Tilskotsordning for driftsmidlar til fagskolane

Offentlege og private fagskolar som tilbyr stadbaserte eller nettbaserte høgare yrkesfaglege utdanningstilbod med fysiske samlingar i fylket, eller som driftar nettbaserte utdanningstilbod frå fylket, kan søke.

Tilskotsordninga er eigd av Kunnskapsdepartementet og administrert av Direktoratet for høgare utdanning og kompetanse (HK-dir). Fylkeskommunane lyser ut midlar, behandlar søknader og fordeler tilskot under ordninga. Du finn ei oversikt over fordelinga av tilskot etter førre utlysing lenger ned på denne sida. 

Kven kan søke om tilskot?

Offentlege og private fagskular som tilbyr stadbaserte eller nettbaserte høgare yrkesfaglege utdanningstilbod med fysiske samlingar i fylket, eller som driftar nettbaserte utdanningstilbod frå fylket, kan søkje om tilskot.

Søknadsfrist 

Fristen for å søkje er 1. november 2026, kl. 12:00. Merk at søknadsfristen er absolutt, og at for seint innkomne søknader vil bli avviste.

Føremål

Tilskotsordninga skal bidra til å sikre høgare yrkesfaglege utdanningstilbod som møter både lokale, regionale og nasjonale kompetansebehov. Ho skal og bidra til berekraft og det grøne skiftet, og til samfunnstryggleik og totalberedskap.

Basert på analysar av kompetansebehov har fylkeskommunen vedtatt at årets utlysing skal rette seg mot høgare yrkesfaglege utdanningar som dekker følgande behov og prioriteringar:

• Helse- og velferdsfag
• Tekniske fag
• Maritime fag
• Sikkerheit og beredskap
• God tilgjengelegheit, slik som;
• Tilpasse heiltid og deltid etter etterspørsel
• Fleksible og desentraliserte tilbod

Skolar som etablerer seg i Møre og Romsdal som bidreg til jamleg kontakt og dialog med arbeidslivet om kompetansebehov og som støtter lokalt arbeidsliv.

Dersom samfunnsmessige endringar knytt til kompetansebehov tilseier det, kan det også bli gitt tilskot til høgare yrkesfagleg utdanning på andre område enn det som er omtalt over.

Søknaden vil bli vurdert ut frå relevansen for desse føremåla, jfr. Vurderingskriteria nedanfor.
Her kan du lese meir om kompetansebehova og fagprioriteringar i Møre og Romsdal fylke. 

Kva kan du søke om og korleis søke?

De kan søke om tilskot til drift av heile eller delar av fagskulen sin portefølje av høgare yrkesfaglege utdanningstilbod, for perioden 1. januar til 31. desember 2027.

Innvilga tilskot kan nyttast til å dekkje driftsrelaterte kostnader knytt til den relevante porteføljen av utdanningstilbod, i tråd med dei generelle vilkåra for ordninga og eventuelle særskilde vilkår som fylkeskommunen fastset ved innvilginga.

Nedanfor finn de informasjon om kva minimumskrav som gjeld denne utlysinga, og kva kriterium søknadene vil bli vurderte ut frå. Alle søkjarar må nytte søknadsskjemaet for ordninga.

Krav til søknaden

Søknaden må oppfylle følgjande minimumskrav

• Søknaden må vere levert innan søknadsfristen.
• Søknaden må vere levert gjennom søknadsskjemaet for ordninga.
• Søknaden må vere stadfesta av styreleiaren for fagskulen.

Søknader som ikkje oppfyller desse krava, kan bli avviste. Søkar vil få ein kort tilleggsfrist for å rette mangelen der det er mogleg. I praksis gjeld dette berre stadfestinga frå styreleiaren ved fagskulen.

Kva blir vektlagt i vurderinga?

Søknadene vil bli vurderte ut frå følgjande kriterium:

• Relevans (opp mot føremålet for utlysinga): I kva grad dei delane av utdanningstilbodet som fagskulen søkjer om finansiering til bidreg til å oppnå føremålet med utlysinga slik det er oppgitt over (relevanskriterium). 
• Realisme: I kva grad fagskulen sine pågåande og/eller planlagde utdanningstilbod held høg kvalitet og er realistisk å gjennomføre (realismekriterium). 

