Fylkeskommunedirektøren tilrår at ny kryssing av Nørdre Vaulen i Herøy kommune skal skje i same trasé som dagens Remøybru.
Samstundes blir det tilrådd at fylkestinget ber fylkeskommunedirektøren går i dialog med Kystverket for å redusere seglingshøgda på den nye brua. Dette vil kunne bidra til reduserte kostnader og mindre klimapåverknad.
Saka blir behandla i samferdselsutvalet 12. mars.
Bakgrunn
Dagens Remøybru er i dårleg forfatning, med omfattande skadar i berande element. Fylkestinget vedtok i april 2023 å starte reguleringsarbeid for ei ny kryssing av Nørdre Vaulen. Det er i den vedtekne økonomiplana for perioden 2025–2028 sett av 24 millionar kroner til planlegging og oppstart av prosjekteringa.
Før Fylkeskommunen kan gå vidare med reguleringsplanarbeidet for kryssing av Nørdre Vaulen, må det gjerast eit vedtak om traséval. Tilrådinga i saka er basert på vurderingar gjort i moglegheitsstudiet.
Moglegheitsstudie, gjennomført av Multiconsult, har vurdert åtte alternative traséar for kryssing av Nørdre Vaulen. Desse alternativa har vorte vurderte utifrå fleire faktorar, inkludert trafikktryggleik, klimapåverknad, kostnader og framkome på sjø. Etter ei grundig vurdering har fylkeskommunedirektøren konkludert med at ny bru i eksisterande trasé er den beste løysinga.
Kvifor eksisterande trasé?
Gjev moglegheit for tidleg riving av dagens bru, som kan bli naudsynt grunna usikker bereevne.
Opnar for ulike konstruksjonsløysingar, inkludert mogleg reduksjon av seglingshøgda.
Har den antatt lågaste risikoen knytt til bygging og planlegging.
Gjev minst mogleg inngrep i natur, landskap og eksisterande infrastruktur.
Kan leggje til rette for ei trygg og effektiv løysing for gang- og sykkelveg.
Moglegheitsstudiet viser at seglingshøgda på ny bru vil ha stor innverknad på kostnadene og klimafotavtrykket. Fylkeskommunedirektøren tilrår derfor å samarbeide med Kystverket for å avklare behovet for seglingshøgde snarast mogleg.
Vegen vidare
Etter vedtak om traséval vil det bli sett i gong grunnundersøkingar, tekniske utgreiingar og koordinering med statlege og regionale aktørar. Reguleringsplanen er venta godkjent i Herøy kommune våren 2028. Endeleg kostnadsramme vil bli lagt fram for politisk behandling etter at reguleringsplana er vedteken.
Møteinnkalling, saksliste og saksframlegg for samferdselsutvalet onsdag 12. mars