Fv. 60 Tomasgard-Røyrhus

Det var godt oppmøte og stort engasjement då Møre og Romsdal fylkeskommune inviterte til informasjonsmøte om reguleringsplanen for ny fv. 60 mellom Tomasgard og Røyrhus. Møtet fann stad i Honndalshallen på Grodås tysdag 20. mai.

Innbyggjarane som møtte opp, var gjennomgåande positive til planane for ny veg, og gav gode tilbakemeldingar på møtet. Mange hadde spørsmål, og fleire uttrykte at dei var fornøgde med at fylkeskommunen stilte opp. Dette bidrog til å oppklare fleire forhold og redusere usikkerheit rundt vidare arbeid. Det er likevel framleis ein del ting det må sjåast nærmare på.  

Prosjektleiar Stig Vindenes og planleggingsleiar Per Gunnar Løset frå Møre og Romsdal fylkeskommune presenterte status i arbeidet. Saman med oppdragsleiar i Sweco, Audun Brekke Fjeldheim, viste dei den førebelse veglinja. Denne er basert på vedteken kommunedelplan. Ifølge Vindenes er det viktig at grunneigarar og andre får komme med sine innspel no

- Arbeidet er inne i ein viktig fase der endeleg plassering av veglinja skal fastsettast, sa han under møtet.  

Mange av dei frammøtte melde seg òg på til eit direkte møte med fylkeskommunen på Smia dagen etter. 

- Det er mange omsyn å ta og detaljar som skal på plass, men vi er godt i gang, sa Vindenes.

Etter at reguleringsplanforslaget er ferdig frå fylkeskommunen si side, skal det sendast ut på høyring før Volda og Stranda kommunar fattar endelege vedtak. Dersom tidsplanen held, kan planane bli vedtekne i 2026, med mogleg byggestart frå 2027. Den nye vegen skal ha ei fartsgrense på 80 km/t og inkluderer fem planlagde bruer. Heile vegkroppen må byggast på nytt, då den eksisterande vegen delvis er anlagt over myr. Det krev utskifting av massar ned til fast grunn.

Prosjektoversikt

Strekning: Tomasgard – Røyrhus i Volda og Stranda kommunar (ca. 13 km) 
Fartsgrense: 80 km/t 
Bruer: 5 planlagde bruer 
Planstatus: Reguleringsplanlegging pågår, med planlagt vedtak i 2026 og mogleg byggestart i 2027.

Tysdag 20. mai var det ope møte på Grodås, for innbyggarar og interessentar. 

Presentasjon frå møtet (pdf) (PDF, 6 MB)

Møre og Romsdal fylkeskommune er i gang med reguleringsplanlegging for ny fylkesveg 60 frå Tomasgard i Volda kommune til Røyrhus i Stranda kommune. I samband med arbeidet vil det bli synfaringar og anna aktivitet i og langs den nye vegtraséen utover hausten.

Fylkeskommunen har sendt ut fleire varsel om komande undersøkingar i samband med planarbeidet. Både arkeologiske og geotekniske undersøkingar skal gjennomførast. Heile strekninga er på 13,5 km.

Arkeologiske registreringar på strekninga frå Tomasgard til Raftevollen

Strekninga blir undersøkt for å avdekke automatisk freda kulturminne. På dyrka mark blir det brukt gravemaskin som fjernar matjordlaget i 3 meter breie sjakter. Lengda vil variere avhengig av området si arkeologiske interesse. I hagar og andre sårbare områder vil ein unngå bruk av maskiner. Grunneigarar som blir direkte råka av arbeidet har fått skriftleg varsel om dette.  

Arbeidet startar i siste del av oktober, og arbeidet vil halde fram utover hausten.  

Figur 1: Ny vegtrasé frå den vedtekne kommunedelplana er vist med raud strek.

Geotekniske undersøkingar på strekninga frå Raftevollen til Røyrhus

Ein viktig del av grunnlaget for planlegging og prosjektering av vegen er kunnskap om grunnforholda. For å få detaljert kunnskap skal de gjerast geotekniske grunnundersøkingar. Til dette blir nytta ein beltegåande borerigg som borar så langt ned at ein treffer på berg, men ikkje djupare enn 10-20 meter. 

På denne strekninga følger den nye vegen meir og mindre dagens trasé. Med unntak av nokre få plassar ved Raftevollen og Støverstein/Kjellstadli blir boringane gjort i dagens veg.  

Så lenge arbeidet går føre seg på fylkesvegen vil eit køyrefelt bli stengt og det blir trafikkdirigering på staden. Vi ber trafikantane ta omsyn.

Arbeidet er planlagt gjennomført i tidsrommet 10. oktober til 20. desember 2024.

Fylkeskommunedirektøren meiner at den beste måten å få betre veg på strekninga mellom Tomasgard og Røyrhus bru på fv. 60 i kommunane Stranda og Volda, er å gjenbruke delar av eksisterande veglinje i staden for å byggje heile vegen i ny trasé.

Kommunedelplanen, som vart vedteken for over 10 år sidan, legg til grunn at det skal byggjast ny veg i ein annan trasé enn der vegen går i dag. Men verdianalysen som er utført i samband med planleggingsarbeidet for prosjektet, utfordrar desse planane, mellom anna med bakgrunn i omsynet til natur og miljø, og økonomi.