Fylkeskommunen vil prioritere å vidareføre eksisterande finansiering av fagskular, føresett at driftstilskotet har vore brukt i tråd med gjeldande vilkår og har gitt tilfredsstillande resultat, og at ein vurderer at vidareføring vil bidra til å oppnå føremålet med utlysinga.

I vurderinga av om desse føresetnadene er oppfylte, kan fylkeskommunen leggje vekt på evaluering av fagskulen si måloppnåing tidlegare år, dialog med fagskulen, årsrapportar og rekneskap frå fagskulen og andre rapportar og talmateriale som er eigna til å klargjere slike aspekt.

Vidareføringsprinsippet gir ikkje rett til tilskot for den einskilde fagskulen, men er eit verkemiddel for å bidra til solide fagskular med tilstrekkeleg sterke faglege og administrative miljø.

Tilskotet kan bli redusert dersom beløpet det er søkt om framstår urimeleg høgt eller urealistisk, eller dersom ein reduksjon blir vurdert nødvendig for å oppnå ei tilstrekkeleg breidde i fordelinga av midlane.

Merk at innhald i lenker i søknadene ikkje vil bli lese eller vurdert.

Slik blir søknaden behandla

Søknader som ikkje oppfyller minimumskrava, vil bli avviste. Kvalifiserte søknader vil bli vurderte på grunnlag av kriteria som er oppgitte ovanfor. 

Når kan du vente svar på søknaden?

Alle søkarane vil bli informerte om utfallet av søknadsprosessen i eigne vedtak innan 10. januar. I tillegg publiserer fylkeskommunen ei oversikt over korleis tilskotsmidlane er fordelte mellom fagskulane på fylkeskommunen si nettside for ordninga. 

Kva vilkår vil gjelde for fagskular som får tilskot?

For søkarar som mottar tilskot, gjeld dei generelle vilkåra for ordninga. Desse vilkåra fastset mellom anna krav til bruken av tilskotet, rekneskapsføring, rapportering, medverknad til dialog kring måloppnåing, samt andre reglar knytte til kontroll og oppfølging av innvilga tilskot.

I tillegg kan fylkeskommunen fastsette særskilde vilkår for den einskilde fagskulen som mottar tilskot. Slike vilkår kan t.d. gjelde fagområde, forventningar til samla volum/heiltidsekvivalentar, fleksibilitet (heiltid/deltid, nett-/stadbasert), høve til å krevje betaling frå studentar, regionalt nærvær/aktivitet eller samarbeid med/bidrag til regionalt arbeidsliv.

Særskilde vilkår fastsett ramma for korleis fagskulen kan bruke tilskotsmidlane og syner kva fagskulen vil bli målt på neste år. Samstundes set vilkåra ei retning for utviklinga av høgare yrkesfaglege utdanningstilbod. Dei særskilde vilkåra skal ikkje avgrense fagskulens faglege og organisatoriske autonomi meir enn nødvendig. Dei særskilde vilkåra vil gå fram av vedtaket der fagskulen får innvilga tilskotet.
 

DBH Fagskolestatistikk

Alle fagskolar som får tilskot gjennom ordninga, skal rapportere til DBH Fagskolestatistikk.

Fagskolane har ansvar for at data som dokumenterer aktiviteten i fylket er korrekte og kvalitetssikra.

Når ein fagskole tek imot driftstilskot frå fylkeskommunen, samtykker skolen samtidig til at fylkeskommunen får nødvendig tilgang til relevante studentdata i DBH-F. Tilgangen blir berre brukt til forvaltning og oppfølging av tilskotsordninga.

Nyttige lenker

• Tilskotsordninga for driftsmidlar til fagskular (HK-dir)
• Kompetansebehov i Møre og Romsdal (kjem seinare)
• Utdanning.no
• Rapportering til DBH Fagskolestatistikk