Fv. 63 Trollstigen - strakstiltak skredsikring

Fylkeskommunedirektøren innstiller på at fjellsikring i dagen blir valt som konsept for varig sikring av Kjelstadlinja og Grustaksvingen i Trollstigen. Samstundes tilrår ho å setje i gang vidare utgreiing av sikrings- og utbetringsbehov i andre delar av Trollstigen.  

Saka skal opp i samferdselsutvalet 12. mars.

Hausten 2022 bestilte fylkestinget eit forprosjekt for å vurdere alternative løysingar for varig sikring av Trollstigen, med hovudvekt på fjellsikringsalternativet. På bakgrunn av dette innstiller fylkeskommunedirektøren no på å prioritere fjellsikring i dagen framfor ei tunnelløysing, i tråd med innspel frå turistnæringa og kommunar.
Fjellsikringa vil omfatte tiltak som reinsking, nedsprenging, steinsprangnett, boltar, fanggjerde og radarovervaking av bergparti. Ei tredjepartsvurdering har konkludert med at dette sikringsalternativet vil gi ein betydeleg reduksjon i skredfaren samanlikna med dagens situasjon.

Prosjektet har to mogelege gjennomføringsstrategiar:

• Scenario 1: Gjennomføring over tre sesongar med stenging utanom juni og juli. Kostnad: 305 millionar kroner.
• Scenario 2: Heilårsstengt i 1,5 sesong. Kostnad: 247 millionar kroner.
   

Val av strategi blir vurdert vidare, men fylkeskommunedirektøren peiker på at stengeperioden vil ha stor verknad på kostnadene og konsekvensane for næringslivet og turistnæringa i området.

Forprosjektet som no er lagt fram, gjeld berre dei mest rasutsette områda, og det vil vere behov for vidare undersøkingar for heile strekninga. Fylkeskommunedirektøren tilrår derfor å setje i gang forprosjekt 2.0 for å kartleggje sikringsbehova i resten av Trollstigen.
Tilrår prinsipiell tilslutning til bompengefinansiering 

Parallelt med konseptval, blir det jobba med eit mogleg bompengeprosjekt i Trollstigen. I same møte i samferdselsutvalet er det lagt fram ei sak der fylkeskommunedirektøren tilrår å gi ei prinsipiell tilslutning til bompengefinansiering for varig sikring og utbetring av heile Trollstigen.

I saka blir det vist at ulike modellar for innkrevjing av bompengar gir svært ulike kostnader for trafikantane. Gjennom gjeldande Nasjonal transportplan har regjeringa opna for meir fleksibel bruk av bompengeordninga med mål om meir effektiv ressursutnytting. Fylkeskommunedirektøren meiner Trollstigen er eit særs godt eigna prosjekt for parallellinnkrevjing. Dette vil gi desidert mest nytte for lågast mogleg kostnad for trafikantane. Fylkeskommunedirektøren tilrår at fylkestinget ber Samferdselsdepartementet om aksept for at eit evt. bompengeprosjekt i Trollstigen kan ha parallellinnkrevjing. 
 

No er arbeidet med å sikre ei avskjeringsgrøft langs den nasjonale turistvegen fullført. Dette var første del av skredsikringsarbeidet, og ein ventar no på å kunne tildele kontrakt til entreprenør for del to.

- Vi er glade for at arbeidet i første del av strakstiltaka stort sett har gått som planlagt, seier Solgunn Langlo, prosjektleiar i Møre og Romsdal fylkeskommune.

- Entreprenøren Veidekke Industri AS har saman med underentreprenør Terrengentreprenøren AS lagt ned ein imponerande innsats i Trollstigen gjennom heile sommaren for å bli ferdig i tide.  

Neste del av arbeidet er fjellrensk- og sikringsarbeid i fjellsida Kjelstadlinja. Her er tilbodsfristen for anbod denne veka, og arbeidet forventast å være i gang i løpet av september.  

Møre og Romsdal fylkeskommune har som mål og kunne opne Trollstigen i turistsesongen i 2025, dersom alt går etter planen og det ikkje dukkar opp noko uforutsett i fjellet.

Måndag 2. september signerte Møre og Romsdal fylkeskommune kontrakt med Risa AS om strakstiltak for skredsikring av den nasjonale turistvegen. Dette er del 2 av arbeidet, der målet er å opne i turistsesongen 2025.

Risa AS vann anbodet på prosjektet, og førebur seg no på arbeidet med fjellreinsk og sikringsarbeid i fjellsida Kjelstadlinja.

- Vi ser fram til å samarbeide med Risa AS, seier prosjektleiar i Møre og Romsdal fylkeskommune, Solgunn Langlo.

Ho fortel vidare at dei no går inn i ei planleggingsfase med entreprenøren, men tek sikte på å starte arbeidet i løpet av neste veke.  
- Anleggsområdet er svært utfordrande, og sikkerheit er ei prioritering.

Eit viktig nasjonalt symbol

Det var i juni at fylkeskommunen avgjorde å stenge Trollstigen på grunn av gjentatte steinsprang og stor skredfare.  Trollstigen i Rauma kommune får besøk av rundt ein million turistar kvart år, og stenginga har store ringverknader for turistnæringa i fylket. Dette var bakgrunnen for at regjeringa vedtok å bidra med 40 millionar kroner slik at det blei mogleg å gå i gang med strakstiltak for å sikre vegen mot skred. Fylkesutvalet vedtok å bidra med ei restfinansiering på 10 millionar kroner.

- Vi takkar for tilliten ved å bli tildelt dette oppdraget, og gler oss til å starte arbeidet på den nasjonale turistvegen, seier Sven Marius Ollestad i Risa AS.

Kontraktsummen med Risa AS er på 17,3 millionar kroner. Signeringa blei utført på eit digitalt møte 2. september. Første del av skredsikringa blei utført i sommar gjennom ei driftskontrakt, og var verdt om lag 10 millionar kroner.

Arbeidet med strakstiltak for skredsikring har gått føre seg jamnt og trutt sidan juli. No settast det luftige arbeidet på pause i påvente av snø og vinter.  

Det har vore ein utfordrande jobb med fjellrensk- og sikringsarbeid i fjellsida Kjelstadlinja midt i Trollstigen. Entreprenøren Risa har jobba seg nedover fjellsida ved hjelp av klatrarar, vasspyling frå helikopter, maskiner og andre tiltak.  

Kristian Bjørdal, byggleiar Møre og Romsdal fylkeskommune, seier det at jobben har vore krevjande, men det er god framdrift i arbeidet.

– Entreprenøren Risa AS har jobba seg godt nedover fjellveggen, men det er krevjande terreng og jobbe i sjølv når det ikkje er snø.  

– Mykje snø og vedvarande minusgrader er ikkje er foreinleg med arbeid. Vi pakkar no ned og skal klargjere området før vinteren kjem for alvor, seier han.  

Arbeidet med skredsikring blir starta opp igjen til våren, men dato er usikker. Den kjem an på veret. Vegen opp til Trollstigplatået er også vinterstengt frå 28. oktober.

Målet er å opne Trollstigen i turistsesongen 2025.