Konseptval for vegprosjektet skal til første politiske behandling i utbyggingsutvalet for bygg- og vegsaker 30. mai. Deretter følgjer behandling i samferdselsutvalet 31. mai, fylkesutvalet 8. juni og endeleg avgjerd i fylkestinget 19.-21. juni.

I framlegget til den politiske saka legg fylkeskommunedirektøren fram ei samla vurdering av måloppnåing, inkludert natur og klima, kostnadar og mogleg framdrift, som gjer at ho vil tilrå fornying av veg i eksisterande trasé på strekninga Tomasgard–Røyrhus bru på fv. 60.

Natur og miljø

Samferdselsutvalet i Møre og Romsdal fylkeskommune vedtok hausten 2022 at det skulle gjennomførast ei verdioptimalisering av vegprosjektet. Bakgrunnen for dette var alderen på kommunedelplanen og konsekvensutgreiinga samt Statsforvaltaren sin merknad til oppstartsmeldinga for reguleringsarbeidet. I merknaden påpeika Statsforvaltaren at det var fleire forhold det måtte takast omsyn til vidare i planlegginga. Det gjaldt forhold som kunne ha innverknad på grunngjevinga for val av konsept, mellom anna naturverdiar, naturmangfald og konsekvensar av nedbygging av myr. Også fylkeskommunedirektøren meinte at auka merksemd på berekraft, klimautslepp og naturinngrep tilsa at det var behov for ei ny vurdering.

Hensikta med ei verdioptimalisering, eller verdianalyse, er å utfordre løysingane og kvalitetssikre planane i eit prosjekt, samt leite etter auka samfunnsnytte og kostnadssparande tiltak. Innovative løysingar som kan forbetre prosjektet, redusere kostnadar og bidra til økt berekraft er også ein del av ei verdioptimalisering.

Vurdere ambisjonsnivå

Av framlegget til saka går det fram at rapporten frå verdianalysen peiker på at løysingane i kommunedelplanen ikkje vart vurdert tilstrekkeleg opp mot utbetringar i dagens trasé. Rapporten slår også fast at behov, mål og ambisjonsnivå for vegprosjektet må diskuterast i større grad.

I rapporten er det definert seks ulike ambisjonsnivå, der vedtatt kommunedelplan er definert som nivå 6. Dette nivået blir samanlikna mot nivå 4, gjenbruksalternativet, der ein bygger ny veg i dagens trasé og brukar opp att massar der det er mogleg.

Dersom målet er full vegnormalstandard med fartsgrense 80 km/t, vil det i følgje rapporten vere mest kostnadseffektivt med ny veg i tråd med vedtatt kommunedelplan, med nokre justeringar. Ny veg er kostnadsvurdert til om lag 490 millionar 2022-kroner. Ny veg er derimot ikkje prioritert i gjeldande investeringsprogram, og det er mange strekningar på fylkesvegnettet som har tilsvarande utfordringar som fv. 60. Fylkeskommunedirektøren stiller derfor spørsmål ved når realisering av prosjektet blir aktuelt.

Akseptabel standard

I saksframlegget peiker fylkeskommunedirektøren på at dei statlege aktørane innan planlegging og bygging av veg må optimalisere aktiviteten sin med bakgrunn i krevjande økonomiske tider. Nye Veier AS har redusert fleire store og ambisiøse prosjekt til mindre tiltak med god effekt, og valt denne metoden for E136 gjennom Romsdalen.

Fylkeskommunedirektøren meiner at dersom ein kan redusere ambisjonsnivået noko i dette vegprosjektet, med å bygge ny veg i eksisterande veglinje, vil ein like fullt oppnå ein standard som er akseptabel og langt betre enn i dag. Dette alternativet vil gje langt mindre inngrep i naturen, vere meir berekraftig – og det vil vere mogleg å spare rundt 200 millionar kroner i investeringskostnader, samanlikna med å bygge ny veg. Ifølgje verdianalysen vil utbetring i eksisterande veglinje gjere det mogleg å utbetre vegen etappevis, og på denne måten gjere det meir mogleg å få framdrift i prosjektet.

I samsvar med § 12-8 i plan– og bygningslova kunngjer Møre og Romsdal fylkeskommune oppstart av reguleringsplanarbeid for ny fylkesveg 60 mellom Tomasgard i Volda kommune og Røyrhus bru i Stranda kommune.

Planen vil bli utarbeidd i samarbeid med Volda og Stranda kommunar.

Målsettinga med planarbeidet er å skaffe eit formelt grunnlag for å kunne bygge ny trase for fylkesveg 60 på strekninga. Planen vil bli utarbeidd som ei detaljregulering etter § 12-3 i plan– og bygningslova. Den vedtekne kommunedelplanen frå 2012/13 for strekninga, vil danne grunnlaget for arbeidet med reguleringsplan.

Det blir sendt brev direkte til grunneigarar innanfor planområdet, naboar og andre høyringsinstansar. Vi ber om synspunkt, innspel eller andre relevante opplysningar innan 31.mars 2022, sendt skriftleg til Møre og Romsdal fylkeskommune, Julsundvegen 9, 6412 Molde eller epost: post@mrfylke.no.