar i året:
- 15. januar kl. 23.59
- 1. mai kl. 23.59
- 15. september kl. 23.59
Vi opner for nye søknadar seinast seks veker før kvar søknadsfrist. Merk at fristen ikkje blir flytta sjølv om fristen kjem på ein søndag eller raud dag.
Send inn din søknad
Rapportering
Følg denne lenka for å komme til rapporteringsskjema.
Desse har fått tildeling og avslag før